Isaías 26 - Quechua Margos-Yarowilca-Lauricocha Bible（qvm）

Yanapashqanpita Tayta Diosta alabashqan

1Tsay witsanmi Judá nacioncho kay cantata cantar nipäkunqa:

<

Tayta Dios tsapämaptintsiqa ishkay fïla murällawan tsapashqanömi kaykantsi.

2¡Ali runakuna yaykamunanpaq marka punkunta kichapäshun!

¡Tayta Dios munashqanno kawaq runakuna yaykamutsun!

3<

Qamlapaq yarparaqkunataqa mana lakikärinanpaqmi imaypis tantiyatsinki.

4¡Tayta Dioslaman imaypis yärakushun!

Payqa tsapämaqnintsi qaqami imayyaqpis kaykan.

5<

Paykuna tashqan markatapis chipyaq juchutsirmi ushakätsin.

6Ushakätsiptinmi pobrikunapis y waktsakunapis tsay runakunata asipanqa.

7Ali runakunatami itsanqa pitsashqa nänipano purinanpaq yanapan.

Alilata ruraq karmi jawka kawapäkunanpaq imaypis yanapan>>.

Tayta Dios salvananpaq shuyäkärishqan

8 Tayta Dios, mandamientuykikunata cäsukushpämi salvamänaykipaq shuyarpaykä.

Jutikita joqarirmi qamlata imaypis yarparaykä.

9Tsakaykunapapis qamlamanmi noqakuna yärakamü.

Walpa waqay hörapis lapan shonqüwanmi noqakuna manakamü.

Runakunata castigashqaykita rikarraqmi wakin runakunapis lutan ruraykunata kacharinqa.

10Fiyu runakunami itsanqa kuyapaptikipis mana ali rurayta kacharintsu.

Ali runakunapa nawpancho taykarpis mana alilatami rurarkaykan.

Munayniyuq kashqaykita mana cäsukushpanmi lutankunata rurarkaykan.

11 Tayta Dios, castiganaykipaqna kaykaptikipis tsay runakuna manami tantiyakärintsu.

¡Kuyashqayki runakunapa favornin sharkushqaykita rikar penqakäritsun!

¡Chikishuqnikikunata imaykatapis nina ushaqnöraq ushakaykatsilay!

12 Tayta Dios, jawka kawapäkunäpaq qamlami yanapamanki.

Qam kamakätsiptikimi lapan rurashqäkunapis ali kaykan.

13 Tayta Diosnilä, mandaq jäpa runakunami munaynincho tsararämashqa.

Tsayno kaptinpis qamlamanmi imaypis yärakärimü.

14Kananqa tsay mandaqkunata castigarmi ushakätsishqanki.

Paykunata wanutsirmi elqätsishqanki.

Tsay runakunaqa manami kawarimunqanatsu.

Paykunapaq manami pipis yarpanqanatsu.

15 Tayta Dios, bendicionnikiwanmi nacionnï jatunyashqa.

Lindërükunatapis mas karumanmi wititsishqanki.

Tsayno rurashqaykipitami qamta alabapäkü.

16 Tayta Dios, pasaypa nakatsimaptikimi qamta ashipäkurqä.

Castigamaptikimi manakamurqä.

17Wachay nanaywan warmi qaparashqannömi qampa nawpaykicho qaparpashqä.

18Juk lädu nación runakuna nakatsipäkamaptin manami imanöpapis salvakuyta kamäpakärishqätsu.

Manami ali kawaytapis taripäkushqätsu.

19Tsayno kaptinpis qamman yärakuqkunaqa kawarimunqami.

Pampaptinpis sharkamunqami.

¡Alpaman tikrashqa kaqkuna, sharkurkur kushishqa cantapäkuy!

Qamkunatapis ali kawanaykipaqmi Tayta Dios yanapashunkipaq.

Shulyatanömi salvacionninta kachamunqapaq.

20Marka mayikuna, wayikikunaman yaykur punkuykikunata wichqakamuy.

Tayta Diospa rabyaynin pasashqanyaq pakarpäkuy.

21Täkunanpitami Tayta Dios yarqamunqa.

Kay patsacho taqkunata jutsata rurashqanpitami castiganqa.

Runakuna pakaylapa wanutsishqantapis kay patsa manami upälakunqatsu.

Wanutsikuq kashqanpitami castigananpaq careanqa.