Salmo 105 - Quechua Margos-Yarowilca-Lauricocha Bible（qvm）

Salmo 105 (104)Kuyashqan runakunata Tayta Dios ali rikashqan 1 Crónicas 16.8-22

1¡Tayta Diosta agradëcikäriy!

¡Paypa jutinta joqaripäkuy!

Lapan rurashqanta maytsay nacionchöpis wilakäriy.

2Salmukunata cantar alabapäkuy.

Mantsariypaq rurashqankunata wilakäriy.

3 Tayta Diosta ashiqkuna, lapan shonquykiwan payta alabapäkuy.

Japalan santu Dios kashqanpita kushikäriy.

4Munayniyuq Tayta Diosta imaypis ashipäkuy.

Yanapashunaykipaq payta imaypis manakäriy.

5Mantsariypaq rurashqan milagrukunata yarpapäkuy.

Contrantsikunata imano vincishqanta ama qonqapäkuytsu.

6Tayta Diosta sirviq Abrahampita miraqkuna, tsaykunata yarpapäkuy.

Akrashqan Jacobpita miraqkuna, lapan rurashqankunata ama qonqapäkuytsu.

7Paymi noqantsipa Tayta Diosnintsi kaykan.

Intëru kay patsachömi munashqanta ruran.

8 Pactu rurashqanta manami imaypis qonqantsu.

Waranqa (1,000) generación pasaptinpis yarparaykanmi.

9Tsay pactuta Abrahamwanmi rurarqan.

Jurashpanmi Isaactapis promitirqan.

10Imaypis cumplinanpaqmi Jacobta y paypita miraq Israel runakunatapis promitirqan.

11Promitishpanmi kayno nirqan:

< qoykushayki qamkunapa herenciayki kananpaq>>.

12Tsay witsanqa Israel runakuna walkaqlaraqmi karqan.

Jäpa nacioncho yupashqalami tarqan.

13Paykunaqa nacionnin nacionnin y markan markanmi purikärirqan.

14Tsayno kaptinpis Tayta Dios manami kachaparqantsu pipis nakatsinanta.

Tsaymi reykunatapis castigar kayno nirqan:

15<

Profëtäkunamanpis ¡ojaläraq pilapis makinta churaykunman!>>

16Tayta Diosmi paykuna tashqan nacioncho muchuy kananpaq kamakätsirqan.

Tsaymi mikunanpaq imapis mana karqantsu.

17Itsanqa paykunapa puntantami Egiptuman Joséta kacharqan muchuypita salvananpaq.

Tsayman chayarqan ashmay kananpaq wawqinkuna rantikuptinmi.

18Egipto runakuna Josépa chakinta cadinawanmi watarätsirqan.

Kunkapitami fiërru cadinawan shequrätsirqan.

19Tsaychömi wichqararqan sueñushqankuna cumplinanyaq.

Tsaynöpami rasun kaqta sueñushqanta Tayta Dios runakunata tantiyatsirqan.

20Tsaypitanami tsay nacionpa mandaqnin reyqa carcilpita jorqutsirqan.

21Jorqurkurmi palaciunta y lapan imaykantapis shumaq rikananpaq churarqan.

22Tsaynöpis churarqan mandäshiqninkunata y mayor runakunata shumaq yätsinanpaqmi.

23Tsaypitanami Israel runakuna Egiptuman aywakärirqan.

Tsaynöpami Cam particho tsurinkunawan Jacob tarqan.

24Tayta Diospa bendicionninwanmi atskaqman mirapäkurqan.

Egipto runakunapitapis mas atskaqmi karqan.

25Tsaymi Egipto runakunata Tayta Dios yarpayta qorqan Israel runakunapa contran sharkunanpaq.

Tsaynöpami Tayta Diosta sirviq runakunata nakatsipäkurqan.

26Tsaypitami Tayta Dios kacharqan sirviqnin Moisésta y akrashqan Aarónta.

27Paykunami Tayta Diospa munayninwan Cam particho espantaypaq kaqkunata rurapäkurqan.

28Tsaymi tsay nacioncho yanawyayparaq tsakätsirqan.

Tsayno kaptinpis Egipto runakunaqa Moisés nishqanta manami cäsukärirqantsu.

29Yawarmanmi mayukunatapis Tayta Dios tikratsirqan.

Pescädukunapis lapanmi wanur ushakarqan.

30Intëru nacionman ratsakkunami juntarqan.

Mandaq reypa palaciunmanpis juntarqanmi.

31Tayta Dios mandaptinmi upuqruykunapis y chuspikunapis intëru Egiptuman juntarqan.

32Tamyapa trukanmi runtu tamyata tamyatsimurqan.

Räyutami pashtatsimurqan intëru tsay nacionman.

33Tsay runtu tamyami üva yörakunatapis hïgus yörakunatapis tululantana kachaykurqan.

Egiptucho lapan yörakunatami rapraynaqlatana kachaykurqan.

34Tayta Dios mandaptinmi tukuy casta chukluskunapis tsayman juntarqan.

Yupaytapis mana atipaypaqmi tsaytsika karqan.

35Tsaykunami lapan qewakunatapis usharqan.

Chakracho mikuynintapis chipyaqmi usharqan.

36Egipto runakunapa lapan qechpa tsurinkunatapis Tayta Diosmi wanutsirqan.

37Atska qoriyuqta y atska qellayniyuqtami kuyashqan runakunata jorqamurqan.

Yarqamuptin manami pipis tsapata churaparqantsu.

38Egipto runakuna pasaypa mantsakashqa karkaykashqanchömi aywakäriptinqa kushikärirqanna.

39Israel runakunata lantupänanpaqmi pukutayta Tayta Dios kamariparqan.

Tsakaypa atskipänanpaqnami rataykaq ninata kamariparqan.

40Aytsata manakuptinnami codornizkunata yuritsirqan.

Saksaqpaq mikupäkunanpaqmi jana patsapita mikuytapis kamaripämurqan.

41Upupäkunanpaq yakutapis qaqapitami pashtatsimurqan.

Tsaymi chunyaq tsaki jirkapa tsaytsika yaku aywarqan.

42Tsaynömi sirviqnin Abrahamta promitishqanta cumplir Israel runakunata Tayta Dios yanaparqan.

43Egiptupitami kuyashqan runakunata jorqamurqan.

Jorqamuptinmi pasaypa kushishqa yarqapäkamurqan.

44Paykuna tänanpaqmi jäpa runakunapa markankunata Tayta Dios rikatsirqan.

Jäpa runakunapa imaykantapis paykunatami qoykurqan.

45Tsayno qoykurqan estatütunkunata y leyninkunata cäsukärinanpaqmi.

¡Aleluya!