1Anyapashqanta mana chaskikuq runaqa elaqpitami ushakanqa.
2Ali runa autoridä kaptinqa runakuna kushikärinmi.
Fiyu runa autoridä kaptinmi itsanqa runakuna lakikärin.
3Tsurin tantiyakuq kaptinqa papänin kushikunmi.
Wayrapakuq warmiman aywarqa qellaynintami ushan.
4Rey ali mandaptinqa lapanpis jawkalami kawapäkun.
Imalapitapis impuestuta cobraptinqa runakuna pasaypami pobriyan.
5Amïgun lutanta ruraptin corriginanpa trukan alabarqa jutsamanmi tuniykätsin.
6Fiyu runaqa jutsata rurashqanpitami nakan.
Ali runami itsanqa imaypis kushishqa cantar kawan.
7Ali runaqa waktsakunapa favornin sharkurmi respitatsin.
Fiyu runami itsanqa makitsakushqanta rikarpis mana kuyapantsu.
8Achaquëru runaqa pïmaytapis achäquita ashiparmi purin.
Tantiyakuq runami itsanqa rabyanaykaqtapis kushitsin.
9Tantiyakuq runaqa mana tantiyakuq runawan rimanakur manami arreglayta kamäpakunqatsu.
Olqüpaptinpis y ali shimilanpa parlapaptinpis manami chaskikunqatsu.
10Wanutsikuq runaqa jutsaynaq runakunata pasaypami chikin.
Ali runami itsanqa runa mayinta kuyapan.
11Mana tantiyakuq runaqa imapitapis lutalami rabyakun.
Tantiyakuq runami itsanqa pacienciakun.
12Lulakuqkunata chaskipaq autoridäqa lapan yanapaqninkunatapis fiyu kaytami yachatsin.
13Nakaqpis y nakatsiqpis Tayta Diospitami kawayta chaskin.
14Waktsakunata kuyapaq reytaqa manami pipis mandaq kashqanpita jorqunqatsu.
15Wamraqa astaptinraqmi tantiyakuq kayta yachakun.
Awilan ashmashqa wamraqa mamanta penqaymanmi churan.
16Diosta mana cäsukuq runakuna atska kaptinqa jutsa ruraykuna maytsaychöpis kaykanmi.
Tsay runakunata desgracia pasashqantami ali runakuna rikapäkunqa.
17Tsurikita corrigirqa jawkalami kawankipaq.
Ali kawaptinqa kushikunkipaqmi.
18Diospa wilakuyninta mana cäsukurqa runakuna mana alimi kawapäkun.
Tayta Diospa leyninkunata cäsukurmi itsanqa ali kawapäkun.
19Ashmay lutanta ruraptinqa regorpa corriginki.
Ali shimilaykipa tantiyatsiptikiqa manami cäsushunkipaqtsu.
20Lutala imatapis rimaq runapitaqa mana tantiyakuq runalapis mas yärakuypaqmi kaykan.
21Ashmaynikita wamra kashqanpita shumaq mana ashmarqa wara warantinkuna waqarmi purinkipaq.
22Imalapitapis rabyaq runaqa piwanpis tinkuypami tinkun.
Achäquita ashiq runaqa imaypis jutsa ruraymanmi tunin.
23Orgullösu runataqa pïmaypis penqapanqami.
Humildi runatami itsanqa pïmaypis respitanqa.
24Suwapa cumpinchin runaqa wilakunanpaq mayjina juratsiptinpis manami wilakuntsu.
Musyaykar mana wilakushqanpitami castiganqapaq.
25Mantsa mantsala puriq runaqa mana alimanmi chayan.
Tayta Diosman yärakuqkunami itsanqa jawka kawapäkun.
26Pïmaypis munapäkun mandaqnin yanapanantami.
Tsayno kaptinpis Tayta Diosraqmi ali arreglan.
27Diosta cäsukuq runaqa jutsata ruraqkunawan manami juntakantsu.
Jutsa ruraq runaqa ali runakunata pasaypami rabyapan.
Who We AreWhat We EelieveWhat We Do
2025 by iamachristian.org,Inc All rights reserved.
