1 1 (1b) Israel runakunataqa Tayta Dios kuyanmi.
Shonquncho imaypis alilata yarpaqkunataqa shumaqmi yanapan.
2Tsayno kaykaptinpis noqaqa ichiklapami Tayta Diospita witikushqätsu.
3Jutsa ruraq runakuna rïcuyashqanta rikarmi fiyupa rabyakurqä.
4Paykunataqa manami qeshyapis tsarintsu.
Wanuytapis manami yarpantsu.
5Wakin runakunanöqa manami nakantsu.
Manami ima desgraciapis pasantsu.
6Ali chölu tukushpanmi purirkaykan.
Runa mayinta atacananpaqpis kamarikushqami karkaykan.
7Imaykankunapis kaptinmi werayaylawan nawinpis saltananraq.
Pasaypa lutan ruraylamanmi churakashqa karkaykan.
8Pïmaytapis manakaqmanmi churapäkun.
Pitapis maqananpaq o wanutsinanpaq jurarmi puripäkun.
9Tayta Diospa contranmi rimapäkun.
Runa mayinpapis contranmi sharkapäkun.
10Tsayno kaykaptinpis paykunataqa runakuna alabapäkunmi.
Imata nishqantapis criyipäkunmi.
11Tsay fiyu runakunaqa kaynömi nirkaykan:
<<¿Imanöpataq lapanta Dios musyanqa?
¿Imanöpataq jana patsacho kaykarqa rikanman?>>
12Tsaynömi fiyu runakuna karkaykan.
Tsayno karpis paykunaqa mana nakaylapami rïcuyarkaykan.
13Noqaqa manakaqlapaqmi jutsata mana ruraypa kawaykä.
Yanqalapaqmi lutanta mana ruraypa kawaykä.
14Waran waranmi mana alikuna pasaykäman.
Cada tutami nakaykä.
15Tsayno kaptinpis tsay yarpashqäkunata manami parlakütsu.
Tsaykunata rimarqa kuyashqayki runakunata rabyanätsïmanmi karqan.
16Fiyu runakuna imanir ali kawashqanta manami tantiyayta kamäpakütsu.
17Tayta Diospa templunman aywarraqmi tantiyakurqä.
Tsaychöraqmi tsay runakuna imano ushakänanpaq kashqanta tantiyashqä.
18Paykunataqa ima desgracialapis pasanqami.
Ushakänanpaqmi Tayta Dios destinashqa.
19Paykunaqa elaqpitami asulashqa kanqapaq.
Mantsakuylawanmi ushakanqapaq.
20Runa sueñuyninta qonqashqannömi paykunapis qonqakanqa.
Tsayno kanqa castigaptikimi, Tayta Dios.
21Shonqü pasaypa rabyanaptinmi jaqayashqa karqä.
22Mana tantiyakuq upa runa karmi nawpaykicho uywano karqä.
23Tsayno kaptïpis qammi yanapamanki.
Alawqa kaq makïpitami jancharämanki.
24Yätsimarmi shumaq tantiyatsimanki.
Nirkurqa gloriamanmi pushakamankipaq.
25Jana patsachöpis qamlami salvamaqnï kaykanki.
Kay patsachöpis makikicho karmi kushishqa kawashaq.
26Kalpä ushakaptinpis y shonqü fiyupa lakikuptinpis qammi imaypis shakyätsimanki.
Kikikimi herenciä imayyaqpis kaykanki.
27Qampita witikuqkunataqa chipyaqmi ushakätsinkipaq.
Mana cäsukuqkunataqa elqätsinkipaqmi.
28Noqami itsanqa qamlaman imaypis yärakamushaq.
Qamman yärakamushqäqa lapanpitapis mas alimi kaykan.
Qammi kaykanki tsapämaqnï, Tayta Dios.
Yanapamashqaykitami pïmaytapis wilapäshaq.
Who We AreWhat We EelieveWhat We Do
2025 by iamachristian.org,Inc All rights reserved.
