1Kikilanpaq imatapis munaq runaqa wakinpaqqa manami yarpachakuntsu.
Pï yätsiptinpis manami chaskikuntsu.
2Mana tantiyakuq runaqa yachakuyta manami munantsu.
Tsaypa trukanqa ichik yachashqalantami sumätsikun.
3Fiyu runaqa jamurpashqami kanqa.
Runa tukuqqa manakaqman churashqami kanqa.
4Tantiyakuq runa rimashqanqa mana tsakiq pukyunömi kaykan.
Tsaymi yachatsishqanqa maypis mayakuypaq kaykan.
5Manami alitsu kaykan jutsayuq runapa favornin sharkur jutsaynaq runata tumpashqan.
6Mana tantiyakuq runaqa lutalami piwanpis rimanakun.
Shimilanpitami pipis maqanqa.
7Mana tantiyakuq runataqa shimilanmi condenan.
Paytaqa shimilanpitami wanutsinqa.
8Tulu shimi wilapashqanqa mishkinöraqmi runata gustaykun.
Tsaymi mayaqkunapa shonqunyaq chayaykun.
9Qela runa y fiyu runaqa tsay wawqinölami karkaykan.
10 Tayta Diosqa ali sharkatsishqa törrinömi kaykan.
Paymanmi jutsaynaq runakuna amparakun.
11Rïcu runaqa riquëzankunaman yärakurmi yarpan murallashqa markano següru kashqanta.
Tsaymi imapis mana pasananpaq kashqanta yarpan.
12Runa tukuq runaqa pasaypami nakanqa.
Mana runa tukuqtami itsanqa pïmaypis respitan.
13Rimayta manaraq ushaptin contestaq runaqa mana tantiyakuq karmi penqaypaq kaykan.
14Qeshyarpis aliyayta yarparqa aliyanqami.
Aliyayta mana yarparqa ¿imanöparaq aliyanman?
15Yachaq runaqa masmi yachaq kayta munan.
Tantiyakuq runaqa masmi yachakun.
16Ima regälulanwanpis chayaqkunataqa pïmaypis kushishqami chaskikun.
Regäluta aparqa munayniyuq runamanpis yaykurinmi.
17Puntata quejakuq chayaq kaqmi autoridäta criyitsin.
Contrapartin chayaykur declaraptinraqmi musyakan mayqanpis jutsayuq kashqan.
18Suertita jitarqa demandukuna sasa arreglay kaptinpis juklami arreglapäkun.
Munayniyuq runakunapis suerti yarqamushqantami rurapäkun.
19Markapa murällan sasa juchutsiy kashqanpitapis mas sasami kaykan wawqinwan rimanakushqa runata amistatsiyqa.
Tsay runaqa barrëtawan trancashqa punkunömi kaykan.
20Shimilanpitami runaqa chikishqa o kuyashqapis kaykan.
21Wanuytapis kawaytapis shimilanpitami tarin.
Aläpa parlaq runaqa chikipashqami kanqa.
22Warmiyuq runaqa kushishqami kawan.
Ali warmita tarishqanqa Tayta Diospa bendicionninmi kaykan.
23Waktsa runaqa imalapaqpis ruwakunmi.
Rïcu runami itsanqa pitapis olqüpan.
24Wakin amïguykikunaqa ishkay cärami karkaykan.
Wakinkunami itsanqa wawqikipitapis mas yärakuypaq karkaykan.
Who We AreWhat We EelieveWhat We Do
2025 by iamachristian.org,Inc All rights reserved.
