1¡Wawalaw, Egiptuman ruwakuq aywaqkuna!
Qamkunaqa Egipto runakunapa cawallunkunaman,
atska carrëtankunaman
y cawallu muntaq soldädunkunamanmi yärakurkaykanki.
Israel runakunapa santu Diosninmanqa manami yärakärinkitsu.
Tayta Diostaqa manami tapukuylapis tapukärinkitsu.
2Egipto runakuna yachaq kashqanman yärakäriptikipis Tayta Diosqa mas yachaqmi kaykan.
Payqa runakunata imanöpa castigaytapis yachanmi.
Nishqantaqa imaypis cumplinmi.
Fiyu runakunata y cumpinchinkunatapis castiganqami.
3Egipto runakunaqa manami diostsu kaykan, sinöqa runalami.
Cawallunkunapis manami munayniyuq angiltsu kaykan, sinöqa uywalami.
Tsaymi Tayta Dios castigaptin Egipto runakuna y paykunata minkakuqkunapis mana awantanqatsu.
Paykunaqa lapanmi ushakanqa.
4 Tayta Dios kaynömi nimarqan: <
5Wawanta pishqu tsapaqnömi noqapis Jerusalénta tsapashaq. Imapis mana pasananpaqmi shumaq rikashaq. Ima mana alipitapis salvashaqmi>>.
6Israel runakuna, Tayta Diosta aläpanami rabyanätsishqanki.
Tsayno kashqaykipita tantiyakur munaynincho yapay kawapäkuy.
7Payta rabyanätsirmi qoripita y qellaypita ïdulukunata rurapäkushqanki.
Diospa makincho kawarnami itsanqa tsaykunata jitarinkipaq.
8Asiria runakunataqa Tayta Dios manami runakunapa espädanwantsu wanutsinqa, sinöqa kikinpa espädanwanmi.
Espädapita mözukuna qeshpiptinpis taripaykurmi ashmayninpaq apakärinqa.
9Fiyupa mantsakurmi mandaqnin reypis qeshpikunqapaq.
Capitanninkunapis bandërankunata kachariykurmi mantsakashqa aywakärinqapaq.
Tsayno kananpaq kashqantami Tayta Dios nin.
Contrankunata ushakätsinanpaqmi Sión jirkancho ninata rataykätsin.
Jerusalénchömi hornuntapis wariykätsin.
Who We AreWhat We EelieveWhat We Do
2025 by iamachristian.org,Inc All rights reserved.
