Salmo 5 - Quechua Margos-Yarowilca-Lauricocha Bible（qvm）

Salmo 5Tsapänanpaq Tayta Diosta manakushqan 1 (1) Cantaqkunapa mandaqninpaqmi. Kënata tukapalanpa cantapäkunki. David qelqashqan salmu.

1 1 (2) Tayta Dios, manakamushqäta wiyaykalämay.

Shonqulächo ruwakamuptïpis mayaykalämay.

2 2 (3) Lakikur manakamushqäta cäsuykalämay.

Qammi mandamaqnï rey y Diosnï kaykanki.

Qamlatami imaypis manakushayki.

3 3 (4) Tsaka tsakalami qamta manakamü.

Patsa waras waraslami qamta ruwakamü.

Manakamushqäta contestamänaykitami shuyaraykä.

4 4 (5) Runakuna mana alita ruraptin manami kushikunkitsu, Tayta.

Jutsa ruraq runakunataqa manami nawpaykimanpis chaskinkitsu.

5 5 (6) Orgullösu kaqkunataqa rikaytapis manami munankitsu.

Lutan ruraq runakunataqa chikinkimi.

6 6 (7) Lulakuqkunataqa ushakätsinkimi.

Sakyapakuq runakunata y wanutsikuq runakunataqa manami chaskinkitsu.

7 7 (8) Noqatami itsanqa kuyapäkuq kar wayikiman yaykamunäpaq chaskimanki.

Sagrädu templuyki nawpanpa rikäramur lapan shonqüwanmi adorashayki.

8 8 (9) Alilata ruraq kar conträ runakunapita tsapaykalämay, Tayta Dios.

Munashqaykino kawanäpaq ali nänipa pushaykalämay.

9 9 (10) Chikimaqnïkunaqa manami rasun kaqta imaypis parlantsu.

Shonqunchöpis jutsa ruraylapaqmi rapipa rapiykan.

Shiminpis kicharaykaq sepultüranömi kaykan.

Lulakunanpaqqa mamalan wachashqami karkaykan.

10 10 (11) Paykunata castigaykulay, Tayta Dios.

Yarpachakushqankunatapis manakaqman churaykulay.

Paykunaqa contraykimi rikakushqa.

Mana wanakuypa jutsata rurashqanpita manakushuptikipis ama cäsupaytsu.

11 11 (12) Qamman yärakamuqkunaqa kushikäritsun.

Ali rikashqaykipita imaypis alabaykuläshunki.

Kuyashuqnikikunaqa imaypis kushishqa kawapäkutsun.

12 12 (13) Tayta Dios, qam munashqaykino kawaq runakunamanmi bendicionnikita churamunki.

Paykunata kuyashpaykimi escüduno kaykanki.