1Kushishqami kawarkaykan Tayta Dios munashqanno kawaq runakuna.
Paykunami Tayta Diospa leyninkunata cumplipäkun.
2Kushishqami kawarkaykan Tayta Dios ordenashqankunata cumpliqkuna.
Paykunami lapan shonqunwan payta ashipäkun.
3Manami imaypis mana alikunata rurapäkuntsu.
Tsaypa trukanqa Tayta Diosta cäsukur imaypis alilatami rurapäkun.
4Tayta Dios, qammi yachatsikuynikita qelqatsishqanki mana qonqaypa cumplipäkunäpaq.
5¡Alimi kanman estatütuykikuna nishqanta cumpliptï!
6Mandamientuykikunata cumplirqa manami imapitapis penqakushaqtsu.
7Nishqaykikunata yachakurqa lapan shonqüwanmi qamta alabashayki.
8Estatütuykikunataqa imanöpapis cumplishaqmi.
¡Ama kachaykalämaytsu!
Bet9¿Imanöparaq jutsa rurayta mözu kacharinman?
Jutsa ruraytaqa kacharinqa palabraykita cäsukurmi.
10Lapan shonqüwanmi qamta ashï.
Mandamientuykikunata imaypis cäsukunäpaq yanapaykalämay.
11Jutsata rurar contrayki mana kanäpaqmi palabraykita shonqücho imaypis yarparaykä.
12 Tayta Dios, pïmaypis alabaykuläshunki.
Estatütuykikunata yachaykatsilämay.
13Noqaqa lapan nishqaykitami wilakuykä.
14Riquëzakunata tarir kushikushqäpitapis masmi kushikü ordenashqaykikuna nishqanno kawashpä.
15Yachatsikuyniki nishqanno kawanäpaqmi imaypis yarpachakü.
Munashqaykino kawanäpaqmi imaypis tantiyakü.
16Estatütuykikunata cumplirmi kushikü.
Palabraykitaqa manami imaypis qonqashaqtsu.
Guímel17Sirviqniki karmi qamta ruwakü ali kawayta qoykamänaykipaq.
Palabraykitaqa imaypis cäsukushaqmi.
18Nawïta kichaqno shumaq tantiyaykatsilämay.
Tsaynöpami leynikicho kushikuypaq kaqkunata tantiyakushaq.
19Kay patsachöqa qorpalami kaykä.
Mandamientuykikunata mana qonqanäpaq yanapaykalämay.
20Lapan shonqüwanmi imay hörapis nishqaykikunata cumpliyta munaykä.
21Orgullösukunata imaypis castigankimi.
Paykunaqa mandamientuykikunata mana cäsukushqanpitami maldicionashqa karkaykan.
22Runakuna chikimar manakaqman mana churamänanpaq tsapaykalämay.
Noqaqa ordenashqaykikunata cäsukuykämi.
23Munayniyuq runakuna conträ sharkunanpaqmi wilanakurkaykan.
Tsayno kaptinpis sirviqniki karmi estatütuykikunata cumplinäpaq imaypis yarparaykä.
24Ordenashqaykikunata cumplirmi kushikü.
Tsaykunami tantiyatsiman ali kawanäpaq.
Dálet25Wanunäpaqnami kaykä.
Promitimashqaykino ali kawayta qoykalämay.
26Yarpachakushqäta qamta wilaptïmi mayamar yanapamashqanki.
Estatütuykikunata yachaykatsilämay.
27Yachatsikuynikikunata tantiyaykatsilämay.
Mantsariypaq rurashqaykikunata imaypis yarparäshaqmi.
28Lakikuylawannami uyutarküpis.
Palabraykiwan shakyaykatsilämay.
29Jutsa ruraylacho mana kawanäpaq yanapaykalämay.
Kuyapämashpayki leynikikunata tantiyaykatsilämay.
30Munashqaykino kawaytami munä.
Nishqaykikunata cäsukurmi kawashaq.
31 Tayta Dios, ordenashqaykikunatami waran waran cäsukuykä.
Penqaymanqa ama kachaykalämaytsu.
32Ali yarpaykunata qomaptikimi shonqü pasaypa kushikun.
Tsaymi mandamientuykikunata imaypis cäsukushaq.
He33 Tayta Dios, estatütuykikunata yachaykatsilämay.
Yachatsimaptiki wanunäyaqmi cumplishaq.
