1Tsay witsanmi chunyaq jirkapis y tsaki pampakunapis kushikunqa.
Qara pampakunachöpis qewa loqluypa loqlur winarmi tuktunqa.
2Waytakunapis chinyaraypami tuktunqa.
Pampakunapis kushishqami cantanqa.
Muntikunapis Líbano muntikunanömi kuyaylapaq kanqa.
Chakrakunapis Carmelucho y Saróncho kuyaylapaq kashqannömi kanqa.
Tsawraqa pïmaypis tantiyanqa Tayta Diosnintsi munayniyuq kashqanta.
3Makiki warkakaqno mananiraykarpis
y qonqurniki watakaqno qasakarpis valurapäkuy.
4Mantsakuqkunata kayno nishun:
<<¡Ama mantsakäriytsu!
¡Valurapäkuy!
¡Tayta Diosnintsi yanapashunkimi!
Nakatsishuqnikikunatami castiganqa.
Kikin shamurmi salvashunki>>.
5Tsaymi qaprakunapis rikanqana.
Mana mayaqkunapis mayanqana.
6Weqrukunapis luychunöraqmi pañanqa.
Shimin mana pashtaqkunapis kushikurmi cantanqa.
Chunyaq jirkakunachöpis atskami yaku pashtanqa.
Tsaki jirkakunapapis mayunöraqmi yaku aywanqa.
7Pasaypa qochami tsaycho rikakunqa.
Pukyukunapis pashtamunqami.
Chacalkuna tashqankunachöpis shoqushkuna y ututukunami winamunqa.
8Tsaypami nänipis aywaranqa.
Tsay nänipa jutinmi kanqa Diosman Chayana Sagrädu Näni.
Jutsata ruraq runaqa manami tsay nänipa purinqatsu.
Mana tantiyakuq runakunaqa tsay näniman manami jaruylapis jarunqatsu.
Tayta Dios munashqanno kawaq runakunalami tsay nänipaqa purinqa.
9Tsaypaqa leonkunapis manami purinqatsu.
Jatusaq chucaru uywakunapis manami yaykunqatsu.
Tsay nänipaqa salvashqa kaq runakunalami purinqa.
10 Tayta Dios salvashqan runakunami tsay nänipa Jerusalénman kutipäkamunqa.
Kushishqa cantaraykarmi Siónman yaykapäkamunqa.
Tsaychömi imaypis kushishqa kawapäkunqa.
Kushishqa ali kawaptinmi lakikuypis ni waqaypis mana kanqanatsu.
Who We AreWhat We EelieveWhat We Do
2025 by iamachristian.org,Inc All rights reserved.
