1¡Aleluya!
¡Tayta Diosta alabapäkuy!
Sirviqninkuna, Tayta Diosta alabapäkuy.
2 Tayta Diospa wayincho kaykaqkuna, payta alabapäkuy.
Tayta Diosnintsipa wayin patiucho kaykaqkuna, payta adorapäkuy.
3Alilata ruraq kashqanpita Tayta Diosta adorapäkuy.
Kuyakuq kashqanpita salmukunata cantar alabapäkuy.
4Jacobpita miraq runakunatami paypa kananpaq Tayta Dios akrarqan.
Israel runakunatami akrarqan herencian kananpaq.
5Noqa musyämi Tayta Dios munayniyuq kashqanta.
Payqa lapan dioskunapitapis mas munayniyuqmi kaykan.
6Jana patsacho, kay patsacho, lamarcho y lamar rurin jiwjiwyaykaqkunachöpis Tayta Diosqa munashqantami ruran.
7Kay patsapa kuchunpitami pukutayta sharkatsin.
Tamyamunanpaqpis räyutami pashtatsimun.
Churaraykätsishqanpitami wayratapis jorqamun.
8Egipto runakunapa qechpa tsurinkunatami wanutsirqan.
Uywankunapa punta kaq wawankunatapis wanutsirqanmi.
9Faraón y mandäshiqninkuna rikananpaqmi Egiptucho mantsariypaq kaqkunata rurarqan.
10Atska nacionkunachömi runakunata wanutsirqan.
Munayniyuq reykunatapis ushakätsirqanmi.
11Tsay reykunami karqan amorreo runakunapa mandaqnin Sihón, Basáncho taq rey Og y cananeo runakunapa mandaqnin reykuna.
12Tsay runakunapa nacionninkunatami kuyashqan Israel runakunata qoykurqan posisionnin kananpaq.
13 Tayta Dios, mana ushakaqmi kaykanki.
Qamtaqa imayyaqpis yarparäshunkipaqmi.
14 Tayta Diosqa kuyashqan runakunata yanapanqami.
Sirviqninkunataqa kuyapanqami.
15Juk lädu nación runakuna adorashqan ïdulukunaqa qorilapita y qellaylapitami kaykan.
Tsaykunataqa runakunalami rurapäkun.
16Shimin kaptinpis manami rimantsu.
Nawin kaptinpis manami rikantsu.
17Rinrin kaptinpis manami mayantsu.
Manami jämayninpis kantsu.
18Ïdulu munayniynaq kashqannömi ïdulukunata ruraqkunapis karkaykan.
Ïdulukunaman yärakuqkunaqa ïdulunölami lapan karkaykan.
19Israel mayikuna, ¡Tayta Diosta alabapäkuy!
Aarónpita miraqkuna, ¡Tayta Diosta alabapäkuy!
20Leví trïbu runakuna, ¡Tayta Diosta alabapäkuy!
Tayta Diosta mantsakuqkuna, ¡payta alabapäkuy!
21 Siónpita patsa Tayta Dios alabashqa kaykulätsun.
Paymi Jerusaléncho taykan.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