34Leynikikunata cäsukunäpaq tantiyaykatsilämay.
Tsawraqa lapan shonqüwanmi cumplishaq.
35Mandamientuykikunata cumplinäpaq yanapaykalämay.
Cumplirmi kushishqa kawashaq.
36Ordenashqaykikunata ruranäpaq yarpaykatsilämay.
Ama kachapaykamaytsu suwakuypa rïcuyänätaqa.
37Ama munaykulaytsu mana alikunata rikanäpaq.
Nishqaykino ali kawanäpaq yanapaykalämay.
38Sirviqnikikunata promitishqaykita cumpliykulay.
Mantsakushuqniki kaykaptïqa yanapaykalämay.
39Nishqaykikunaqa alimi kaykan.
Qamta cäsukushqäpita asipämaptin yanapaykalämay.
40Yachatsikuynikitaqa lapan shonqüwanmi kuyä.
Munashqaykino kawanäpaq yanapaykalämay.
Vav41 Tayta Dios, kuyamashpayki yanapaykalämay.
Promitimashqaykinöla salvaykalämay.
42Yanapamashqaykita rikarmi manakaqman churamaqkuna upälakärinqa.
Noqaqa palabraykimanmi imaypis yärakuykä.
43Yanapaykalämay palabraykita imaypis wilakunäpaq.
Nishqaykikunamanmi yärakü.
44Kawashqäyaqqa leynikikunata imaypis cäsukushaqmi.
45Yachatsikuynikikunata cumplirmi imaypis jawkala kawashaq.
46Ordenashqaykikunatami reykunatapis yachatsishaq.
Mana penqakuypami wilakushaq.
47Mandamientuykikunata kuyämi.
Tsaykunata cäsukurmi shonqü kushikun.
48Mandamientuykikunata kuyarmi kushishqa chaskikü.
Estatütuykikunata cumplinäpaqmi imaypis yarpachakü.
Zayin49Sirviqniki kaykaptïqa promitimashqaykita yarpaykulay.
Noqaqa qammanmi yärakamü.
50Promitimashqaykikuna imaypis shakyätsimanmi.
Tsaynöpami lakishqa kaykaptïpis consulamanki.
51Orgullösu runakuna pasaypami achäquita ashipaykäman.
Tsayno kaptinpis leynikikunata cäsukuykämi.
52 Tayta Dios, yarparaykämi unay aylükunata nishqaykita.
Tsaykunata yarparkurmi imaypis kushikü.
53Fiyu runakunami pasaypa rabyanätsiman.
Leynikikunatapis manami cäsukärintsu.
54Karu markacho karmi estatütuykikuna ali kashqanpita cantaykä.
55 Tayta Dios, tsakaykunapapis qamlatami yarparä.
Imaykanöpapis leynikikuna nishqantami cäsukushaq.
56Noqaqa yachatsikuynikikunatami imaypis cäsukushaq.
Jet57 Tayta Dios, qamlami herenciä kaykanki.
Tsaymi promitï palabraykita imaypis cäsukunäpaq.
58Lapan shonqüwanmi qamta manakamü.
Promitishqaykita cumplir yanapaykalämay.
59Imanöpis kawaykashqätami yarpachakushqä.
Tsaymi tantiyakushqä ordenashqaykikuna nishqanno kawanäpaq.
60Imanöpapis mandamientuykikunata cumpliytami munaykä.
61Fiyu runakuna achäquita ashipämaptinpis noqaqa leynikikunatami mana qonqaypa cäsukuykä.
62Nishqaykikunata yarparkurmi pulan paqaspis agradëcikü.
63Lapan mantsakushuqnikipa amïgunmi kaykä.
Paykunaqa munashqaykinömi kawapäkun.
64 Tayta Dios, kay patsacho kuyakuynikita maytsaychömi rikä.
Estatütuykikunata yachaykatsilämay.Tet
65 Tayta Dios, palabraykicho nishqaykinölami sirviqniki kaptï ali rikaykämanki.
66Yachaq y ali yarpayniyuq kanäpaq yanapaykalämay.
Noqaqa mandamientuykikunamanmi yärakü.
67Unayqa jutsata rurashqäpita pasaypami nakarqä.
Kananmi itsanqa palabraykita cäsukur ali kawaykä.
68Qamqa kuyapäkuq y alilata ruraqmi kaykanki.
