Proverbios 31 - Quechua Margos-Yarowilca-Lauricocha Bible（qvm）

Mandaq Lemuelta maman yätsishqan

1Rey Lemueltami maman yätsir kayno nirqan:

2Wawä kaptikimi pasaypa kuyä, hïju.

Tayta Diospa bendicionninwanmi qamta tarishqä.

Tsaymi kanan yätsishayki.

3Warmikunaman umayki churakashqa ama puriytsu.

Tsayno purishqanchömi reykunapis lutan ruraykunaman churakan.

4Tsaynöpis manami alitsu kaykan reykuna y autoridäkuna upyaman churakashqan.

5Shinkakurkurqa Tayta Diospa leyninkunata qonqaykur waktsakunapa contranmi imatapis ruraykunman.

6Vïnutapis ni ima shinkatsikuqtapis ama upyaytsu.

Tsaykuna katsun lakishqa y jaqayashqa kaq runakuna upyakunanpaq.

7Waktsa kashqanta y lakikuykashqanta qonqananpaq tsaykunata upukutsun.

8Pïninpis mana kaqkunapa favornin sharkuy.

Waktsakunata pipis manakaqman churananta ama kachapaytsu.

9Waktsakunapa y humildikunapa favornin sharkur ali arreglay.

Arukuq warmita alabashqan

10Arukuq warmitaqa ¿piraq fácil tarinman?

Arukuq warmiqa ima alhäjapitapis masmi välin.

11Ali warmimanqa runan pasaypami yärakun.

Arukuq warmiwan tarqa manami muchunqatsu.

12Ali warmiqa waran waranmi runanta yanapan.

13Tsayno warmiqa milwata y lïnuta ashiykurmi kushishqa putskakun.

14Negociu puritsiq büquinömi wayincho nistashqankunataqa maytsaypitapis wayinman apamun.

15Tsaka tsakala sharkurkurmi wamrankunatapis y ashmayninkunatapis mikuyta qarapakun.

16Shumaq rikapaykurmi chakratapis rantin.

Arur shuntashqan qellaywanmi tsayman üvata plantatsin.

17Ashak ashaklami mana qelanaypa arun.

18Negociunta rantikunanpaq shumaqmi yarpachakun.

Tsakaypapis atskita ratarkatsirmi rurayninkunata rurakun.

19Kikin putskarkurmi awatapis awakun.

20Ali shonqu karmi waktsakunata yanapan y muchuycho kaykaqkunatapis mikuyta aparipan.

21Wayincho kaqkunata raktay raktaymi jatipan.

Tsaymi raju rataptinpis mana lakikuntsu.

22Kikinmi bayëtatapis awan.

Röpatapis ali alilatami jatikun.

23Runantapis marka mayinkuna respitanmi.

Tsaymi runanqa nacionnincho mandaqkunawan y mayor runakunawan juntakan.

24Negociantikunata rantikunanpaqmi röpatapis ruran y wachkutapis awan.

25Pïmaypitapis respitatsikunmi.

Wara warantin imano kawananpaqpis shumaqmi kamarikun.

26Manakaqkunataqa manami imaypis parlantsu.

Shakya shakyalami yachatsin.

27Wayicho rurayninkunata mana jamaypami ruran.

Dembaldiqa manami imatapis mikuntsu.

28Wawankunapis y runanpis alabarmi kayno nipäkun:

29<>.

30Ali chïna kashqanpis manakaqlapaqmi.

Kuyaylapaq kashqanpis ushakaqlami.

Tayta Diosta mantsakuq warmitami itsanqa alabapäkunqa.

31Arukuq kashqanpita payta alabapäkuy.

Tsaynöpis lapan rurashqanpita felicitapäkuy.