Salmo 20 - Quechua Margos-Yarowilca-Lauricocha Bible（qvm）

Salmo 20 (19)Reyta yanapananpaq Tayta Diosta manakushqan 1 (1) Cantaqkunapa mandaqninpaqmi. David qelqashqan salmu.

1 1 (2) Nakashqayki höra ruwakuptiki Tayta Dios yanapaykuläshunki.

Jacob yärakushqan Tayta Dios tsapaykuläshunki.

2 2 (3) Sióncho kaykaq templunpita patsa yanapaykuläshunki.

3 3 (4) Paypaq ofrendata apashqaykita yarpaykulätsun.

Sacrificiuta altarcho rupatsishqaykitapis chaskiykulätsun. Selah

4 4 (5) Shonquyki munashqanno kaykulätsun.

Imata ruranaykipaq yarpashqaykitapis kamakaykatsilätsun.

5 5 (6) Contraykikunata vincishqaykita mayar kushikushun.

Tayta Diosnintsipa jutincho bandërakunatapis kushishqa jawishun.

Manakushqaykitapis Tayta Dios chaskiykuläshunki.

6 6 (7) Noqa musyämi akrashqan reyta Tayta Dios yanapananpaq kashqanta.

Paymi santu ciëlupita patsa manakushqanta mayanqa.

Munayninwanmi contrankunata vincinanpaqpis yanapanqa.

7 7 (8) Wakinqa guërra carrëtankunamanmi yärakun.

Wakinnami cawallunkunaman yärakun.

Noqantsimi itsanqa Tayta Diosnilantsiman imaypis yärakuntsi.

8 8 (9) Cawallunkunaman yärakuqkunataqa contrankuna pasaypami ushakätsinqa.

Noqantsitami itsanqa pipis mana ichipämäshuntsu.

9 9 (10) Tayta Dios, contrankunata vincinanpaq reyta yanapaykulay.

Yanapamänaykipaq manakamuptï mayaykärilämay.