Estatütuykikunata yachaykatsilämay.
69Orgullösu runakuna manakaqta jitapämaptinpis lapan shonqüwanmi yachatsikuynikita cäsukuykä.
70Fiyu runakunaqa lutantami yarpapäkun.
Noqaqa leynikikunata cumplirmi kushikü.
71Nakarpis alipaqmi nakashqä.
Tsaynöparaqmi estatütuykikunata cäsukunäpaq tantiyakushqä.
72Waranqanpa qellaypitapis y qoripitapis noqapaqqa leynikikunami mas ali kaykan.
Yod73Makikiwanmi kikiki kamamashqanki.
Tantiyaykatsilämay mandamientuykikunata yachakunäpaq.
74Palabraykiman yärakuptïmi mantsakushuqniki runakuna noqawan tinkur kushikärin.
75 Tayta Dios, musyämi nishqaykikuna ali kashqanta.
Imatapis lutanta ruraptï alipaqmi corrigimanki.
76Lakikuptïpis kuyapämar kushikatsilämay.
Promitimashqaykinöla yanapaykalämay.
77Kuyapäkuq kashpayki ali kawayta qoykalämay.
Leynikikunata cumplirmi kushikü.
78Orgullösu runakunaqa penqaycho kaykulätsun.
Paykunaqa manakaqkunatami jitapaykäman.
Tsayno kaptinpis noqaqa yachatsikuynikitami yarparaykä.
79Mantsakushuqnikikuna y ordenashqaykikunata yachaqkunaqa noqawan juntakätsun.
80Lapan shonqüwan estatütuykikunata cäsukunäpaq yanapaykalämay.
Tsayno kawarqa manami imapitapis penqakushaqtsu.
Caf81Salvamänaykipaq shuyaraykashqächömi pasaypa tsankapaykachaykäna.
Imano karpis palabraykimanmi yärakuykä.
82Promitimashqaykita shuyaraykaptilämi nawïpis tsakarpunna.
Tsaymi lakikur qamta kayno ruwakü: <<¡Imayraq shamunki shakyätsimänaykipaq!>>
83Noqaqa qoshtaywan yanayashqa puyñunömi pasaypa awkinna kaykä.
Tsayno karpis manami estatütuykikunataqa qonqätsu.
84¡Imayyaqraq tsayno nakar kawashaq!
¡Imayraq conträkunata castiganki!
85Leynikikunata mana cäsukuqkuna y orgullösukunami trampata churapämashqa.
86Lapan mandamientuykikunaqa rasun kaqlami kaykan.
Achäquita mana ashipaykaptïpis chikimaqnïkunaqa qatikachaykämanmi.
Tayta Dios, yanapaykalämay.
87Ichiklapami mana wanuykatsimashqatsu.
Tsayno kaptinpis mana qonqaypami yachatsikuynikita cäsukü.
88Kuyapämashpayki wanuypita salvaykalämay.
Tsawraqa ordenashqaykikunata imaypis cumplishaqmi.
Lámed89 Tayta Dios, palabraykiqa mana ushakaqmi kaykan.
Jana patsachöpis tsaynölami kaykan.
90Promitishqaykitaqa imaypis cumplinkimi.
Kay patsatapis mana kuyukuq kananpaqmi kamashqanki.
91Qam mandaptikimi kananyaq kay patsa kaykan.
Lapan kamashqaykipis qampa munaynikichömi kaykan.
92Leynikikunata cäsukur kushikümi.
Mana cäsukurqa lakikuylawanmi wanüman karqan.
93Imaypis manami qonqashaqtsu yachatsikuynikita.
Tsaykunata cäsukurmi ali kawaykä.
94Wamrayki kaykaptïqa salvaykalämay.
Yachatsikuynikitami imaypis cumpliykä.
95Fiyu runakunaqa wanutsimänalanpaqmi shuyarpaykäman.
Tsayno kaptinpis ordenashqaykikunatami cäsukuykä.
96Noqa rikashqä lapanpis ushakaqla kashqantami.
Mandamientuykikunami itsanqa imaypis mana ushakaq kaykan.
Mem97Leynikikunataqa lapan shonqüwanmi kuyä.
Tsaykunapaq yarpachakuykarmi qoyarküpis.
98Mandamientuykikunataqa imaypis yarparaykämi.
Tsaymi chikimaqnïkunapita mas yachaq kaykä.
