1 Crónicas 9 - Quechua Margos-Yarowilca-Lauricocha Bible（qvm）

1Tsaynömi lapan Israel runakunapa jutinkuna y unay aylunkunapa jutinkunapis qelqaraykan Israel reykunapa acta libruncho.

Babiloniapita kutiqkuna Nehemías 11.1-24

Mana cäsukuq kashqanpitami Judá runakunata Babilonia soldädukuna prësu apakärinanpaq Tayta Dios kachaparirqan.

2Tsaypita atska wata pasarkuptin markanman puntata kutiqkuna karqan cürakuna, levitakuna, templucho aruqkuna y wakin Israel runakuna.

3Tsayno kutiykurmi Judá trïbupita, Benjamín trïbupita, Efraín trïbupita y Manasés trïbupita wakin runakuna Jerusaléncho tarqan.

4Judá trïbupitami aylunkunawan Jerusalénman Utai chayarqan. Utaimi karqan Amiudpa tsurin, Amiudmi karqan Omripa tsurin, Omrimi karqan Imripa tsurin y Imrimi karqan Banipa tsurin. Paykunami karqan Judápa tsurin Fares aylu.

5Tsaynöpis Judá trïbupita chayarqan Sela aylu runakuna. Tsay aylu karmi Asaías y tsurinkuna paykunawan aywarqan. Asaíasqa taytanpa qechpa tsurinmi karqan.

6Tsaynölami Zera aylu Jeuel y aylunkuna chayarqan. Tsaymi Judá trïbupita Jerusalénman chayarqan soqta pachak isqun chunka (690) runakuna.

7Benjamín trïbupitanami Salu y aylunkuna Jerusalénman chayarqan. Salúmi karqan Mesulampa tsurin, Mesulammi karqan Hodavíaspa tsurin y Hodavíasmi karqan Asenúapa tsurin.

8Tsaynöpis Ibneías, Ela y Mesulam aylunkunawan Jerusalénman chayarqan. Ibneíasmi karqan Jerohampa tsurin. Elami karqan Uzipa tsurin y Micripa wilkan. Mesulamnami karqan Sefatíaspa tsurin, Reuelpa wilkan y Ibneíaspa wilkanpa tsurin.

9Lapan tsay runakunaqa karqan aylunkunapa mandaqninmi. Paykunapa jutinkunami qelqaraykan unay runakunapa jutinkuna qelqaraykashqan librucho. Paykunawan aywaqkunami Jerusalénman chayarqan isqun pachak pitsqa chunka soqta (956) Benjamín trïbu runakuna.

10Cüra aylukunapitami Jerusalénman chayarqan Jedaías, Joiarib, Jaquín

11y templucho mandaq Azarías. Azaríasmi karqan Hilcíaspa tsurin. Hilcíasmi karqan Mesulampa tsurin, Sadocpa wilkan, Meraiotpa wilkanpa tsurin y Ahitobpa wilkanpa wilkan.

12Tsaynölami Jerusalénman chayarqan cüra Adaía y cüra Masai. Adaíami karqan Jerohampa tsurin. Jerohammi karqan Pasurpa tsurin. Pasurmi karqan Malquíaspa tsurin. Masainami karqan Adielpa tsurin. Adielmi karqan Jazerapa tsurin. Jazerami karqan Mesulampa tsurin. Mesulammi karqan Mesilemitpa tsurin. Mesilemitmi karqan Imerpa tsurin.

13Lapan tsay cürakunaqa karqan aylunkunapa mandaqninmi. Paykuna yachaq runakuna karmi templucho rurananpaq kaqkunata shumaq rurapäkurqan. Paykunawan aywaq cürakunami Jerusalénman chayarqan juk waranqa qanchis pachak soqta chunka (1,760) cürakuna.

14Levitakunapitami aylunkunawan Jerusalénman Semaías chayarqan. Semaíasmi karqan Hasubpa tsurin, Azricampa wilkan y Hasabíaspa wilkanpa tsurin. Paykuna lapan karqan Merari aylu runakunami.

15Tsaynölami Jerusalénman chayarqan Bacbacar, Heres, Galal y Matanías. Mataníasmi karqan Micaíapa tsurin, Zicripa wilkan y Asafpa wilkanpa tsurin.

16Tsaynölami Jerusalénman chayarqan Obadías y Berequías. Obadíasmi karqan Semaíaspa tsurin, Galalpa wilkan y Jedutúnpa wilkanpa tsurin. Berequíasnami karqan Asapa tsurin y Elcanapa wilkan. Netofa marka nawpanchömi Elcana tarqan.

17Tsaynölami Jerusalénman chayarqan templu punkuta täpaqkunapis. Paykunami karqan Salum, Acub, Talmón, Ahimán y wawqinkuna. Salummi karqan paykunapa mandaqnin.

18Paykunaqa kananyaqmi reypa punkunta täpapäkun. Tsay punkuqa inti jeqamunan läduchömi kaykan. Tsaynöpis tsay aylu runakunami levitakunapa campamentunman yaykunanta täpapäkuq.

