Salmo 92 - Quechua Margos-Yarowilca-Lauricocha Bible（qvm）

Salmo 92 (91)Kuyakuq kashqanpita Tayta Diosta alabashqan 1 (1) Kay salmuqa jamay junaqcho cantanapaq alabanzami kaykan.

1 1 (2) Tayta Dios, qamta agradëcikushqäqa shumaq alimi.

Poderniyuq Tayta Dios, qamta alabar pasaypami kushikü.

2 2 (3) Tutapami kuyapäkuq kashqaykipita alabashayki.

Tsakaypanami promitishqaykita cumpliq kashqaykipita adorashayki.

3 3 (4) Chunka cuerdayuq taksha arpawan, jatun arpawan y salteriuwanmi alabashayki.

4 4 (5) Tayta Dios, lapan rurashqaykikunata rikarmi kushikü.

Tsaymi shonqüpis pasaypa kushikun.

5 5 (6) Tayta Dios, rurashqaykikunaqa espantaypaqmi kaykan.

Yarpashqaykikunataqa ¿piraq musyanman?

6 6 (7) Lutan ruraq runakunaqa tsaykunata manami tantiyakuntsu.

7 7 (8) Wara warantinkuna ushakänalanpaqmi fiyu runakuna y mana cäsushuqniki runakuna mana ali qewano mirarkaykan.

8 8 (9) Tayta Dios, qammi itsanqa imayyaqpis rey kaykanki.

9 9 (10) Qampa contraykikunaqa lapanmi ushakanqa.

Mana ali runakunaqa maytsaypapis aywakärinqa.

10 10 (11) Törupa kalpanno kalpäpis kananpaqmi kalpatapis qomanki.

Yanapamaptikimi pasaypa kushikü.

11 11 (12) Rikashaqraqmi conträkuna ushakashqanta.

Chikimaqnïkuna nakar waqashqantapis mayashaqraqmi.

12 12 (13) Ali runakunaqa palmëra yöranöraqmi atska wata kawanqapaq.

Líbanucho cedru yöranöraqmi kanqapaq.

13 13 (14) Tayta Diospa wayinchömi imaypis paykuna karkaykan.

Templu patiucho kuyaylapaq waytakunanömi karkaykan.

14 14 (15) Awkinyarpis mözunömi karkaykan.

Imaypis mana qeshyaypami ali kalpayuq karkaykan.

15 15 (16) Tsaychömi Tayta Dios tsapämaqnintsi kashqanta wilakärin.

Ali runakunapa favornin imaypis sharkushqantami wilakärin.