1Perfümiman chinray yaykur perditsishqannömi mana tantiyakuq runapis yachaq runa yätsishqanta perditsin.
2Tantiyakuq runaqa alitami yarpan.
Mana tantiyakuq runami itsanqa mana alita yarpan.
3Mana tantiyakuq runaqa imata rurarpis lutantami ruran.
Tsaymi pïmaypis paypaqqa upa kashqanta nipäkun.
4Rey olqüpäshuptikipis ama jaqayaytsu.
Pacienciakurqa rabyashqa kaykaqtapis pasatsinkimi.
5Kay patsacho rikashqämi reykuna lutanta rurar
6mana tantiyakuq runata mandaq kananpaq churashqanta y tantiyakuq runatana pitsapakuq kananpaq churashqanta.
7Tsaynöpis rikashqämi ashmay runakuna patronno muntashqa puriykaqta y patronkuna ashmayno chakilapa puriykaqta.
8Uchkuta uchkurqa kikinmi tsayman jeqanqa.
Perqata oqtiptinqa culebrami picanqa.
9Rumita pakirqa pakipanwanmi lawakunqa.
Yantata tseqtarqa kikinmi däñakunqa.
10Hächa laqtuyaptin mana afilarqa mas kalpawanraqmi mutuntsi.
Imatapis shumaq yarpachakurkur ruraptintsiqa mas alimi kaykan.
11Culebra mana picananpaq upatakätsiyta yachashqanpis picaptinqa manami välintsu.
12Tantiyakuq runa rimashqanqa maypis mayakuylapaqmi kaykan.
Mana tantiyakuq runa rimashqanqa ajayaypaqmi kaykan.
13Mana tantiyakuq runaqa imaypis manakaqkunalatami riman.
14Payqa manami imaypis upälakuntsu.
Wara warantinkuna ima pasananpaq kashqantapis mana musyaykarqa ¿piraq musyanman wanuptin ima pasananpaq kashqanta?
15Qela runaqa aläpa mana aruykarpis pasaypami utikan.
Tsayno karmi imata rurananpaqpis mana musyantsu.
16Kuyapaypaqmi juk nación kaykan mandaqnin rey wamrala kaptin y mandäshiqninkunapis fiestata ruralar kakuptinqa.
17Kushikuypaqmi juk nación kaykan mandaqnin rey tantiyakuq runa kaptin.
Tsaynöpis kushikuypaqmi kaykan mandäshiqninkunapis upyaman churakänanpa trukan kalpan kananpaq hörancho mikuptin.
18Qela runapaqa wayinpis jutuykälarmi ushakan.
Altsananpa trukan rikaräkuptinqa juchunmi.
19Mikuyqa saksaq mikunantsipaqmi kaykan.
Vïnuqa kushikunantsipaqmi kaykan.
Qellayqa imachöpis gastanantsipaqmi kaykan.
20Shonqulaykichöpis reypa contran ama rimaytsu.
Japalayki karpis rïcu runapa wasanta ama rimaytsu.
Rimaptikiqa yukishlapis wilaykunmanmi.
Who We AreWhat We EelieveWhat We Do
2025 by iamachristian.org,Inc All rights reserved.
