1Yätsishqäkunata shumaq chaskikuy, hïju.
Tantiyatsishqäkunata imaypis yarparay.
2Tsaynöpami shumaq tantiyakuykur imatapis rimankipaq.
3 Wayrapakuq warmiqa shakya shakyala parlapashpanmi pitapis inkitan.
4Paywan jatikarqa pasaypa desgraciamanmi chayankipaq.
Ishkan waqtanpa afilashqa espädawan tuksishqanömi kankipaq.
5Manaraqpis aykätami ushakankipaq.
Wanuypis janaykichönami kanqa.
6Tsay warmiqa ali kawananpaq manami yarpachakuntsu.
Imano kawaykashqantapis manami tantiyakuntsu.
7Tsayno kaykaptinqa yätsishqäkunata shumaq mayakamay, hïju.
Tantiyatsishqäkunata mana qonqaypa yarparay.
8Wayrapakuq warmipita witikunki.
Wayi punkulanmanpis ama chayankitsu.
9Wayrapakuq warmiwan kakuptikiqa lapan tarishqaykipis jukpaqmi kanqa.
Fiyu runakunapa makinchömi wanunaykiyaq nakanki.
10Nakar arushqaykiwanmi mana reqishqayki runa rïcuyanqa.
Arur gänashqaykipis jukpanami kanqa.
11Tsaymi wara warantin awkinyashpayki lakikur waqankipaq.
12Tsayno nakarmi kayno ninkipaq: <<¿Imanirtaq corrigimashqanta cäsukurqätsu?
¿Wanushqatsuraq karqä yätsimashqanta mana chaskikunäpaq?
13Yätsimaptinpis manami chaskikurqätsu.
Anyapämaptinpis manami cäsukurqätsu.
14Pïmaypis rikaykämanmi desgracia pasaykämashqanta.
Ichiklapami imaykätapis oqraykushqätsu>>.
15Warmilaykiwan contentakunki.
Payqa chuya pukyuykinömi kaykan.
Tsay pukyulaykipita upukunki.
16Cällikunapa y pläzakunapa aywaq yakuta mana upushqaykino juk warmiwan ama kakuytsu.
17Tsaypa trukanqa warmilaykiwan kakuy.
18Tayta Dios kamaripäshushqayki warmiqa bendicionmi qampaq kaykan.
Tsayno kaykaptinqa mözu kashqaykipita patsa tashqayki warmilaykiwan contentakuy.
19Payqa kuyaylapaq luychunömi kaykan.
Kuyashushqaykiwan y waylushushqaykiwan imaypis contentakuy.
20Warmiyuq kaykarqa ¿imanirtaq juk warmiwan jatikankiman, hïju?
¿Imanirtaq mana warmiki kaykar makalaräshunkiman?
21 Tayta Diosqa imano kawashqantsitapis musyaykanmi.
Payqa imata rurashqantsitapis rikaykanmi.
22Jutsa ruraqkunaqa kikinpa jutsanpitami nakan.
Jutsata rurashqanpitami läzuwan liyashqano kaykan.
23Mana cäsukuq kashqanpitami wanunqapaq.
Mana tantiyakuq kashqanpitami ushakanqapaq.
Who We AreWhat We EelieveWhat We Do
2025 by iamachristian.org,Inc All rights reserved.
