1Yachatsishqäkunata ama qonqankitsu, hïju.
Mandamientükunata mana qonqaypa yarparanki.
2Yarpararqa atska watami kushishqa kawankipaq.
3Imaypis ama qonqankitsu kuyakuq kayta y rasun kaqlata rimayta.
Mana qonqanaykipaq kunkaykiman tsaykunata walqakuy.
Imaypis yarparänaykipaq shonquykiman qelqay.
4Tsaynöpami Tayta Diospis y runakunapis ali rikashunkipaq.
5Lapan shonquykiwan Tayta Diosman yärakuy.
Yachaq kashqaykimanqa ama atiënikuytsu.
6Imata ruranaykipaqpis Tayta Dios munashqanno ruranaykipaq yarpachakuy.
Tsayno kawaptikiqa paymi yanapashunkipaq.
7Ama yachaq tukuytsu.
Tsaypa trukanqa Tayta Diosta mantsakushpayki lutankunata ama ruraytsu.
8Tsayno kawarqa manami qeshyankipaqtsu y cuerpuykipis ashaklami kanqa.
9 Tayta Diosta adorar imaykipis kashqanpita y chakraykicho punta poquqkunapita ofrendata apay.
10Tsayno aparqa wayikipis kichkishqanyaqmi mikuynikikunata shuntankipaq.
Üvata tsaytsikata shuntaptikimi puyñuykikunapita vïnupis liwanqaraq.
11 Tayta Dios corrigishuptiki ama jaqayaytsu, hïju.
Jaqayänaykipa trukanqa chaskikuy.
12Kuyashqan tsurinta papänin corrigishqannömi Tayta Diospis kuyashqan kaqtaqa corrigin.
13Kushishqami kawanqa tantiyakuq y ali yarpayniyuq runaqa.
14Tantiyakuq kashqanqa qellayyuq y qoriyuq kashqanpitapis mas alimi kaykan.
15Kuyaylapaq rumikunapitapis masmi välin.
Tantiyakuymanqa imata munashqaykipis manami tinkuntsu.
16Tantiyakuyqa alawqa kaq makinwanmi atska wata kawayta kamaripäshunki.
Itsuq kaq makinwannami rïcu kanaykipaq y pïmaypitapis ali rikashqa kanaykipaq yanapashunki.
17Tsaynöpami piwanpis mana rimanakuypa kushishqa kawankipaq.
18Tantiyakuq karqa atska watami kushishqa kawankipaq.
19 Tayta Dios tantiyakuq karmi kay patsatapis jana patsatapis kamarqan.
20Yachayninwanmi qochakuna y mayukuna kananpaq yakutapis pashtatsimurqan.
Tsaynölami tamyamunanpaq pukutaytapis kamarqan.
21Tantiyakuq kayta imaypis ama qonqaytsu, hïju.
Shumaq yarpachakurir imatapis ruranki.
22Tantiyakuq kashpaykiqa alimi kawankipaq.
Runakunapis respitashushpayki ali kashqaykitami nipäkunqapaq.
23Tantiyakuq karqa mana mantsakuypami ali kawankipaq.
Jutsa ruraymanpis manami tuninkipaqtsu.
24Tsaynöpis mana mantsakuypami ali pununkipaq.
25Fiyu runakunata elaqpita desgracia pasaptinpis qamtaqa manami pasashunkipaqtsu.
26Tsayno kawanaykipaqqa Tayta Diosmi imaypis yanapashunkipaq.
Paymi ima nakaypitapis tsapäshunkipaq.
27Yanapayta kamäpakuykarqa pishipakuqta jukla yanapanki.
28Kaykaptinqa runa mayikita ama ninkitsu: <
29Yärakuykäshuptikiqa runa mayikipa contran sharkunaykipaq ama yarpaylapis yarpaytsu.
30Achäquita mana ashipaykäshuptikiqa piwanpis ama rimanakuytsu.
31Fiyu runakuna rïcuyaptin ama chikipaytsu.
Mana alita rurapäkuptinpis qamqa ama ruraytsu.
32Fiyu runakunataqa Tayta Dios rikaytapis manami munantsu.
Ali shonqu runakunatami itsanqa kuyan.
33Lutan ruraq runakunataqa ayluntintami Tayta Dios maldicionan.
Ali shonqu runakunatami itsanqa ayluntinta bendicionninta kamaripan.
34Runa mayinta manakaqman churaqkunataqa kikintami Tayta Dios manakaqman churan.
Humildi kaqkunatami itsanqa kuyapar yanapan.
35Tantiyakuq runakunataqa pïmaypis respitanmi.
Mana tantiyakuq runakunatami itsanqa pipis mana respitantsu.
Who We AreWhat We EelieveWhat We Do
2025 by iamachristian.org,Inc All rights reserved.
