Salmo 86 - Quechua Margos-Yarowilca-Lauricocha Bible（qvm）

Salmo 86 (85)Kuyapänanpaq Tayta Diosta manakushqan 1a (1a) Kay salmuqa Tayta Diosta David manakushqanmi kaykan.

1 1 (1b) Tayta Dios, ruwakamushqäta mayaykalämay.

Pasaypa lakikur ima ruraytapis manami kamäpakütsu.

2Munashqaykino kawarmi wanuypita salvaykamänaykipaq manakamü.

Sirviqniki karmi ima desgraciapitapis tsapaykamänaykipaq ruwakamü.

Diosnï kaptikimi qamman yärakamü.

3Tayta Dios, kuyapaykalämay.

Imay hörapis qamtami manakamü.

4Sirviqniki karmi valorta qoykamänaykipaq manakamü.

Qamlamanmi imay hörapis yärakamü.

5Qamqa alilata ruraqmi y perdonakuqmi kanki.

Qamman yärakamuqkunataqa kuyapankimi.

6 Tayta Dios, manakamushqäta mayaykalämay.

Ruwakamushqäta chaskiykalämay.

7Imaypis mayamashqaykita musyarmi lakikushqä höra manakamü.

8Tayta Dios, manami qamnöqa ima diospis kantsu.

Qam rurashqaykitanöqa manami pipis rurantsu.

9Qammi lapan nacionkunata kamashqanki.

Lapan nación runakunami adorashunaykipaq shapäkamunqa.

Nawpaykiman qonqurpakamurmi jutikita joqarinqa.

10Qam japalaykimi Dios kaykanki.

Munayniyuq kashpaykimi espantaypaq milagrukunata ruraykanki.

11Imano kawanäpaqpis nänikita reqiykatsilämay, Tayta Dios.

Tsay nänikipami imaypis purishaq.

Lapan shonqüwan qamta mantsakunäpaq yanapaykalämay.

12 Tayta Dios, lapan shonqüwanmi alabashayki.

Jutikita joqarirmi imaypis adorashayki.

13Noqataqa pasaypami kuyamanki.

Wanuypitapis salvamashqankimi.

14Tayta Dios, fiyu runakunami conträ sharkushpan wanutsimayta munarkaykan.

Tsay runakunaqa manakaqmanmi churaykäshunki.

15Tayta Dios, qamqa ali shonqu y kuyapäkuqmi kaykanki.

Juklaqa manami rabyakunkitsu.

Kuyapäkuq y rasun kaqlata rimaqmi kaykanki.

16Manakamushqäta wiyamashpayki kuyapaykalämay.

Sirviqniki kaykaptïqa valorta qoykalämay.

Sirvishuqniki warmipa wawan kaykaptïqa salvaykalämay.

17Conträkuna penqakärinanpaq paykunapa rikay nawin yanapaykalämay.

Tayta Dios, qamlami yanapamanki y kushikatsimanki.