Nehemías 3 - Quechua Margos-Yarowilca-Lauricocha Bible（qvm）

Jerusalén murällata altsayta qalaykärishqan

1Tsaypitanami mandaq cüra Eliasib cüra mayinkunawan juntakaykur altsapäkurqan Uysha jutiyuq punkuta. Marcunkunata churarkurmi punkukunata tanapäkurqan. Murällata altsapäkurqan Pachak jutiyuq törripita hasta Hananeel törriyaqmi.

2Tsaypita sïguiq murällatami altsapäkurqan Jericó marka runakuna.

Tsaypita kaqtanami altsarqan Imripa tsurin Zacur.

3Senaapita miraq runakunanami Pescädu jutiyuq punkutana altsapäkurqan. Marcunkunata churarkurmi punkukunata tanapäkurqan. Nirkurmi churapäkurqan cerröjunkunata y trancakunata.

4Pescädu jutiyuq punkupitanami altsarqan Meremot. Pay karqan Uríaspa tsurin y Cospa wilkanmi.

Tsaypita kaqtanami altsarqan Mesulam. Pay karqan Berequíaspa tsurin y Mesezabeelpa wilkanmi.

Tsaypita pasaraq murällatanami altsarqan Baanapa tsurin Sadoc.

5Tsaypita kaqtanami altsapäkurqan Tecoa marka runakuna. Itsanqa respitädu mayor Tecoa runakuna manami yanapayta munarqantsu.

6Jesaná punkutanami altsapäkurqan Paseahpa tsurin Joiada y Besodíaspa tsurin Mesulam. Marcunkunata churarkatsirmi punkukunata tanatsirqan. Tanarkatsirmi cerröjunkunata y trancankunata churarqan.

7Tsaypita pasaraq murällatanami altsapäkurqan Gabaón runa Melatías y Meronot runa Jadón. Paykunawanmi arupäkurqan Gabaón runakuna y Mizpa runakuna. Gabaón y Mizpa markakunaqa karqan Éufrates mayu kay tsimpan provinciapa gobernadornin mandashqanchömi.

8Tsaypita pasaraq murällatanami altsarqan Harhaíapa tsurin Uziel. Pay karqan qellay fundiqmi.

Tsaypita pasaraq murällatanami altsarqan Hananías. Payqa karqan perfümi ruraqmi. Tsaynöpami Jerusalén murällata altsapäkurqan hasta Anchu Perqa nishqanyaq.

9Tsaypita pasaraq murällatanami altsarqan Hurpa tsurin Refaías. Payqa karqan pulan Jerusalén distrïtupa gobernadorninmi.

10Tsaypita pasaraq murällatami altsarqan Harumafpa tsurin Jedaías. Altsashqan murällaqa wayin nawpanchömi karqan.

Tsaypita pasaraq murällatanami altsarqan Hasabníaspa tsurin Hatús.

11Tsaypita pasaraq murällatami altsarqan Harimpa tsurin Malquías y Pahat-moabpa tsurin Hasubna. Paykunami altsarqan Horno jutiyuq törritapis.

12Tsaypita pasaraq murällatami altsarqan Halohespa tsurin Salum. Salumqa karqan pulan Jerusalén distrïtupa gobernadorninmi. Payqa warmi tsurinkunawanmi murällata altsapäkurqan.

13Raqra jutiyuq punkutanami altsapäkurqan Zanoa runakuna y Hanún runakuna. Punkukunata tanarkurmi cerröjunkunata y trancakunata churapäkurqan. Nirkurmi murällata perqapäkurqan chusku pachak pitsqa chunka (450) metru larguta hasta Muka Jitakuna jutiyuq punkuyaq.

14Recabpa tsurin Malquíasnami Muka Jitakuna jutiyuq punkuta altsarqan. Malquíasqa Bet-haquerem distrïtupa gobernadorninmi karqan. Punkukunata tanarkatsirmi cerröjunkunata y trancakunata churarqan.

15Colhozipa tsurin Salumnami Pukyu jutiyuq punkuta altsarqan. Salumqa Mizpa distrïtupa gobernadorninmi karqan. Punkunkunata tanarkatsirmi cerröjunkunata y trancakunata churarqan. Nirkurmi tsay punku jananpa qatarqan. Tsaynölami altsarqan reypa huertan nawpancho kaykaq Siloé estanqui lädunpa pasaq murällatapis. Tsay murällata altsarqan Davidpa Markan nishqan partipita urämuna grädayaqmi.

