1¡Aleluya!
Alilata ruraq kashqanpita Tayta Diosta agradëcikäriy.
Kuyapäkuyninqa manami imaypis ushakantsu.
2Milagrukunata rurashqanpita wilakurpis ¿piraq shumaq tantiyatsinman?
Mayjina alabarpis ¿piraq shumaq alabanman?
3Kushishqami kawapäkunqa Tayta Dios munashqanno kawaqkuna.
Paykunaqa imaypis alilatami rurapäkun.
4Kuyashqayki Israel mayïkunata yanapar noqatapis yarpaykalämay, Tayta Dios.
Shamur noqatapis salvaykalämay.
5Tsaynöpami akrashqayki runakuna ali kawaykaqta rikashaq.
Paykuna kushikärishqannömi noqapis kushikushaq.
Paykuna alabashushqaykinömi noqapis alabashayki.
6Unay aylükunanölami noqakunapis jutsata rurapäkushqä.
Paykunanölami lutankunata rurapäkushqä.
7Unay aylükunaqa Egiptucho espantaypaq rurashqaykita rikaykarpis manami cäsushurqaykitsu.
Kuyapar yanapashqaykitapis manami yarpapäkurqantsu.
Tsaymi Puka Lamarman chayaykur contrayki sharkapäkurqan.
8Tsayno karkaykaptinpis kuyapäkuq kashpaykimi paykunata salvarqayki.
Tsayno salvarqayki lapanpaq munayniyuq kashqaykita tantiyakärinanpaqmi.
9Tsaymi olqüpaptiki Puka Lamar tsakirqan.
Nirkurmi tsakilapana pasatsirqayki.
10Tsaynöpami contrankunapa y chikiqninkunapa makinpita salvarqayki.
11Yaku tsapaptinmi contrankuna lapan wanur ushakarqan.
Manami juklaylapis kawaykar quëdarqantsu.
12Tsayno salvaptikimi kuyashqayki runakuna promitishqaykita criyipäkurqan.
Kushikuypita cantarmi alabapäkushurqayki.
13Tsayno kaptinpis espantaypaq rurashqaykikunata yapaymi qonqapäkurqan.
Tantiyatsishqaykitapis manami cäsukärirqantsu.
14Chunyaq jirkachömi munashqanta ruratsiyta munar tentapäkushurqayki.
15Tsayno rabyanätsishuptikipis munashqantami kamariparqayki.
Wakintami itsanqa pesti qeshyawan ushakätsirqayki.
16Campamentuchöpis Moiséspa contranmi sharkapäkurqan.
Tsaynölami akrashqayki Aarónpa contranpis sharkapäkurqan.
17Tsaymi patsa kichakar Datánta ultakurkurqan.
Tsaynölami Abiramta y qatiraqninkunatapis patsa tsaparkurqan.
18Bunyaypa bunyar nina ratarmi wakin qatiraqninkunatapis usharqan.
Tsay fiyu runakunata ninami rupar usharqan.
19Horeb jirkachönami qorita fundirkur becërruta rurapäkurqan.
Nirkurmi qonqurpakuykur tsay ïduluta adorapäkurqan.
20Lapanpaq munayniyuq kashqaykita musyaykarmi qewata mikuq töru niraqta ruraykur adorapäkurqan.
21Tsayno karmi Egiptucho espantaypaq kaqkunata rurar salvaqnin kaptikipis qonqapäkushurqayki.
22Tsayno qonqapäkushurqayki mantsariypaq kaqkunata Egiptucho ruraykaptikipis.
Tsaynöpis qonqapäkushurqayki Puka Lamarcho espantaypaq kaqkunata ruraykaptikipis.
23Tsayno kaptinmi pasaypa rabyakur paykunata chipyaq ushakätsiyta munarqayki.
Tsayno rabyaptikimi paykunapa favornin Moisés ruwakushurqayki.
