1Pësu pishiykaqta rantikuptinqa Tayta Dios rabyakunmi.
Pësu complëtuta rantikuptinmi itsanqa kushikun.
2Runa tukuqkunaqa mana ali rikashqami kaykan.
Humildi runaqa shumaqmi tantiyakun.
3Ali runaqa Diosta cäsukurmi kawan.
Fiyu runami itsanqa jutsata rurashqanpita ushakan.
4Tayta Dios juzganan junaqqa rïcu kashqanpis manami välinqatsu.
Alita ruraq runaqa salvakunqapaqmi.
5Ali runaqa aläpa manami nakanqatsu.
Fiyu runami itsanqa lutanta rurashqanpita nakanqa.
6Ali runapaqa manami pipis contran sharkuntsu.
Ambiciösu fiyu runapaqmi itsanqa pïmaypis contran sharkun.
7Fiyu runaqa imaykayuqpis kananpaq yarpachakuykashqalanchömi ushakanqa.
8Ali runataqa ima nakaypitapis Tayta Dios salvanmi.
Fiyu runatami itsanqa nakananpaq kachariykun.
9Fiyu runaqa nanaq shiminpa rimarmi runa mayinta jaqayätsin.
Ali runami itsanqa tantiyakuq kashpan ali kawapäkunanpaq yätsin.
10Ali runapa imaykanpis kaptinqa marka mayinkuna kushikärinmi.
Tsaynölami kushikärin fiyu runa wanuptinpis.
11Ali runa bendicionta qoptinqa marka mayinkuna alimi kawan.
Fiyu runa shimita jatipaptinmi itsanqa rimanakur qarqunakun.
12Mana tantiyakuq runaqa runa mayintapis manakaqmanmi churan.
Tantiyakuq runami itsanqa upälakun.
13Tulu shimiqa imata mayashqalantapis wilapakurmi purin.
Yärakuypaq kaq runami itsanqa imata wilapaptinpis upälakun.
14Nación mandaq mana ali mandaptinqa pasaypami nakapäkun.
Yätsikuqkuna atska kaptinqa mandaqpis alimi mandan.
15Mana reqishqa runata garantizarqa jaqami rikakun.
Pitapis mana garantizarqa jawkami kawakun.
16Ali shonqu warmitaqa pïmaypis alimi rikan.
Arukuq runaqa rïcuyanmi.
17Kuyapäkuq runaqa kikinpis kushishqami kawan.
Mana kuyapäkuq runami itsanqa lakishqa kawan.
18Fiyu runa gänashqanqa yakunölami ushakan.
Ali runa gänashqanmi itsanqa mana ushakantsu.
19Ali runaqa jawkami kawan.
Fiyu runaqa manaraqpis aykätami ushakan.
20Mana ali yarpayniyuq runataqa Tayta Dios manami rikaytapis munantsu.
Ali ruraq runata rikarmi itsanqa kushikun.
21Fiyu runaqa imaylapis castigashqami kanqa.
Ali ruraq runami itsanqa salvashqa kanqa.
22Mana tantiyakuq warmiqa kuyaylapaq karpis
kuchipa senqancho jatiraykaq qori sortëjanömi kaykan.
23Ali runa yarpashqanqa lapanpis alimi kamakan.
Fiyu runa yarpashqanmi itsanqa pïmaytapis rabyanätsin.
24Runa mayinta imalawanpis yanapaqkunaqa mastami tarin.
Mana yanapakuqkunami itsanqa muchuyman chayan.
25Runa mayinta imalawanpis yanapaqkunaqa bendiciontami chaskipäkun.
Yanapakuq kashqanpita kikintapis yanapanqami.
26Trïgun kaykaptin rantikuyta mana munaqtaqa pïmaypis maldicionanmi.
Rantikuptinmi itsanqa agradëcikärin.
27Alita ruraq runaqa ali rikashqami kanqa.
Mana alita ruraq runami itsanqa chikipashqa kanqa.
28Rïcu kashqanman yärakuq runaqa tsakishqa rapranömi ushakanqa.
Ali runami itsanqa yöra tsintsiqno ali kawanqa.
29Mana tantiyakuq runa aylunkunata inkaraptinmi jaqayar aywakärin.
Tsaymi kikilan rikakur tantiyakuq runapa ashmaynin rikakun.
30Ali runaqa ali wayuq yöranömi kaykan.
Paytaqa pïmaypis respitanmi.
31Tayta Diosta cäsukuq runaqa alita rurashqanpitami premiuta kay patsacho chaskin.
Tayta Diosta mana cäsukuq runami itsanqa jutsata rurashqanpita castigashqa kanqa.
Who We AreWhat We EelieveWhat We Do
2025 by iamachristian.org,Inc All rights reserved.
