Romanos 7 - Quechua Margos-Yarowilca-Lauricocha Bible（qvm）

Diospa leyninkunapa munayninpita yarqukushqantsi

1Wawqi panikuna, Diospa leyninkunata yachaykarqa musyapäkunkimi kawaykaqkunala leykunata cumplinanpaq kashqanta.

2Tsaynölami majayuq warmipis runan kawashqanyaqla runanpa munaynincho kaykan. Runan wanuptinqa manami munayninchönatsu kaykan.

3Runan kawaykaptin juk runawan kakurqa runantami jarukuykan. Runan wanukuptinmi itsanqa tsay leypita librina kar juk runawanpis täkunman.

4Wawqi panikuna, Jesucristo cruzcho wanushqa kaptinmi noqantsipis Diospa leyninkunapaq wanushqano kaykantsi. Tsaymi tsay leykunapa munaynincho kanantsipa trukanqa Jesucristupa munayninchöna kaykantsi. Paytami wanushqanpita Tayta Dios kawaritsimurqan pay munashqanno kawanantsipaq.

5Nawpataqa jutsa ruraypa munaynincho kawaptintsimi Tayta Diospa leyninkuna yarpayta qomarqantsi jutsata mas ruranantsipaq. Tsayno jutsata rurarmi wanushqano karqantsi.

6Kananqa tsay leykunapa munaynincho kashqantsipita yarqukurmi tsay leykunapaq wanushqanöna kaykantsi. Tsayno karqa manami tsay leykunata cumpliypatsu Tayta Diosta sirviykantsi, sinöqa Espíritu Santu yanapamaptintsimi.

Munaynincho jutsa ruray tsararämashqantsi

7Tsayno kaptinpis ama yarpäshuntsu Diospa leyninkuna mana ali kashqanta. Diospa leyninkunaqa alimi kaykan. Tsay leykunata mana yacharqa manami musyämantsu karqan jutsa ima kashqantapis.

Tsay leykunacho kaynömi niykan: <>.

Tsayno mana niptinqa manami musyämantsu karqan jukpa imantapis munapashqä jutsa kashqanta.

8Tsayno kaptinpis tsay leyta jutsa ruray manijaptinmi masraq imatapis munaparqä. Diospa leyninkunata mana musyaptïqa jutsa ruray wanushqa kar manami yarpätsimanmantsu karqan.

9Nawpataqa tsay leykunata manaraq musyar jawkami kawakurqä. Diospa leyninkunata musyaptïnami itsanqa jutsa ruray munayniyuq rikakuptin wanushqanöna karqä.

10Tsaymi Tayta Diospa leyninkunata musyarpis ali kawayman chayanäpa trukan wanuyman chayarqä.

11Tsaynöpami jutsa ruray engañamar Diospa leyninkunata manijarqan wanutsimänanpaq.

12Tsayno kaptinpis Tayta Diospa leyninkuna y mandamientunkunaqa rasunpa alimi y sagrädumi kaykan.

13Wanushqano rikakunäpaq manami Diospa leyninkunatsu jutsayuq kaykan, sinöqa jutsa ruraymi. Jutsa ruraymi Diospa leyninkunata manijar wanuyman apamarqan. Tsaynöpami tantiyä jutsa ruray pasaypa mana ali kashqanta.

14Musyantsimi Tayta Diospa leyninkuna ali kashqanta. Tsayno kaptinpis noqaqa runala karmi jutsa ruraypa munaynincho kaykä.

15Tsayno karmi imanir jutsata rurashqätapis mana tantiyätsu. Ali rurayta munarpis mana munashqä kaqtami rurä.Gál. 5.17.

16Mana munashqä kaqta rurarmi tantiyä tsay leykuna ali kashqanta.

17Jutsa rurayta mana munaptïpis shonqücho kaykaq jutsa ruraymi mana alikunata ruratsiman.

18Noqaqa alikunata rurayta munarpis manami kamäpakütsu. Tsaymi musyä shonqücho mana alikunala kashqanta.

19Tsayno karmi Tayta Dios munashqanta rurayta munaykarpis mana alikunata rurä.

20Jutsa rurayta mana munaptïpis shonqücho jutsa ruraymi jutsata ruratsiman.

21Tsaynölami imaypis pasaman. Alita rurayta munarpis mana alitami rurä.

22Shonqücho Tayta Diospa leyninkunata cäsukuyta munaptïpis

23jutsa ruraymi ali yarpaynïwan pelyaykan. Vincimar prësutano tsarirkamarmi jutsa rurayman tunitsiman.

24-25Noqaqa Tayta Diospa leyninkunata cäsukuyta munarpis jutsa ruraypa munaynilanchöraqmi kaykä. Tsayno kaykaptinqa pasaypa lakipaypaqmi kaykä. Wanushqano kaykashqäpita ¿pilaraq salvaykamanman? ¡Yusulpalä, Tayta Dios! ¡Señor Jesucristumi salvaman!