Tsaymi rabyayniki pasaptin paykunata mana ushakätsirqaykitsu.
24Maypis täkuypaq nacionman pushaptikipis manami yaykuyta munapäkurqantsu.
Tsay nacionta qoykunaykipaq promitishqaykitapis manami criyipäkurqantsu.
25Nishqaykita mana cäsukurmi toldunkuna rurincho contrayki rimapäkurqan.
26Tsaymi jurar nirqayki chunyaq jirkalacho wanur ushakänanpaq kashqanta.
27Paykunapita miraqkunata jäpa nacionkunaman qarqunaykipaqmi nirqayki.
28Tsaynöpis Baal-peor ïdulutami adorapäkurqan.
Mana rasunpa kaq dioskunapaq sacrificiu rurashqankunatami mikupäkurqan.
29Tsayno lutankunata rurarmi pasaypa rabyanätsishurqayki.
Tsaymi pesti qeshyawan wakinta ushakätsirqayki.
30Tsay junaqmi cüra Finees aywar jutsayuq runata wanutsirqan.
Tsayraqmi pesti qeshya chawarqan.
31Tsayno rurashqanpitami promitirqayki paypita miraqkuna imayyaqpis cüra kananpaq.
32Meriba yaku kaqchöpis tsaynölami paykuna rabyanätsishurqayki.
Paykuna cuentami Moisésta nirqayki promitishqayki nacionman mana yaykunanpaq.
33Tsay runakuna rabyanätsiptinmi Moisés mana yarpachakuypa lutanta parlarqan.
34Promitishqayki nacionman paykuna yaykur markakunata ushakätsinanpaq niptikipis manami ushakätsirqantsu.
35Ushakätsinanpa trukanqa tsaycho taq runakunawan talukarmi mana ali costumbrinkunata yachakärirqan.
36Tsaymi tsay runakunapa ïdulunkunata adorar sirvipäkurqan.
Tsayno adorashqanpitami pasaypa desgracia pasarqan.
37 Supaykunata adorashpanmi olqu tsurintapis y warmi tsurintapis rupatsipäkurqan.
38Jutsaynaq kaykaptinmi tsayno wanutsipäkurqan.
Tsayno wanutsipäkurqan cananeo runakuna adorashqan ïdulukunapaq sacrificiuta rupatsirmi.
Tsaynöpami nacionnin maldicionashqa rikakurqan.
39Mana alikunata tsayno rurashpanmi pasaypa melanaypaq impüru rikakärirqan.
40Tsaymi kuyashqayki runakunapita pasaypa rabyakurqayki.
Paykunata rikaytapis manami munarqaykitsu.
41Contran nacionkunapa makinmanmi kachaykurqayki.
Chikiqninkunaqa munashqantami ruratsirqan.
42Makincho kaptinnami contrankunaqa penqayman churar nakatsipäkurqan.
43Kuyashqayki runakunataqa atska kutimi salvarqayki.
Tsayno salvaykaptikimi contrayki sharkapäkurqan.
Jutsata rurarmi lutan rurayman churakarqan.
44Tsayno kaykaptinpis nakashqanta rikar y manakushushqaykita mayarmi kuyaparqayki.
45Paykunawan pactu rurashqaykitami yarparqayki.
Pasaypa kuyakuq kashpaykimi manana castigarqaykinatsu.
46Tsaymi contrankuna kuyapänanpaqpis tantiyatsirqayki.
47Tayta Diosnilä, salvaykalämay.
Karu nacionkunacho mashtakashqa kaykashqäpita shuntaykalämay.
Tsaynöpami santu jutikita joqarir kushishqa alabapäkushaykipaq.
Pasaypa kushikurmi qamta alabapäkushayki.
48¡Israel runakunata kuyaq Tayta Dios imayyaqpis alabashqa kaykulätsun!
Pïmay runakunapis <<¡amén!>> niykulätsun.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