16Tsaypita pasaraq murällatami altsarqan Azbucpa tsurin Nehemías. Payqa pulan Bet-sur distrïtupa gobernadorninmi karqan. Pay altsarqan hasta David aylu kaqkuna pamparaykashqan panteón frentinyaqmi. Tsaychömi yaku shuntakuna pözu y soldädukunapa cuartilninpis kaykan.

Jerusalén murällata levitakuna altsashqan

17Tsaypitanami levitakuna murällata altsapäkurqan. Tsay levitakuna kaykunami karqan:

Banipa tsurin Rehum,

Hasabías (Payqa Rehum altsashqanpita pasaraq murällata altsarqan. Hasabíasqa pulan Keila distrïtupa gobernadornin karmi tsay distrïtu runakunapa jutincho altsarqan);

18Henadadpa tsurin Bavai (Payqa Hasabías altsashqanpita pasaraq murällata altsarqan. Bavaiqa karqan pulan kaq Keila distrïtupa gobernadorninmi);

19Jesúapa tsurin Ezer (Payqa Bavai altsashqanpita pasaraq murällata altsarqan. Ezerqa karqan Mizpa markapa gobernadorninmi. Paymi altsarqan guërra armakuna churaränan wayiman witsänan frentinpa. Tsaychömi murällapa esquïnan kaykan);

20Zabaipa tsurin Baruc (Payqa Ezer altsashqanpita pasaraq murällata kushishqa altsarqan. Tsay karqan esquïnapita hasta mandaq cüra Eliasibpa wayin punkuyaq);

21y Uríaspa tsurin Meremot (Payqa Baruc altsashqanpita pasaraq murällata altsarqan Eliasibpa wayin punkunpita hasta wayin esquïnayaq. Meremotqa karqan Cospa wilkanmi).

Jerusalén murällata cürakuna altsashqan

22Tsaypita pasaraq murällatana Jerusalén nawpankunacho taq cürakuna altsapäkurqan. Tsay cürakuna kaykunami karqan:

23Benjamín y Hasub (Paykunaqa wayin nawpanpa pasaq murällata altsarqan);

Maasíaspa tsurin Azarías (Pay karqan Ananíaspa wilkanmi. Payqa altsarqan kikinpa wayin nawpanpami);

24Henadadpa tsurin Binúi (Payqa altsarqan Azaríaspa wayinpita hasta murälla esquïnanyaqmi);

25Uzaipa tsurin Palal (Payqa altsarqan esquïnapita patsa. Tsaynöpis altsarqan mandaq reypa wayincho kaykaq jatun törrita. Tsay törriqa kaykarqan cárcel punku cercanchömi);

Faruspa tsurin Pedaías

26y Ofel barriucho taq runakuna (Paykunami murällata altsapäkurqan hasta Yaku jutiyuq punku frentinyaq. Tsay punkuqa inti jeqamun kaq läduchömi karqan. Tsaynöpis altsapäkurqan tsaycho kaykaq jatun törrita. Tsay altsaq runakunaqa templucho aruq runakunami karqan).

Jerusalén murällata wakin runakuna altsashqan

27Tsaypita pasaraq murällatami Tecoa runakunana altsapäkurqan jatun törri frentinpita hasta Ofel murälla tinkuqyaq.

28Cawallukuna jutiyuq punkupita qalaykurnami cürakuna cada ünun wayin nawpankunapa kaq murällata altsapäkurqan.

29Tsaypita pasaraqtanami Imerpa tsurin Sadoc altsarqan. Pay altsashqanqa karqan wayin nawpanchömi.

Tsaypita pasaraq murällatanami altsarqan Secaníaspa tsurin Semaías. Payqa karqan inti jeqamunan kaq lädupa templu punku täpaqmi.

30Tsaypita pasaraq kaqtanami altsapäkurqan Selemíaspa tsurin Hananías y Hanún. Hanúnqa karqan Salafpa soqta kaq tsurinmi.

Tsaypita pasaraq kaqtanami Berequíaspa tsurin Mesulam altsarqan. Pay altsashqanqa karqan wayin nawpanchömi.

31Tsaypita pasaraq murällatanami qellay fundiq Malquías altsarqan hasta templucho aruqkunapa y negociantikunapa wayin kaykashqanyaq. Tsay wayi kaykarqan Juntakänan jutiyuq punku nawpanchömi. Tsaynöpis karqan rikachakuna wayi kashqan esquïnachömi.

32Tsaypita pasaraq murällatanami altsapäkurqan qellay fundiqkuna y negociantikuna hasta Uyshakuna jutiyuq punkuyaq.