Miqueas 7 - Quechua Margos-Yarowilca-Lauricocha Bible（qvm）

Jutsa rurayman Israel runakuna churakashqan

1¡Imataq pasaykaläman!

Cosechashqa chakraman yaykur üvata y hïgusta ashiq runanömi kaykä.

Chakracho imatapis mana tarir mikanaykaq runa lakikushqannömi lakikü.

2Kay nacionchöqa manami pipis Tayta Diosta cäsukuntsu.

Alilata ruraq runaqa manami jukpis kantsu.

Wanutsinakuylapaqmi yarparkaykan.

Juknin jukninpis ushakätsinakuylatami munarkaykan.

3Jutsa ruraylamanmi umankuna churakashqa karkaykan.

Autoridäkunapis y juezkunapis chaskipakurmi shumaq mana arreglapäkuntsu.

Rïcu runakunaqa pägaykurmi munashqanta ruratsipäkun.

Tsaynöpami wakin runakunapis jutsa ruraylaman churakashqa kawapäkun.

4Paykunachöqa mas respitashqa runapis kashanömi mana ali kaykan.

Mas yärakuypaq runapis wallankanömi kaykan.

Tsayno kaptinmi jutsa rurashqankuna aypämushqana kaykan.

Wilakuq profëtakuna wilakushqannölami castiganäpaq kaq junaq chayaykämunna.

Tsay witsan imata rurananpaqpis manami kamäpakärinqatsu.

5Pitapis ama criyipäkuynatsu.

Mas kuyashqayki amïguykikunamanpis ama yärakäriytsu.

Warmikitapis lutalaqa imatapis ama wilapaytsu.

6Olqu tsurinmi taytanta manakaqman churan.

Warmi wawanmi mamanpa contran rikakun.

Lumtsuyninpis suedranta chikinmi.

Tsayno karmi tsay wayilacho tarpis kikinpura chikinakun.

7Tsayno kaptinpis noqaqa Tayta Dioslamanmi yärakuykä.

Salvamänanpaq Tayta Dioslamanmi imaypis yärakushaq.

Payqa manakushqätapis mayamanmi.

Israel runakunata Tayta Dios salvananpaq nishqan

8Tsay witsanmi Israel runakuna kayno nipäkunqa:

<

Ishkirpis sharkushaqmi.

Yanawyaykaq tsakaychöno kaptïpis Tayta Diosmi noqapaq atski kanqa.

9Tayta Diosta rabyanätsirmi jutsata rurashqä.

Tsaymi castigamaptinpis awantapäkushaq.

Nirkurmi perdonamashpan atsikyaqman jorqamanqa.

Salvamaptin kushishqami kawashaq>>.

10Chikimaqnïkunapa nawpanchömi Tayta Dios yanapamanqa.

Tsayta rikarmi pasaypa penqaytukushqa rikakärinqa.

Tayta Dios castigamashqanta rikamarmi paykunaqa kushipämashpan kayno nipäkamarqan: <<¿Maychötaq kaykan Diosniki?>>

Tsayno nimashqanpitami cällicho kaykaq mituno jarukushqa kapäkunqa.

Tsayno kaykaqta rikarmi noqapis paykunata kushipäshaq.

11Jerusalén marka, jiruruypa corralaraq perqaykikuna altsashqa kananpaq kaq junaq chayaykämunnami.

Nacionnikipis mas jatunmi kanqapaq.

12Tsay witsanqa maytsaypitapis runakuna qammanmi shapäkamunqapaq.

Tsaymi shamunqa Asiriapita, Egiptupita, Nilo mayupita, Éufrates mayupita, lamar kuchunpita, jalqakunapita y maytsaypitapis.

13Jutsata rurar kawashqanpitami markankuna chunyaranqapaq.

Tayta Diosta manakärishqan

14Tayta Dios, kuyashqayki runakuna kaykaptïqa shumaq rikaykälamay.

Noqakunaqa karkaykä qampa uyshaykinömi.

Alinnincho tarpis munti rurincho oqrakashqanömi karkaykä.

Unay aylükunata ali rikashqaykino noqakunatapis rikaykalämay.

Basáncho y Galaadcho ali qewakuna kashqanman yapay pushaykalämay.

15Unay aylükunata Egiptupita jorqamushpayki milagrukunata rurashqaykino noqakunapaqpis milagrukunata ruraykulay.

16Milagrukunata rurashqaykita wakin nación runakunapis rikapäkutsun.

Tsayta rikarmi paykunapis tantiyakärinqa qam japalayki munayniyuq Dios kashqaykita.

Kikinkuna munayniynaq kashqanta tantiyarmi pasaypa penqaytukushqa rikakärinqa.

Äyakashqa rikakärishpan ima ruraytapis manami kamäpakunqatsu.

17Paykunaqa culebrakunanömi alpata mikunqapaq.

Pakarpaykashqanpita yarqamurmi nawpaykiman siksikyaykar chayamunqapaq.

18Tayta Dios, qamnöqa manami juk dios kantsu.

Kuyashqayki runakuna perdonta manakushuptikiqa perdonankimi.

Jutsa rurashqankunatapis qonqankimi

Rabyar imayyaqpis castiganaykipa trukanqa salvashqayki runakunata kuyapar yanapankimi.

19Noqakunata yapay kuyapaykalämay, Tayta.

Jutsa rurashqäkunatapis amana yarparaykulaytsu.

Tsaypa trukanqa jutsa rurashqäkunata jitarpuy mas hondunnin lamarman.

20Abrahamta, Jacobta y wakin unay aylükunata kuyapar promitishqaykita cumpliykulay, Tayta.