1¡Aleluya!
Lapan shonqüwanmi Tayta Diosta alabashaq.
Pay munashqanno kawaq runakunawan juntakaykurmi alabashaq.
2 Tayta Dios rurashqankunaqa espantaypaqmi kaykan.
Rurashqankunata rikarmi tantiyakuqkunaqa pasaypa kushikärin.
3Kamashqankunaqa lapanpis kuyaylapaqmi kaykan.
Payqa imaypis alilatami ruran.
4Espantaypaq rurashqankunata imaypis yarparäshun.
Tayta Diosqa ali shonqu y kuyapäkuqmi kaykan.
5Payta mantsakuqkunataqa mikuyta kamaripanmi.
Pactu rurashqantaqa imaypis yarparaykanmi.
6Juk nación runakunata qarqurirmi kuyashqan runakunata posisionta aypurqan.
Tsaynöpami munayniyuq kashqanta tantiyatsirqan.
7Tayta Dios rurashqanqa lapanpis alimi kaykan.
Paypa mandamientunkunaqa lapanpis cäsukunantsipaqmi kaykan.
8Tsaykunaqa imayyaqpis mana ushakaqmi kaykan.
Tsaynöpis alita rurar kawanantsipaqmi tantiyatsimantsi.
9Libri kananpaqmi kuyashqan runakunata Tayta Dios jorqamurqan.
Imayyaqpis yanapananpaqmi paykunawan pactuta rurarqan.
Paypa jutinqa santu y mantsakuypaqmi kaykan.
10Tantiyakuq kaytaqa qalaykuntsi Tayta Diosta mantsakurmi.
Mandamientunta cumpliqkunaqa ali yarpayniyuqmi karkaykan.
¡Payqa imayyaqpis alabashqami kanqa!
Who We AreWhat We EelieveWhat We Do
2025 by iamachristian.org,Inc All rights reserved.
