1 1 (1b) Imapitapis tsapämaq Tayta Dios alabashqa kaykulätsun.
Guërracho pelyanäpaq paymi yanapäman.
2Paymi kuyamaqnï y imapitapis tsapämaqnï.
Paymi amparakunä y salvamaqnï.
Escüduno tsapämaptinmi payman yärakü.
Lapan nacionkunata vincinäpaqpis paymi yanapaman.
3 Tayta Dios, ¿imataq runa kaykan tsayjinanpa paypaq yarpachakunaykipaq?
¿Imataq runa kaykan tsayjinanpa kuyaykunaykipaqqa?
4Runaqa jämaynölami kaykan.
Vïdanpis lantuyno pasaqlami kaykan.
5 Tayta Dios, jana patsata kicharkur uraykalämuy.
Qoshtay sharkunanyaq puntakunata yataykulay.
6Chikimaqnïkuna mantsakur qeshpikärinanpaq räyutsimur flëchaykikunawan atacaykulay.
7Yanapamänaykipaq jana patsapita patsa aywaykalämuy.
Lamar yaku pulchaqyaykaqchöno kaykaptï jorqaykalämay.
Jäpa runakunapa makinpita salvaykalämay.
8Tsay runakunaqa lulakunanpaq mamalan wachashqami karkaykan.
Alawqa kaq makinta joqarirpis lulakunmi.
9Tayta Dios, mushuq alabanzata cantarmi alabashayki.
Chunka cuerdayuq arpata tukapalanpa salmukunata cantarmi alabashayki.
10Contrankunata vincinanpaq qammi reykunata yanapaykanki.
Espädawan mana wanutsinanpaq sirvishuqniki Davidtapis qammi salvaykanki.
11Jäpa runakunapa makinpita salvaykalämay.
Tsay runakunaqa lulakunanpaq mamalan wachashqami karkaykan.
Alawqa kaq makinta joqarirpis lulakunmi.
12Tsurïkuna kuyaylapaq jatusaq yörakunanöraq ali winaykulätsun.
Warmi tsurïkunapis palaciuta adornaraq columnakunanöraq kaykulätsun.
13Wayïkunachöpis lapan mikuykuna junta kaykulätsun.
Chakräkuna junta uywäkuna waranqanpa miraykulätsun.
14Törükunapis arunäpaq sänu kaykulätsun.
Tashqä markapa murällankunapis ama juchuykutsuntsu.
Cällikunachöpis mantsakuypita pipis ama qaparätsuntsu.
15Tsayno kawapäkunäpaq yanapamaptikimi kushishqa kawapäkushaqpaq.
¡Tayta Diosman yärakuq runakuna kushishqami kawarkaykan!
Who We AreWhat We EelieveWhat We Do
2025 by iamachristian.org,Inc All rights reserved.
