1Ali shonquyuqkuna, Tayta Diosta alabapäkuy.
Payta alabashqaykiqa kushikuypaqmi kaykan.
2Chunka cuerdayuq arpata tukapaylapa Tayta Diosta alabapäkuy.
Salteriuta tukapaylapa alabapäkuy.
3Mushuq alabanzawan alabapäkuy.
Arpata shumaq tukar kushishqa cantapäkuy.
4 Tayta Diosqa rasun kaqlatami lapanta parlan.
Rurashqankunata rikarmi tantiyakuntsi promitishqanta cumpliq kashqanta.
5Pay munashqanno kawaqkunataqa Tayta Dios kuyanmi.
Kuyapäkuq karmi maytsaychöpis runakunata yanapaykan.
6 Tayta Dios niptilanmi jana patsapis rurakarqan.
Mandaptilanmi intipis, killapis y qoylarkunapis yurirqan.
7Lamartapis juk patsalamanmi shuntarqan.
Wanwanyaykaq uchkukunamanmi winarqan.
8Maytsaychöpis taqkuna, Tayta Diosta mantsakäriy.
Intëru munducho taq runakuna, payta adorapäkuy.
9Pay niptilanmi kay patsapis y jana patsapis rurakarqan.
Mandaptilanmi lapanpis rikakarqan.
10Mana alita rurananpaq wilanakuptinpis Tayta Diosmi tsapata churapan.
11Kikin yarpashqantaqa imaypis kamakätsinmi.
12Israel runakunatami Tayta Dios akrarqan herencian kananpaq.
Payman yärakurmi kushishqa kawapäkun.
13Jana patsapitami Tayta Dios pïmaytapis rikaykämun.
14Tashqanpita patsami kay patsacho kaqkunata rikaykämun.
15Paymi lapan runapa shonquntapis kamashqa.
Paymi runa imata rurashqantapis rikaykämun.
16Reyqa manami atska soldäduyuq kashqanpitatsu guërracho vincin.
Manami ali chölu soldäduyuq kashqanpitatsu contrankunapita salvakun.
17Manami ali cawalluyuq kashqanpitatsu pelyacho vincin.
Mayjina ali cawalluyuq karpis manami contrankunapita salvakuntsu.
18 Tayta Diosmi payta mantsakuqkunata imaykapitapis tsapan.
Kuyakuq kashpanmi payman yärakuqkunata yanapan.
19Paykunatami wanuypita salvan.
Muchuy kaptinpis mikuyta kamaripanmi.
20Noqantsiqa Tayta Diosmanmi yärakuntsi.
Paymi yanapamantsi y escüduno tsapämantsi.
21Payman yärakuptintsiqa shonquntsipis kushikunmi.
22Noqakunata imaypis kuyapaykalämay, Tayta Dios.
Qamlamanmi yärakärimü.
Who We AreWhat We EelieveWhat We Do
2025 by iamachristian.org,Inc All rights reserved.