19Salummi karqan Corépa tsurin. Corémi karqan unay kaq Corépa tsurin Ebiasafpita miraq. Salummi Coré aylu mayinkunawan täparqan templuman yaykuna punkuta. Tsaynölami Coré aylukuna unay täparqan Tayta Diospa campamentuncho Tinkuna Tolduman yaykuna punkuta.

20Tsay täpaqkunapa mandaqninmi karqan Eleazarpa tsurin Finees. Paytaqa Tayta Diosmi lapanchöpis yanaparqan.

21Tsaypitanami Meselemíaspa tsurin Zacarías karqan Tayta Dioswan Tinkuna Tolduman yaykuna punkuta täpaq.

22Salum mandashqan runakunaqa karqan ishkay pachak chunka ishkaymi (212). Paykunapa markankunachömi jutinkuna y aylunkunapa jutinkuna padrón librucho qelqaraykan. Paykunapa unay aylunkunata David y profëta Samuel akrarqan Dioswan Tinkuna Toldupa punkunta täpananpaqmi.

23Tsaymi paykuna y paykunapita miraq runakuna Tayta Dioswan Tinkuna Tolduman yaykuna punkucho trukanakuypa täpapäkuq.

24Tinkuna Toldupa chuskun nawpankunatami paykuna täpapäkuq. Tsaymi inti jeqamunan kaq läducho, inti jeqanan kaq läducho, norti kaq läducho y sur kaq läducho täpapäkuq.

25Trukanakuypa täpaptinmi cada qanchis junaq aylunkunana markankunapita chayaq punkuta täpapäkunanpaq.

26Täpaqkunapa chusku mandaqnin levitakunami itsanqa mana yarquypa jinalancho tarqan. Paykunami tesöru churaraq cuartukunata y templucho kaykaq wakin cuartukunatapis täpapäkuq.

27Tinkuna Tolduta täpananpaq churashqa karmi cada tsakay jiruruypa täpapäkuq. Tsaynölami cada tuta Tinkuna Toldupa punkunkunata kichapäkuq.

28Wakin täpaqkunanami Tinkuna Toldu manëjukunata täpapäkuq. Tsay manëjukunatami yuparkur jorquq y yuparkur kutitsiq.

29Wakinnami täpapäkuq Tinkuna Tolducho jatusaq manëjukunata. Tsaynöpis täpapäkuq harinata, vïnuta, aceitita, inciensuta y ali asyaq jachakunata.

30Cürakunanami ali asyaq jachakunapita perfümita rurapäkuq.

31Levita runa Matatíasmi encargädu karqan ofrendakunapaq tantata ruraq. Matatías karqan Coré aylu Salumpa qechpa tsurinmi.

32Coat aylu mayinkunanami cada jamay junaqcho Tayta Diospaq qaqaylanpa mësaman churapäkunanpaq sagrädu tantata rurapäkurqan.

33Wakin levitakunami cantaqkuna karqan. Paykunaqa aylunkunapa mandaqninkunami karqan. Cantaqkuna karmi jinan templu patiucho kaykaq cuartukunacho tarqan. Wakin aruychöqa paykuna manami aruqtsu, sinöqa paqasta junaqta cantanalanpaqmi karqan.

34Lapan tsay levitakuna Jerusalénchömi tarqan. Unay runakunapa jutinkuna qelqaraykashqan librucho nishqannölami aylunkunapa mandaqnin karqan.

Saúlpita miraqkuna 1 Crónicas 8.29-40

35Gabaón markachömi tarqan Gabaónpa taytan Jehiel. Paypa warminmi karqan Maaca.

36Qechpa tsurinmi karqan Abdón. Tsaypitanami wakin kaq tsurinkuna karqan Zur, Cis, Baal, Ner, Nadab,

37Gedor, Ahío, Zacarías y Miclot.

38Miclotpa tsurinmi karqan Simeam. Paykunaqa lapanmi Jerusaléncho tarqan.

39Nerpa tsurinmi karqan Cis. Cispa tsurinmi karqan Saúl. Saúlpa tsurinkunami karqan Jonatán, Malquisúa, Abinadab y Es-baal.

40Jonatánpa tsurinmi karqan Merib-baal. Merib-baalpa tsurinmi karqan Micaía.

41Micaíapa tsurinkunami karqan Pitón, Melec, Tarea y Acaz.

42Acazpa tsurinmi karqan Jara. Jarapa tsurinkunami karqan Alemet, Azmavet y Zimri. Zimripa tsurinmi karqan Mosa.

43Mosapa tsurinmi karqan Bina. Binapa tsurinmi karqan Refaías. Refaíaspa tsurinmi karqan Elasa. Elasapa tsurinmi karqan Azel.

44Azelpa tsurinkuna soqtami karqan. Paykuna karqan Azricam, Bocru, Ismael, Searías, Obadías y Hanán.