1Kay qelqashqankunapis rey Salomón nishqan proverbiukunami kaykan. Kay proverbiukunatami Judá nacioncho rey Ezequíaspa yanapaqninkuna shuntaykur qelqapäkurqan.
2Runa mana tantiyashqankunataqa Tayta Diosmi musyan.
Reyqa runakuna mana tantiyaptinpis yarpachakur tantiyanmi.
3Jana patsapa altun mayyaq kashqanta,
patsapa rurin mayyaq kashqanta
y rey imata yarpashqantapis manami pipis musyantsu.
4Qellayta tsulurkatsir qanrata jorqurkurmi tsay qellaypita kuyaylapaq cöpata ruran.
5Tsaynölami fiyu runata qarqurirqa rey jawkana mandanqapaq.
6Reypa nawpancho ama yachaq tukuytsu.
Mayor runakuna jamakunanmanqa ama jamakuytsu.
7Tsaypa trukanqa paykuna jamarashqanman qayashuptikiraq yaykunki.
Mayor runakuna rikaykaptin jorqushuptiki pasaypa penqaytukushqami yarqunkipaq.
8Imatapis shumaq manaraq musyarqa autoridäkunaman ama wilaq aywaytsu.
Jukla wilaptikiqa qepaykita shamuq runa jukno niptin manami ima niytapis kamäpakunkipaqtsu.
9Contrayki sharkuq runawan rimanakurpis paqta pipis qamman yärakur wilapäshushqaykita parlaykankiman.
10Wilapaptikiqa penqaymanmi churashunkipaq.
Tsaynöpami malfämacho quëdankipaq.
11Shumaq tantiyaykur tiempulancho ali rimashqaykiqa qellaywan adornashqa qori manzänanömi kaykan.
12Tantiyakuq runapaqqa yachaq runa yätsishqan kaykan qoripita rurashqa sortëjano y qoripita rurashqa walqanömi.
13Shanaptin qasaq yakuta upur yakunaq runa kushikushqannömi kachakuq runa kushikun propiu yärakuypaq kaptin.
14Wayra puritsishqan tsaki pukutaynömi imatapis qarananpaq promitirkur mana cumpliq runa kaykan.
15Pacienciakuq runaqa rabyashqa kaykaqtapis kushitsinmi.
Shakya shakyala parlaqkunaqa contrantapis tantiyatsinmi.
16Abëjapa mishkinta tarirqa aläpa ama mikunkitsu.
Aläpa mikurqa gumitankipaqmi.
17Amïguyki kaptinpis seguïduqa ama aywapaytsu.
Cadala aywapaptikiqa ajayäshunkipaqmi.
18Garrutino, cuchilluno y flëchanömi amïgunpa contran rimaqkunaqa kaykan.
19Lakikuycho kashqayki höra traicionëru runaman ama yärakäriytsu.
Payman yärakurqa chakiki pakishqa kaykaqno y kiru nanaywan kaykaqnömi kaykanki.
20Lakishqa kaykaqta ama cantapaytsu.
Payta cantaparqa qeriman kachita winaqno y qasaycho röpanta loqtipaqnömi kaykanki.
21Chikishuqniki yarqanaptinqa mikuyta qaraykuy.
Yakunaptinqa yakuta makyaykuy.
22Tsayno rurashqaykipita Tayta Diosmi pägashunkipaq.
Chikishuqniki runami itsanqa pasaypa penqakunqapaq.
23Norti lädupita wayrämuptinqa imaypis tamyanmi.
Tsaynölami runa mayinpa contran rimaptin pipis rabyanan.
24Achäquita ashiq warmiwan kuyaylapaq wayicho tänanpa trukanqa mas alimi kaykan tsuklalachöpis jawka täkushqan.
25Pasaypa yakunaykaq runapaq yaku kushikuypaq kashqannömi karu markapita apamushqan ali wilakuypis kushikuypaq kaykan.
26Jutsaynaq runa jutsa ruraq runakunawan talukashqanqa chuya yakuman puchka yaku talukashqannömi kaykan.
27Aläpa mishkita mikuptiki däñashushqaykinömi runakuna aläpa alabashushqaykipis mana ali kaykan.
28Murällaynaq marka peligrucho kashqannömi geniunta controlakuyta mana puëdiq runapis peligrucho kaykan.
Who We AreWhat We EelieveWhat We Do
2025 by iamachristian.org,Inc All rights reserved.
