Proverbios 19 - Quechua Margos-Yarowilca-Lauricocha Bible（qvm）

1Tumpakuq y mana tantiyakuq runapitaqa mas ali kaykan waktsala karpis respitashqa kashqanmi.

2Mana yarpachakuypa imatapis ruraptikiqa mana alimi yarqapäshunki.

Imatapis apurädu rurarqa mana alitami ruraykanki.

3Mana tantiyakuq runaqa imatapis lutantami ruran.

Nirkurmi Tayta Diosta jitapan.

4Rïcu runaqa atska amïguyuqmi kaykan.

Waktsa runapitaqa amïgunpis witikunmi.

5Rantiy testïgutaqa castiganqami.

Lulakuq runaqa manami castïgupita qeshpinqatsu.

6Yanapakuq runataqa pïmaypis manakunmi.

Paywanqa pïmaypis amïgu kaytami munan.

7Waktsa runata wawqinkuna ajayaykaptinqa rasuntachari amïgunkunapis mana cäsuntsu.

Parlarkunalanpaqpis manami amïgunpis kantsu.

8Yachakushqanno kawaq runaqa kushishqami kawan.

Tsay runapaqqa bendicionmi kanqa.

9Rantiy testïguqa castigashqami kanqa.

Lulakuq runataqa wanuyninmi apanqa.

10Mana tantiyakuq runa imaykayuqpis rikakushqanqa penqaypaqmi kaykan.

Tsaynöpis penqaypaqmi kaykan ashmaykuna mayor runakunapa mandaqnin kaptin.

11Tantiyakuq runaqa imapitapis manami rabyakuntsu.

Achäquita ashipar qayapaptinpis manami mayaq tukuntsu.

12León qaparashqan mantsakuypaq kashqannömi rey rabyakushqanqa mantsakuypaq kaykan.

Kuyapäkuyninmi itsanqa qewakuna janancho shulyano kushikuypaq kaykan.

13Mana tantiyakuq mözuqa taytanta lakikatsinmi.

Runanta achäquita ashipaq warmiqa jutuq wayinömi kaykan.

14Runaqa papäninpitami wayita y ima herenciatapis chaskin.

Ali yarpayniyuq warmitaqa Tayta Diosmi kamaripan.

15Qela runaqa mana ajayaypami punukun.

Tsayno karmi muchuylacho kawanqa.

16Tayta Diospa mandamientunkunata cäsukuq runaqa alimi kawanqa.

Tayta Dios nishqanta mana cäsukuq runami itsanqa wanunqa.

17Waktsakunata yanaparqa Tayta Diosta prestaqnölami qoykun.

Tsayno yanapaqtaqa Tayta Diosmi kutitsin.

18Wamra kashqanyaqla tsurikita shumaq corriginki.

Mana corrigishqaykipita lutanta rurar wanuptinqa qammi jutsayuq kankipaq.

19Aläpa rabyakuq runaqa castigashqami kanqa.

Mana castigaptinqa mas peormi mana alikunata ruranqa.

20Anyapäshushqaykita chaskikuy.

Corrigishuptiki cäsukuy.

Chaskikurqa tantiyakuqmi kankipaq.

21Ali kawayta munarmi runaqa tukuyta yarpachakun.

Tsayno kaptinpis Tayta Dios kamakätsiptinraqmi yarpashqan kamakan.

22Promitishqanta cumpliq runataqa pïmaypis yärakunmi.

Lulakunanpa trukanqa mas alimi kaykan waktsala karpis rasun kaqta rimashqan.

23 Tayta Diosta mantsakuq runaqa alimi kawan.

Tsay runaqa jawka kawarmi ima problëmamanpis mana jatikantsu.

24Qela runaqa plätun sirvishqa kaykaptinpis mikunalanpaqpis qelami kaykan.

25Mana tantiyakuq runaqa shimisapa runata castigashqanta rikakurraqmi tantiyakun.

Tantiyakuq runami itsanqa yätsiptilan tantiyakun.

26Taytanta suwapaq runapaqa manami penqakuyninpis kantsu.

Mamanta wayinpita qarquq runaqa manami yawarninpis kantsu.

27Anyapäshushqaykita mana chaskikurqa mana tantiyakuq runami kanki, hïju.

28Rantiy testïguqa jueztapis mana mantsakuypami lulapan.

Fiyu runaqa shimin tarishqantami imaykatapis riman.

29Shimisapa runataqa wiruypami castigapäkun.

Mana cäsukuq runataqa astaypami castigapäkun.