Salmo 109 - Quechua Margos-Yarowilca-Lauricocha Bible（qvm）

Salmo 109 (108)Chikiqninkunata juzgananpaq Tayta Diosta manakushqan 1 (1) Cantaqkunapa mandaqninpaqmi. David qelqashqan salmu.

1 1 (1b) Tayta Dios, qamtami alabaykä.

Manakamushqäta mayaykalämay.

2Lula runakunami y fiyu runakunami wasäta rimarkaykan.

Manakaqkunatami jitapaykäman.

3Toscu shimipami imatapis nipäkaman.

Achäquita mana ashipaykaptïpis conträmi sharkapäkun.

4Kuyaykaptïpis chikipäkaman.

Tsaymi qamta imaypis manakamü.

5Yanapaykaptïpis conträmi sharkushqa.

Kuyaykaptïpis chikirkaykäman.

6Chikimaqnïta juzgananpaq mana ali runata churaykulay.

Kikinpa abogädulan tikrapätsun.

7Demandakuptinpis kikin jutsayuq kashqanta nitsun.

Shimilan kikinta condenatsun.

8Manaraqpis aykäta wanutsun.

Pay rurananpaq kaqta jukna ruratsun.

9Tsurinkunapis waktsa quëdatsun.

Warminpis viüda quëdatsun.

10Tsurinkuna caridäta manakur puritsun.

Juchutsishqa wayinkunapita mikuyta ashinanpaq karupa aywapäkutsun.

11Prestaqkuna imaykantapis prenda apakäritsun.

Nakar arushqantapis jäpa runakuna qechurir apakäritsun.

12Paytapis y waktsa quëdaq tsurinkunatapis pipis ama kuyapätsuntsu.

13Paypita miraqkunapis lapan ushakätsun.

Tsay apellïduqa elqätsunna.

14Taytan mana alita rurashqanta Tayta Dios ama perdonatsuntsu.

Maman jutsata rurashqantapis ama perdonatsuntsu.

15Jutsa rurapäkushqanta Tayta Dios imaypis ama qonqatsuntsu.

Kay patsachöqa jutintapis runakuna amana yarpätsuntsu.

16Tsay runaqa manami kuyapäkuytapis yachashqatsu.

Pobrikunata, humildikunata y lakikuycho kawaqkunatapis wanutsinanyaqmi qatikachashqa.

17Maldicionakuq kashqanpita kikinman maldición chayatsun.

Runa mayinpaq bendición kananta mana munashqanpita kikinpaqpis bendición ama katsuntsu.

18Lapan rurashqanpis maldicionashqa katsun.

Maldicionqa pachanmanpis yakuno yaykutsun.

Tulunmanpis aceitino chayatsun.

19Maldicionashqa imaypis kawatsun.

Aläpa chanaq watashqa wachkuno imaypis nakatsitsun.

20Chikimaqnïkunata y wasä rimaqkunata Tayta Dios tsayno castigatsun.

21 Tayta Dios, kuyakuq kashqaykita pïmaypis tantiyananpaq yanapaykalämay.

Kuyapäkuq kashpayki salvaykalämay.

22Noqaqa lakishqa karmi ima ruraytapis mana kamäpakütsu.

Shonqüpis lakikuypitami fiyupa nanaykan.

23Lantuy elqakaqnömi fuerzäpis ushakaykan.

Chuklusta wayra apashqannömi kaykä.

24Mana mikuptïmi qonqurnïpis siksikyaykan.

Custilläkunapis yupariylapaqmi kaykan.

25Pïmaypis asipämanmi.

Rikäramar kushipämashpanmi umantapis awikärin.

26 Tayta Diosnilä, yanapaykalämay.

Kuyapäkuq kashpayki salvaykalämay.

27Pïmaypis tantiyakutsun kikiki salvamashqaykita.

28Runakuna maldicionamaptinpis bendicionnikita noqaman churaykalämuy.

Chikimaqnï runakuna pasaypa penqakäritsun.

Noqaqa sirvishuqniki karmi pasaypa kushikushaqpaq.

29Chikimaqnïkunataqa pïmaypis penqapätsun.

Pasaypa penqakuptin cäranpis yanayätsunraq y pukayätsunraq.

30 Tayta Dios, qamtami imaypis agradëcikushayki.

Atska runakunawan juntakaykurmi alabashayki.

31Qammi waktsakunapa favornin kaykanki.

Contrankunapitapis qammi salvanki.