1Mandayta qalaykushqan witsan Jotamqa ishkay chunka pitsqa (25) watayuqmi kaykarqan. Payqa chunka soqta watami Jerusalénpita mandarqan. Mamanmi karqan Sadocpa tsurin Jerusa.
2Jotamqa papänin Uzíasnömi Tayta Dios munashqanno kawarqan. Tayta Diospa templunmanmi itsanqa papäninno mana yaykurqantsu. Tayta Dios munashqanno Jotam kawaptinpis mandashqan nacioncho taq runakunaqa jutsa ruralarmi kawapäkurqan.
3Jotammi Tayta Diospa templun jana waqtan murällapa punkunta tanatsirqan. Tsaynölami Ofel jirkancho perqatapis altsatsirqan.
4Judá nación jalqakunachöpis markakunatami sharkatsirqan. Muntikunachöpis pakakuna wayikunata y törrikunatami ruratsirqan.
5Tsaynöpis amonita runakunapa mandaqnin reytami soldädunkunawan Jotam vincirqan. Vincirkurmi amonita runakunata kimsa watayaq impuestuta pägatsirqan. Tsaymi cada wata pägapäkurqan kimsa waranqa kimsa pachak (3,300) kïlu qellayta, chunka waranqa (10,000) säcu trïguta y chunka waranqa säcu cebädata.
6Tayta Dios munashqanno kawarmi Jotamqa munayniyuq rikakurqan.
7Jotam imata rurashqankuna y soldädunkunawan yarqur guërrata rurashqankunapis lapanmi qelqaraykan Judá nacionpa y Israel nacionpa mandaqnin reykunapa acta libruncho.
8Mandayta qalaykushqan witsan Jotamqa ishkay chunka pitsqa (25) watayuqmi kaykarqan. Payqa chunka soqta watami Jerusalénpita mandarqan.
9Jotam wanuykuptinmi Davidpa Markanman pampapäkurqan. Paypa trukannami tsurin Acazna rey karqan.
Who We AreWhat We EelieveWhat We Do
2025 by iamachristian.org,Inc All rights reserved.
