1 Tayta Dios, manami noqakunatatsu alabapäkamanman.
Tsaypa trukanqa qamta pïmaypis alabaykuläshunki.
Kuyapäkuq kashqaykipita y rasun kaqta nishqaykipita alabaykuläshunki.
2¿Imanirtaq runakuna asipämashpan kayno nipäkaman: <<¿Maychötaq Diosniki kaykan?>>?
3Tayta Diosnintsiqa jana patsachömi kaykan.
Paymi lapan munashqanta ruran.
4Runakuna adorashqan ïdulukunaqa qorilapita y qellaylapitami kaykan.
Tsaykunataqa runakunalami rurapäkun.
5Shimin kaptinpis manami rimantsu.
Nawin kaptinpis manami rikantsu.
6Rinrin kaptinpis manami mayantsu.
Senqan kaptinpis manami muskintsu.
7Makin kaptinpis manami yatantsu.
Chakin kaptinpis manami purintsu.
Tsaykunaqa manami imatapis rimakuntsu.
8Ïdulu munayniynaq kashqannömi ïdulukunata ruraqkunapis karkaykan.
Ïdulukunaman yärakuqkunaqa ïdulunölami lapan karkaykan.
9Israel runakuna, ¡Tayta Dioslaman yärakäriy!
Paymi yanapamantsi y escüduno imapitapis tsapämantsi.
10Aarón aylu cürakuna, ¡Tayta Dioslaman yärakäriy!
Paymi yanapamantsi y escüduno imapitapis tsapämantsi.
11 Tayta Diosta mantsakuqkuna, ¡payman yärakäriy!
Paymi yanapamantsi y escüduno imapitapis tsapämantsi.
12 Tayta Diosmi yarparaykämantsi.
Paymi Israel runakunapaq bendicionninta churamun.
Aarónpita miraqkunapaqpis bendicionnintami churamun.
13 Tayta Diosqa payta mantsakuqkunapaqmi bendicionninta churamun.
Rïcukunapaqpis y waktsakunapaqpis bendicionninta churamunmi.
14Tsurintsikunapaq y wilkantsikunapaqpis bendicionninta churaykalämutsun.
15Jana patsata y kay patsata kamaq Tayta Dios bendicionninta qamkunapaq churaykalämutsun.
16Jana patsaqa Tayta Diospami kaykan.
Kay patsataqa runakuna tänanpaqmi kamashqa.
17Pamparaykaqkunaqa manami Tayta Diosta alabantsu.
18Noqantsimi itsanqa Tayta Diosta imaypis alabashun.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
