Josué 21 - Quechua Margos-Yarowilca-Lauricocha Bible（qvm）

Leví trïbu runakuna chaskishqan markakuna maycho kashqanpis 1 Crónicas 6.54-81

1Tsaypitanami Leví trïbupa mandaqninkuna Canaáncho kaykaq Silo markaman aywapäkurqan cüra Eleazarwan, Josuéwan y Israel runakunapa wakin autoridäninkunawan parlapäkunanpaq.

2Chayaykurmi kayno nipäkurqan: < Moisésta nirqan markakunata y jalqakunata rakipämänaykipaq. Tsaynöpami kanqa tänäpaqpis y uywäkunata ashmakärinäpaqpis>>.

3Tsayno niptinmi Tayta Dios nishqannöla Israel runakuna rakiparqan markakunata y jalqakunatapis.

4Puntata suertita jitapäkurqan cüra Aarónpita miraqkuna markakunata chaskipäkunanpaq. Aarónpita miraq Coat aylu wakin runakunami chaskipäkurqan chunka kimsa markakunata. Tsay markakunaqa karqan Judá trïbu, Simeón trïbu y Benjamín trïbu chaskishqan posisionkunachömi.

5Coat aylu wakin runakunanami chaskipäkurqan chunka markakunata. Tsay markakunaqa karqan Efraín trïbu, Dan trïbu y pulan Manasés trïbu chaskishqan posisionkunachömi.

6Tsaypitami suertita jitapäkurqan Gersón aylu runakuna markakunata chaskipäkunanpaq. Paykunami chaskipäkurqan chunka kimsa markakunata. Tsay markakunaqa karqan Isacar trïbu, Aser trïbu, Neftalí trïbu y Basáncho kaq pulan Manasés trïbu chaskishqan posisionkunachömi.

7Merari aylu runakunami chaskipäkurqan chunka ishkay markakunata. Tsay markakunaqa karqan Rubén trïbu, Gad trïbu y Zabulón trïbu chaskishqan posisionkunachömi.

8Tsaymi Moisésta Tayta Dios nishqannöla Israel runakunaqa suertita jitaypa Leví trïbu runakunata rakiparqan markakunata y cercancho kaykaq jalqakunata uywankunata mitsikunanpaq.

9-10Leví trïbu Coat aylu runakunapaq puntata suerti yarqamuptinmi Judá trïbu runakunapa y Simeón trïbu runakunapa posisionninpita markakunata rakiparqan.

11Tsaymi paykunata rakiparqan Judá trïbu runakuna tashqan jalqakunacho kaq Quiriat-arbata y nawpancho kaykaq jalqakunata uywankunata mitsikunanpaq. Quiriat-arbapa jukaq jutinqa Hebrónmi kaykan. Quiriat-arbachömi anaceo runakuna tarqan.

12Quiriat-arbapita mas washa läducho kaykaq jalqakunata y caseriunkunatami itsanqa Jefonipa tsurin Calebta Josué entregarqan posisionnin kananpaq.

13Cüra Aarónpita miraq runakuna chaskishqan Hebrón markaqa karqan runa mayinta mana yarpaypa wanutsiq runakuna amparakunanpaqmi. Tsaynöpis chaskipäkurqan Libnata,

14Jatirta, Estemoata,

15Holónta, Debirta,

16Aínta, Jutata y Bet-semesta. Tsaymi Judá trïbupita y Simeón trïbupita isqun markakunata chaskipäkurqan. Cada markapami mitsikärinanpaq jalqankuna karqan.

17Benjamín trïbupitami chaskipäkurqan Gabaónta, Gebata,

18Anatotta y Almónta. Tsaymi Benjamín trïbupita chusku markakunata chaskipäkurqan. Cada markapami mitsikärinanpaq jalqankuna karqan.

19Tsaynöpami Aarónpita miraq cürakuna chunka kimsa markakunata y jalqakunata chaskipäkurqan.

20Coat aylu wakin Leví trïbu runakunanami Efraín trïbu chaskishqan posision kaqcho markankunata chaskipäkurqan.

