Salmo 28 - Quechua Margos-Yarowilca-Lauricocha Bible（qvm）

Salmo 28 (27)Yanapananpaq Tayta Diosta manakushqan 1a (1a) David qelqashqan salmu.

1 1 (1b) Tayta Dios, qammi pakakunä qaqa kaykanki.

Tayta, qamlatami manakamü.

Manakamushqäta mayaykalämay.

Mana mayamaptikiqa ¿imapaqnataq kawashaqpis?

2 Santu templuyki nawpanpa makïta joqarkurmi manakamü.

Manakamuptï mayaykalämay.

3Jutsa ruraq runakunata castigarpis noqata ama castigaykalämaytsu.

Paykunaqa janan shonqulami ali tukun.

Shonqunchöqa mana alikunatami yarparkaykan.

4Lutankunata rurashqanman tupu juzgaykulay.

Jutsata rurashqanman tupu castigaykulay.

5Tsay fiyu runakunaqa lapan rurashqaykikunata rikaykarpis manami cäsukärishunkitsu.

Paykunata ushakaykatsilay.

Amana kawapäkutsunnatsu.

6 Tayta Dios alabashqa kaykulätsun.

Lapan manakushqätami mayamashqa.

7 Tayta Diosmi amparakunä y escüdü kaykan.

Lapan shonqüwan yärakuptï paymi yanapaman.

Tsaymi shonqüpis kushikun.

Payta agradëcikurmi alabashaq.

8 Tayta Diosmi kuyashqan kaqkunata imaypis yanapan.

Akrashqan reytapis yanapar tsapanmi.

9Qamman yärakamuqkunata salvaykulay, Tayta.

Kuyashqaykikunaman bendicionnikita churaykulay.

Uysha mitsiqno imaypis shumaq cuidaykulay.

Imaypis marqashqala puriykatsilay.