1 Reyes 10 - Quechua Margos-Yarowilca-Lauricocha Bible（qvm）

Sabá nacionpa mandaqnin warmi Salomónta tapunanpaq aywashqan 2 Crónicas 9.1-12

1 Tayta Dios yanapaptin Salomón shumaq yachaq kashqanta mayarmi Sabá nacionpa mandaqnin warmi aywarqan pasaypa sasa tapukuykunata tapunanpaq.

2Atska ashmaynin runakunawanmi Jerusalénman chayarqan ali asyaq jachakunata, atska qorita y kuyaylapaq chanin rumikunata camëllukunawan cargashqa. Salomónman chayaykurmi lapan yarpashqankunata tapurqan.

3Tapuylantami Salomónqa lapanta contestarqan. Ima tapushqanpis paypaqqa manami sasatsu karqan.

4Salomón yachaq kashqanta y palaciunta ruratsishqanta rikarmi Sabá nacionpa mandaqnin warmi

5pasaypa mantsakashqa rikakurqan. Tsaynöpis mantsakashqa rikakurqan ali mikuykunata rikar, mandäshiqninkunapa cuartunkunata rikar, ashmayninkunata y jatirashqan röpanta rikar, cöpa sirviqninkunata rikar y Tayta Diospaq sacrificiukunata templucho rupatsishqanta rikar.

6Tsaymi rey Salomónta kayno nirqan: <

7Tsayno wilamaptinpis kikï rikanäyaq manami criyirqätsu. Kananmi itsanqa tantiyakü wilapämashqanpitapis mas yachaq y mas rïcu kashqaykita.

8Shumaq tantiyakuykur parlashqaykita mayar ¡ima kushishqaraq mandäshishuqnikikuna y sirvishuqnikikuna karkaykan!

9¡Tayta Diosniki alabashqa kaykulätsun kuyashushpayki Israel nacionpa mandaqnin rey kanaykipaq churashushqaykipita! Israel runakunata imaypis kuyashpanmi rïcutapis waktsatapis ali rikanaykipaq churashushqanki>>.

10Nirkurnami Salomónta qaraykurqan kimsa waranqa isqun pachak soqta chunka (3,960) kïlu qorita, atska perfümikunata y kuyaylapaq chanin cuestaq atska rumikunatapis. Salomónta qarashqan perfümikunatanöqa manami imaypis tsaytsika perfümita Israel nacionman apapäkamurqantsu.

11(Tsaynölami rey Hirampa negociunta apaq büquikunawan Ofir partipita apapäkamurqan atska qorita, sándalo jutiyuq ali qerukunata y kuyaylapaq chanin cuestaq rumikunatapis.

12Tsay sándalo qerupitami rey Salomón ruratsirqan Tayta Diospa templunpa balconninkunata y palaciupa balconninkunata. Tsaynöpis tukaqkuna tukananpaq ruratsirqan arpakunata y salteriukunata. Manami imaypis Judáman chayatsipäkurqantsu sándalo qeruta tsayno atskataqa.)

13Sabá nacionpa mandaqnin warmitami rey Salomón atska qaraykunata qararqan. Tsay jananmanmi tsay warmi imata manakushqantapis qararqan. Tsaypitanami mandaq warmiqa nacionninman ashmayninkunawan kutikurqan.

Salomón rïcuyashqan 2 Crónicas 9.13-24

14Cada watami qorita Salomón chaskiq ishkay chunka ishkay waranqa (22,000) kïluta.

15Tsay jananmanmi negociantikuna, Arabia nacionpa mandaqnin reykuna y Israel nacionpa gobernadorninkuna pägapäkushqan impuestutapis chaskiq.

16Ishkay pachak (200) escüdukunatami rey Salomón qoripita ruratsirqan martilluwan takaylapa. Tsay escüdukuna cada ünun soqta kïlumi lasarqan.

17Tsaynölami mas kimsa pachak (300) escüdukunata qoripita ruratsirqan martilluwan takaylapa. Tsay escüdukunaqa cada ünun juk kïlu pulanmi lasarqan. Tsaykunataqa Líbano Munti jutiyuq palaciunmanmi churatsirqan.

18Tsaynölami trönuntapis marfilpita ruraykatsir qori püruwan enchapatsirqan.

19Tsay trönumi karqan soqta grädayuq, waqtanpa redondu y ishkan lädupa rikra tuknaräkunayuq. Trönupa cada lädunchömi ruratsishqan juk león ichiraykarqan.

20Grädakunapa nawpankunachöpis karqan chunka ishkay ruratsishqan leonkunami. Grädakunapa jukaq kuchuncho karqan soqta leonkuna y jukaq kuchunchönami karqan soqta leonkuna. Manami mayqan nacionpa mandaqnin reypis tsay trönutanöqa kuyaylapaqta ruratsirqantsu.

21Rey Salomónpa cöpankunapis y Líbano Munti jutiyuq palaciucho kaykaq lapan manëjukunapis karqan qorilapitami. Tsay palaciuchöqa manami imapis karqantsu yoraq qellaypitaqa. Qellaypita kaqtaqa Salomón rey kashqan witsan manami pipis cäsupaqtsu.

22Rey Salomónpa büquinkuna cada kimsa watacho rey Hirampa büquinkunawan juntu Tarsisman kutimur apamuq qorita, yoraq qellayta, marfilta, mönukunata y pävu realkunatapis.

23Rey Salomónqa maytsay nación reykunapitapis mas rïcu y mas yachaqmi karqan.

24Yachaq kananpaq Tayta Dios yanapaptinmi lapan nacionpitapis payman aywapäkurqan yachatsishqanta mayananpaq.

25Aywarmi yoraq qellaypita y qoripita ruratsishqankunata Salomónpaq apapäkuq. Tsaynöpis apapäkuq röpakunata, armakunata, ali asyaq jachakunata, cawallukunata y mulakunatapis. Cada watami imaykatapis atskata Salomón chaskiq.

Cawallukunata y carrëtakunata Salomón rantishqan 2 Crónicas 1.14-17; 9.25-28

26Salomón rantirqan tsaytsika carrëtakunata y cawallukunatami. Tsaynöpami paypa karqan juk waranqa chusku pachak (1,400) carrëtankuna chunka ishkay waranqa (12,000) cawallunkuna.1Rey. 4.26. Tsay cawallukunatami wakinta churarqan guërra carrëtakuna kaykashqan cuartilkunacho kananpaq y wakintana churarqan Jerusalén palaciun cercacho kananpaq.

27Rey Salomón shuntatsishqan yoraq qellaypis shalanöraqmi Jerusaléncho tsaytsika karqan.Deut. 17.17. Tsaynölami cedru yöratapis Sefelacho plantatsirqan hïgus yöranöraq tsaytsika kananpaq.

28Salomón kachashqan negociantikunami Egiptupita y Ciliciapita cawallukunata rantimuq.Deut. 17.16.

29Egiptupita rantimushqan juk carrëtami cuestaq soqta pachak (600) yoraq qellay y juk cawallunami cuestaq pachak pitsqa chunka (150) yoraq qellay. Tsay cawallukunata y carrëtakunatami wakintaqa rantikuq heteo runakunapa mandaqnin reykunata y wakintana rantikuq Siria runakunapa mandaqnin reykunata.