21Paykunami chaskipäkurqan Efraín jalqakunacho kaykaq Siquemta. Siquemqa runa mayinta mana yarpaypa wanutsiq runakuna amparakunanpaq markami karqan. Tsaynöpis Gezerta,

22Kibsaimta y Bet-horónta chaskipäkurqan. Tsay chusku markakunapami mitsikärinanpaq jalqankuna karqan.

23Dan trïbupitami chaskipäkurqan Eltequita, Gibetónta,

24Ajalónta y Gat-rimónta. Tsay chusku markakunapami mitsikärinanpaq jalqankuna karqan.

25Pulan Manasés trïbupitami chaskipäkurqan Taanacta y Gat-rimónta. Tsay ishkay markakunapami mitsikärinanpaq jalqankuna karqan.

26Tsaynöpami Coat aylu wakin Leví trïbu runakuna chunka markakunata y jalqakunata chaskipäkurqan.

27Gersón aylu Leví trïbu runakuna pulan Manasés trïbupitami chaskipäkurqan Basáncho kaykaq Golánta y Beesterata. Golánqa runa mayinta mana yarpaypa wanutsiq runakuna amparakunanpaq markami karqan. Tsay ishkay markakunapami mitsikärinanpaq jalqankuna karqan.

28Isacar trïbupitami chaskipäkurqan Cisónta, Daberatta,

29Jarmutta y En-ganimta. Tsay chusku markakunapami mitsikärinanpaq jalqankuna karqan.

30Aser trïbupitami chaskipäkurqan Misaelta, Abdónta,

31Helcatta y Rehobta. Tsay chusku markakunapami mitsikärinanpaq jalqankuna karqan.

32Neftalí trïbupitami chaskipäkurqan Galileacho kaykaq Cedesta, Hamot-dorta y Cartánta. Cedesqa runa mayinta mana yarpaypa wanutsiq runakuna amparakunanpaq markami karqan. Tsay kimsa markakunapami mitsikärinanpaq jalqankuna karqan.

33Tsaynöpami Gersón aylu Leví trïbu runakuna chunka kimsa markakunata y jalqakunata chaskipäkurqan.

34Leví trïbu runakunapa ultimu aylun Merari aylumi karqan. Merari aylu runakuna Zabulón trïbupitami markankunata chaskipäkurqan Jocneamta, Cartata,

35Dimnata y Naalalta. Tsay chusku markakunapami mitsikärinanpaq jalqankuna karqan.

36Rubén trïbupitami chaskipäkurqan Beserta, Jahazata,

37Cademotta y Mefaatta. Tsay chusku markakunapami mitsikärinanpaq jalqankuna karqan.

38Gad trïbupitami chaskipäkurqan Galaadcho kaykaq Ramotta. Ramotqa runa mayinta mana yarpaypa wanutsiq runakuna amparakunanpaq markami karqan. Tsaynöpis chaskipäkurqan Mahanaimta,

39Hesbónta y Jazerta. Tsay chusku markakunapami mitsikärinanpaq jalqankuna karqan.

40Tsaynöpami Merari aylu Leví trïbu runakuna chunka ishkay markakunata chaskipäkurqan.

41Israel runakunapa posisionnincho Leví trïbu runakuna chaskishqan markakuna chusku chunka pusaqmi (48) karqan.

42Tsay markakunapa cercancho kaq jalqankunatapis chaskipäkurqan.

Tayta Dios promitishqanta cumplishqan

43Tsaynömi Israel runakunata posisionta Tayta Dios qoykurqan unay aylunkunata promitishqanno. Tsawraqa Israel runakuna yaykur tsaychöna tarqan.

44Tayta Dios yanapaptinmi contran runakuna imanöpapis ichipayta mana kamäpakurqantsu. Tsaynöpami Abrahamta, Isaacta y Jacobta Tayta Dios unay promitishqanno Israel runakunaqa jawkalana täkärirqan.

45Israel runakunata promitishqantaqa lapantami mana qonqaypa Tayta Dios cumplirqan.