Salmo 17 - Quechua Margos-Yarowilca-Lauricocha Bible（qvm）

Salmo 17 (16)Chikiqninkunapita salvananpaq manakushqan 1a (1a) Kay salmuqa Tayta Diosta David manakushqanmi kaykan.

1 1 (1b) Tayta Dios, manakushqäta mayaykalämay.

Qayakamushqäta chaskiykalämay.

Ruwakamushqäta wiyaykalämay.

Lapan shonqüwanmi qamta manakamü.

2Qam musyankimi imano kawashqätapis.

Tsaymi manakamü favornï sharkunaykipaq.

3Junaqpapis tsakaypapis shonqü imata yarpashqantapis musyaykankimi.

Jutsa rurashqäta ashirpis manami tarishqankitsu.

Manami imaypis lutankunata parlashqätsu.

4Mandamientuykikunata cäsukurmi runakuna lutankunata ruraptinpis lutankunata mana rurashqätsu.

5Tantiyatsimashqaykinömi imaypis kawashqä.

Nishqaykikunata imaypis cäsukushqämi.

6Manakamushqätaqa imaypis mayaykämankimi, Tayta.

Tsayta musyarmi qamta imaypis manakamü.

Ruwakamushqäta mayar yanapaykalämay.

7Lapan shonqunwan yärakushuqniki runataqa contrankunapita salvankimi.

Kuyamashqaykita tantiyanäpaq noqatapis salvaykalämay.

8Nawi nïñuykitano imapitapis tsapaykalämay.

Chipshanta älan rurinman walpa pakashqanno noqatapis pakaykalämay.

9Fiyu runakunapa makinpita tsapaykalämay.

Conträkuna jiruruypa tsapämaptinpis salvaykalämay.

10Conträ runakunaqa mana kuyapäkuqmi karkaykan.

Runa tukushpanmi imatapis parlarkaykan.

11Maypa aywaptïpis rikaraykämanmi.

Imatapis manakaqta jitapämänanpaqmi ashirkaykan.

12Leonno pakakuykurmi pitapis wanutsinanpaq shuyarpaykan.

13 Tayta Dios, tsay fiyu runakunata castigaykulay.

Qonqurninkunatapis tumariykatsilay.

Espädaykiwan salvaykalämay.

14Munaynikiwan tsapaykalämay.

Tsay runakunata kay patsapita elqaykatsilay.

Paykunapa herencianqa kay patsacho kaqkunalami kaykan.

Paykunaqa rïcuyarpis jina rïcuyätsun.

Wamrankunapis empachashqanyaq mikutsun.

Wilkankunapaqpis putsuy putsuy katsun.

15Noqami itsanqa nawpaykiman chayamushaq.

Qamta rikashpämi kushikushaqpaq.