1 1 (1b) Tayta Dios, imano kashqätapis musyankimi.
2Musyankimi imay jamashqäta y imay sharkushqätapis.
Karupitami yarpashqäkunatapis musyaykanki.
3Tutala sharkushqäpita tsakay punushqäyaqmi imata rurashqäkunatapis musyaykanki.
Maypa aywaptïpis rikaykämankimi.
4 Tayta Dios, manaraq rimaptïmi imata ninäpaq kashqantapis musyanki.
5Maycho kaptïpis rikaykämankimi.
Maki paltaykiwanmi tsapaykämanki.
6Tsayno kashqaykiqa pasaypa kushikuypaqmi kaykan.
Manami imano tantiyaytapis atipätsu.
7Espïrituyki rikaykämaptinqa ¿maylamanraq pakaküman?
Nawpaykipita ¿maylamanraq qeshpïman?
8Qoylarkuna kaqman aywaptïpis tsaychömi kaykanki.
Patsa ruriman pakakuptïpis tsaychömi kaykanki.
9Inti yarqamunan lädupa pärir aywakuptïpis y lamarpa jukaq kuchuncho taptïpis
10qamqa nawpächömi kaykanki.
Maycho kaykaptïpis alawqa kaq makikiwanmi jancharaykämanki.
11Mayjina tsakayman pakakurpis
12qampita manami pakakuyta kamäpakütsu.
Tsakaypapis junaqpanölami qam rikaykanki.
Paqaspis junaqpis qampaqqa iwal-lami kaykan.
13Qammi mamäpa pachancho lapan cuerpüta kamamashqanki.
14Kushikuypaq kamamashqaykikunata rikarmi qamta alabä.
Rurashqaykikunaqa pasaypa kushikuypaqmi kaykan.
Tsayno kashqanta lapan shonqüwanmi criyï.
15Mamäpa pachancho kaykaptï pipis manami rikamashqatsu.
Tulükuna yurishqanta qamlami rikashqanki.
Patsa rurinchönöpis mana rikakaylami kamamashqanki.
16Tsayraq rurakaykaptïpis rikamashqankimi.
Manaraqpis juk junaqniyuq kaykaptïmi ayka wata kawanäpaq kashqantapis libruykiman mayna qelqarqayki.
17Tayta Dios, noqapaq yarpashqaykikunaqa pasaypa kushikuypaqmi kaykan.
Tsay yarpashqaykikunaqa tsaytsikami kaykan.
18Yupayta munaptïpis aquyshapitapis mas atskami kaykan.
Punushqäpita rikcharkurpis qamwanmi imaypis kaykä.
19Tayta Dios, fiyu runakunata lapanta ushakaykatsilay.
Wanutsikuq runakunata nawpäpita qarquykulay.
20Paykunaqa contraykimi rimarkaykan.
Jutikitapis lutalami joqarirkaykan.
21 Tayta Dios, qamqa musyankimi chikishuqnikikunata rikaytapis mana munashqäta.
Mana cäsukushuqnikikunata fiyupami rabyapä.
22Paykunata pasaypami chikï.
Paykunaqa noqapapis conträmi kaykan.
23Tayta Dios, imano kawashqätapis rikaykalämay.
Shonqü alita o mana alita yarpashqantapis musyaykulay.
24Yarpashqäpis, parlashqäpis o rurashqäpis mana ali kaptinqa tantiyaykatsilämay.
Qamwan imayyaqpis kawanäpaq yachaykatsilämay.
Who We AreWhat We EelieveWhat We Do
2025 by iamachristian.org,Inc All rights reserved.
