1 Tayta Dios revelashqantami Petuelpa tsurin Joel kayno wilakurqan:
2Mayor runakuna, kanan nishqäta shumaq mayapäkamay.
Judá nacioncho taq runakuna, kanan wilakushqäta wiyapäkamay.
Kay castïgutanöqa ¿imaylapis rikapäkushqankiku?
Taytayki kawashqan witsan kayno mantsariypaq castïgu ¿imaylaqa kashqaku?
3Kay castïgu imano kashqantapis tsurikikunata wilapanki.
Tsurikikunapis tsurinkunata wilapanqa.
Tsaynöla wilkaykikunapis tsurinkunata wilapanqa.
4Jatusaq chukluskuna katushqantapis akapa chukluskunami ushashqa.
Akapa chukluskunapita qeshpiqlantapis malumyakunami mikushqa.
Tsaypita putsuqlantapis shiwrikunami ushashqa.
5Upyalaman churakashqa kaq runakuna, tantiyakäriy.
Shinkashqaykipita kachakarkur waqapäkuy.
Chukluskuna üvata ushaptin upyanaykipaq vïnupis manami kannatsu.
6Yupaytapis mana atipaypaq soldädukunanömi tsay chukluskuna markantsiman juntakämushqa.
Kirunkunapis waqunkunapis leonpanöraqmi kaykan.
7Lapan üvakunatapis chakranpami ushashqa.
Hïguspa rämantapis pasaypami ushashqa.
Yörantapis tululantami kachaykushqa.
8Tänanpaq promitishqan mözu wanuykuptin virgen jipash lütu röpata jatikurkur waqashqanno iktsuypa iktsur waqapäkuy.
9Cürakunapis waqarkaykan tsaki mikuy ofrendata ni vïnutapis Tayta Diospa templunman pipis manana apaptinmi.
10Trïgupis manami kannatsu.
Üvakunapis tsakishqanami.
Olïvu yörakunapis ushakashqanami.
Lapan chakrakunachöpis polvulanami sharkuykan.
11Chakracho aruqkuna, üvata cosechaqkuna, makikita choqpakurkur waqapäkuy.
Trïgutapis cebädatapis manakaqlapaqmi murupäkushqanki.
12Üva yörakunapis tsakikäkushqanami.
Hïguskunapis ushakashqanami.
Granädakunapis, palmërakunapis, manzänapa yörankunapis y lapan plantakunapis tsakikäkushqanami.
Tsaymi runakuna pasaypa mantsakashqa karkaykan.
13Tayta Diosta altarcho sirviq cürakuna, qachqa röpata jatikurkur waqapäkuy.
Tsaki mikuypis ni vïnupis Tayta Diosnintsipa wayinman apamunanpaq manami kannatsu.
14Mayor runakunata y pampa runakunata Tayta Diosnintsipa wayinman juntakänanpaq qayatsipäkuy.
Tayta Diosta manakur lapayki ayunapäkuy.
15¡Tayta Dios juzganan junaq chayaykämunnami!
Tsay junaq chayamuptin ¡imanöraq runa nakaykulanqa!
Tsay junaqmi lapanpaq munayniyuq Tayta Dios tsaytsika runakunata ushakätsinqa.
16Mikuynintsi ushakaptin pasaypa muchuychönami kaykantsi.
Tsaymi Tayta Diosnintsipa templunman aywarpis mana kushikuntsinatsu.
17Murushqantsi trïgupis manami winamushqatsu.
Mikuy pirwakuna wayintsikunachöpis wayralami tumaykan.
18Qewata maychöpis mana tarirmi wäkakunapis pasaypa kuyapaypaq waqarkaykan.
Tsaynölami uyshakunapis cabrakunapis wanur ushakarkaykan.
19¡Tayta Dios, yanapaykalämay!
Jirkacho qewatapis y munti yörakunatapis ninami rupar ushashqa.
20Raqrapa aywaq yakupis tsakishqami kaykan.
Chunyaq jirkacho qewakunatapis ninami ushashqa.
Tsaymi jirka uywakunapis waqapaykäshunki.
Who We AreWhat We EelieveWhat We Do
2025 by iamachristian.org,Inc All rights reserved.
