1Kay patsata fiyupa kuyutsirmi lapantapis Tayta Dios ushakätsinqa.
Runakunata wakpa kaypami qarqunqa.
2Tsay junaqqa pampa runapis, cürapis,
patronpis, olqu ashmayninpis,
patrönapis, warmi ashmayninpis,
rantiqpis, rantikuqpis,
prestaqpis, prestakuqpis,
rïcupis, waktsapis lapanmi nakapäkunqa.
3Kay patsata ushakätsirmi chunyaraykaqta kachaykunqa.
Tsayno kananpaqmi Tayta Dios nin.
4Jacha tsakir ushakaqnömi kay patsapis ushakanqa.
Jana patsapis kay patsapis fiyupami lakikärinqa.
5Tsayno kananpaqqa kay patsacho runakunami jutsayuq karkaykan.
Paykunaqa Tayta Diospa leyninkunata ni estatütunkunatapis manami cumplipäkuntsu.
Imayyaqpis cäsukunantsipaq pactutapis manami cumplipäkuntsu.
6Tsayno kaptinmi kay patsata Tayta Dios maldicionar ushakätsinqa.
Kay patsacho taqkunapis nakapäkunqami.
Walkalanami kawaykar quëdapäkunqa.
7Üva plantakunatapis ranchami ushanqa.
Vïnupis manami kanqanatsu.
Nawpata kushishqa kawaqkunapis lakishqanami kawapäkunqa.
8Panderëtatapis mananami tukapäkunqanatsu.
Fiestata manana rurapäkuptinmi kushikuypis kanqanatsu ni arpapis waqanqanatsu.
9Cantapäkushpan vïnutapis manami upupäkunqanatsu.
Ima shinkatsikuqta upuptinpis asqanqami.
10Tayta Diosta mana cäsukuq runakunapa markan juchutsishqami kanqa.
Wayinkunaman mananami pipis yaykunqanatsu.
11Vïnu manana kaptinmi cällikunacho waqapäkunqa.
Lakikuylana maytsaychöpis kaptinmi pipis mana kushikunqanatsu.
12Raqälatanami markata kachaykunqa.
Marka punkukunatapis pakirmi ushanqa.
13Walkalanami runakuna kay patsacho kanqa.
Olïvuta cosechar tapsiptin juk ishkaylana yörancho quëdashqannömi kanqa.
Üva palapa juk ishkaylana quëdashqannömi quëdanqa.
14Kawaykar quëdaq runakunaqa kushikärinqami.
Tayta Dios rurashqanta rikarmi inti jeqanan läducho taqkunapis cantapäkunqa.
15Inti jeqamunan läducho taqkunapis Tayta Diostami alabapäkunqa.
Lamar kuchuncho taqkunapis Israel runakunata kuyaq Tayta Diostami alabapäkunqa.
16Kay patsapa juk kuchunpita jukaq kuchunyaqmi alabapäkunqa.
<<¡Alilata ruraq Tayta Diosta alabashun!>> nir cantashqanmi mayakanqa.
¡Tsayno kaptinpis pasaypa lakishqami kaykä!
¡Shonqüpis nanayparaqmi lakikun!
¡Fiyu runakunaqa traicionërumi kapäkun!
¡Kuyapäkuyninpis manami kantsu!
17Kay patsacho taqkuna pasaypami mantsakärinqa.
Uchkuman y trampaman jeqashqanömi kanqa.
18Löcu tamyami fiyupa tamyamunqa.
Kay patsata tuknaraqkunapis pasaypami siksikyanqa.
Mantsakuypaq kaptinmi qeshpiq kaqqa uchkuman jeqanqa.
Uchkupita yarquq kaqnami toqlaman yaykunqa.
19Kay patsa fiyupa mantsakuypaqmi siksikyanqa.
Tsaymi maytsaychöpis rachir ushakanqa.
20Shinkashqa runa tsankapaykachaykaqnömi rikakunqa.
Tsukla ushakashqannölami ushakanqa.
Runakuna jutsata rurashqanqa kay patsata fiyupami lasaykan.
Tsaymi lasaq qepita joqariyta mana puëdiq runano kay patsapis kanqa.
21Tsay junaqmi jana patsacho kaq munayniyuqkunatapis Tayta Dios castiganqa.
Kay patsacho kaq reykunatapis castiganqami.
22Lapanta shuntarkurmi pözuman winaqno prësu wichqarätsinqa.
Tsaycho atska wata wichqararkatsirmi fiyupa castiganqa.
23Lapanta mandaq Tayta Dios Sión jirkanpita mandamuptinmi killapis penqakunqa.
Intipis manami atsikyanqanatsu.
Jerusaléncho chipchipyaykaqta y munayniyuq kashqantaqa mayor runakunapis rikanqami.
Who We AreWhat We EelieveWhat We Do
2025 by iamachristian.org,Inc All rights reserved.
