1Nishqäkunata shumaq wiyakuy, hïju.
Mandamientükunata imaypis yarparay.
2Tantiyakuq kanaykipaq wiyakuy.
Yachaq kanaykipaq yarpachakuy.
3Cäsukuq kanaykipaq lapan shonquykiwan manakuy.
4Qellayta y qorita ashishqaykino tantiyakuq kayta ashiy.
5Tsaynöpami Tayta Diosta reqir payta mantsakunaykipaq tantiyakunki.
6Tantiyakuq kanaykipaqqa Tayta Diosmi yachayta qoshunki.
Paypitaraqmi tantiyaytapis y yachaytapis chaskinki.
7Pay munashqanno kawaqkunataqa imapitapis tsapanmi.
Alita rurar kawaqkunataqa yanapanmi.
8Payta cäsukuqkunataqa imaypis cuidanmi.
Paylaman yärakuqkunataqa imaypis rikanmi.
9Tsaynöpami ali kaqta y mana ali kaqtapis tantiyankipaq.
Tsaynöpis alcäbumi kankipaq ali kaqkunata ruranaykipaq.
10Tantiyakuq y yarpayniyuq karmi kushishqa kawankipaq.
11Yarpayniyuq karqa manami lutankunata rurankipaqtsu.
Tantiyakuq kashqaykimi mana alikunapita tsapäshunkipaq.
12Tantiyakuq karqa manami jutsata rurankipaqtsu ni engañakuq runakunapis criyitsishunkipaqtsu.
13Tsay runakunaqa alita rurananpa trukan mana ali ruraykunalamanmi jatikashqa karkaykan.
14Jutsata rurarpis pasaypami kushikärin.
Mana alita rurarkurpis taqlapänakunmi.
15Imaypis lutanta rurarmi puripäkun.
Alita rurananpa trukanqa manakaqkunata rurarmi kawapäkun.
16Tantiyakuq karqa runanta jarukuq warmipitapis witikunkipaqmi.
Kirunta rikatsiparraq parlapäshuptikipis manami cäsupankipaqtsu.
17Tsay niraq warmiqa jipashlanpita tashqan runantapis kachariykurmi munashqanno kawakun.
Tsayno karmi runanta imaypis respitananpaq Tayta Diosta promitishqantapis qonqaykun.
18Tsay niraq warmiwan jatikarqa wanuytami tarinkipaq.
19Tsay warmiwan kakuqkunaqa ali kawayta imaypis manami tarinqatsu.
20Tayta Dios munashqanno kawaq runakunata rikakushpayki paykunano kaway, hïju.
21Jutsata mana ruraq runakunaqa Tayta Dios rikatsishqan nacioncho atska watami jawka kawanqapaq.
22Fiyu runakuna y Diosta promitirkur mana cumpliqkunami itsanqa elaqpita wanunqa.
Who We AreWhat We EelieveWhat We Do
2025 by iamachristian.org,Inc All rights reserved.
