2 Corintios 7 - Quechua Margos-Yarowilca-Lauricocha Bible（qvm）

1Kuyay wawqi panikuna, Tayta Dios tsayno niykämaptintsiqa lapan jutsa rurashqantsikunata kacharishun. Jutsata rurarqa cuerpuntsitapis espïrituntsitapis qanratantsimi. Tsayno kaykaptinqa Tayta Diosta mantsakur pay munashqanno imaypis kawapäkushun.

Pablo yätsishqanta chaskikushqan

2Wawqi panikuna, yarparkalämay. Qamkunata manami mayqanikitapis sakyashqätsu ni lulapashqätsu ni engañashqätsu.

3Qamkunata tsayno niykä manami manakaqman churartsu, sinöqa nawpata nishqänöpis qamkunata kuyämi. Tsaymi imaypis mana qonqaypa qamkunapaq yarparaykä.

4Nishqäkunata chaskipäkunaykipaq kashqanta tantiyarmi qamkunaman yärakü. Tsaymi ima pasamaptinpis lakikunäpa trukan pasaypa kushikü.

5Macedonia provinciaman chayashqäpita patsa manami jamaytapis tarishqätsu. Tsaypa trukanqa runakuna conträ sharkuptin y qamkunapaq y Titupaq yarpachakurmi fiyupa lakikushqä.

6Tsayno kaykaptïpis Tito chayamuptin lakishqa kaykaqkunata shakyätsiq Tayta Dios shakyätsimashqa.

7Manami Tito chayamushqalanpitatsu kushikushqä, sinöqa qamkuna kaqpita Tito kushishqa kutimushqanpitapis kushikushqämi. Paymi wilamashqa qamkunaman watukuq shamunäta munarkaykashqaykita, jaqayätsinakushqantsipita lakikärishqaykita y noqapaq yarpachakurkaykashqaykitapis. Tsayno wilamaptin masraqmi kushikushqä.

8Apatsimushqä cartata liyir lakikärishqaykita musyarpis manami lakikütsu. Qelqamushqä höraqa pasaypami lakikurqä cartata liyir lakikärinaykipaq kashqanta yarpar.

9Kananqa pasaypami kushikü. Manami qamkunata lakikatsishqäpitatsu kushikü, sinöqa tantiyakur Tayta Diosta cäsukushqaykipitami. Cartata apatsimushqä manami manakaqlapaqtsu kashqa, sinöqa Tayta Dios munashqanno lakikärinaykipaqmi.

10Tayta Dios munashqanno lakikurqa jutsa rurayta kacharintsimi. Jutsa rurayta kachariqkunatami Tayta Dios perdonan. Tsayno perdonta tarirqa manami lakikuntsinatsu, sinöqa kushikuntsimi. Mana criyiqkunami itsanqa lakikurpis jutsa rurayta mana kacharir wanushqano karkaykan.

11Tayta Dios lakikuyman qamkunata churashushqayki alipaqmi kashqa. Tsaymi kananqa perdonta manakärimashqanki, conträ sharkuq runapaq rabyakärishqanki, Tayta Diosta cäsukurkaykanki, noqawan tinkuytana munarkaykanki, noqapaq yarpachakurkaykanki y jutsayuq runata corrigipäkushqanki. Tsayno kaptikimi tantiyakärï lapanta sitiunman churapäkushqaykita.

12Tsay apatsimushqä carta manami conträ sharkuq runata corriginalaykipaqtsu ni noqa kushikunaläpaqtsu kashqa, sinöqa tantiyatsishqäta chaskikur rasunpa kuyapäkamashqaykita Tayta Diospa nawpancho tantiyapäkunaykipaqmi.

13Kuyapäkamashqaykita musyarmi pasaypa kushikärishqä. Itsanqa masraqmi kushikärishqä Tituta ali chaskikärishqaykipita y shakyätsishqaykita kikin wilamaptin.

14Manaraq qamkuna kaqman Tito shamuptinmi payta kayno nir shakyätsirqä: <>. Tsay nishqänölami lapanpis kamakashqa. Tsaymi qamkunata imaypis rasun kaqta nishqäno qamkunapaq payta nishqäkunapis rasun kaqla kashqa.

15Kananqa Titupis qamkunapaq yarparaykan cäsukärishqaykipita y payta ali chaskikärishqaykipitami.

16Tsaynölami qamkuna yärakuypaqna kashqaykipita noqapis kushikü.