99Ordenashqaykikunata yarpararmi yachatsimaqnïkunapitapis mas yachaq kaykä.
100Yachatsikuynikikunata cäsukurmi yachaq awkinkunapitapis mas tantiyakü.
101Palabraykita cäsukurmi jutsa ruraykunapita witikushqä.
102Nishqaykikunataqa mana qonqaypami cumpliykä.
Cumplinäpaqqa kikikimi yachatsimashqanki.
103Palabraykiqa pasaypami mishkin.
Abëjapa mishkinpitapis masmi mishkin.
104Yachatsikuynikita yachakurmi mas tantiyakuq rikakü.
Tsaymi lutan ruraykunapita witikushqä.
Nun105Palabraykiqa atskinömi kaykan.
Maypa aywaptïpis atskipämaqnömi kaykan.
106Jurarmi promitishqä nishqaykikunata cäsukunäpaq.
Promitishqätaqa imaypis cumplishaqmi.
107 Tayta Dios, pasaypami nakaykä.
Palabraykicho nishqannöla ali kawanäpaq yanapaykalämay.
108 Tayta Dios, qamta alabashqäta chaskiykalämay.
Nishqaykikunata musyaykatsilämay.
109Runakuna imaypis wanutsimaytami munarkaykan.
Tsayno kaptinpis leynikikunataqa manami qonqätsu.
110Mana cäsukushuqniki runakunaqa trampatami churapaykäman.
Tsayno kaptinpis yachatsikuynikita manami qonqätsu.
111Ordenashqaykikunatami herenciatano chaskishqä.
Tsaymi shonqüpis pasaypa kushikun.
112Lapan shonqüwanmi estatütuykikunata cumpliyta munaykä.
Wanunäyaqmi imaypis cäsukushaq.
Sámej113Ali tukuqkunataqa chikïmi.
Leynikikunatami itsanqa kuyä.
114Qammi kanki pakakunä y tsapämaqnï escüdü.
Promitimashqaykimanmi imaypis yärakuykä.
115Fiyu runakuna, nawpäpita witikäriy.
Noqaqa Diosnïpa mandamientunkunatami cumplishaq.
116Promitimashqaykino ali kawanäpaq yanapaykalämay.
Manakaqlapaqqa ama yärakatsimaytsu.
117Yanapamaptikiqa chikimaqnïkunapa makinpita salvakushaqmi.
Imaypis estatütuykikunatami cumplishaq.
118Estatütuykikunata mana cäsukuqkunataqa manami rikaytapis munankitsu.
Tsay runakunaqa lutanta ruranalanpaqmi yarpachakärin.
119Fiyu runakunataqa qanratanömi melananki.
Noqaqa ordenashqaykikunatami kuyä.
120Qamta mantsakurmi pasaypa siksikyaykä.
Tsaymi nishqaykikunata cäsukü.
Ayin121Nishqaykikunataqa imaypis cumplïmi.
Nakatsimaqnïkunapa makinpita jorqaykalämay.
122Ali kawanäpaq yanapaykalämay.
Orgullösu runakuna mana nakatsimänanpaq tsapaykalämay.
123Salvamänaykipaq kashqanta shuyaraykaptilämi nawïpis tsakarpunna.
Promitishqaykita cumplinaykipaq kashqantami shuyaraykä.
124Kuyakuq kashqaykiman tupu yanapaykalämay.
Sirviqniki karmi manakamü estatütuykikunata yachatsimänaykipaq.
125Qamta sirvishuqnikimi kaykälä.
Ordenashqaykikunata shumaq yachakunäpaq tantiyayta qoykalämay.
126 Tayta Dios, runakunaqa leynikikunata manami cäsukurkaykantsu.
Tsay runakunata jukla castigaykulay.
127Fïnu qorita runakuna kuyashqanpitapis masmi mandamientuykikunata kuyä.
128Tsaymi noqaqa yachatsikuynikita lapanta cäsukuykä.
Lutankunataqa manami rurayta munätsu.
Pe129Kushikuypaqmi ordenashqaykikunaqa kaykan.
Tsaymi imaykanöpapis cäsukuykä.
130Palabraykita yachatsiptinqa runapa shonqun atsikyarkunmi.
Humildi runaqa juklami tantiyakun.
131Noqaqa lapan shonqüwanmi mandamientuykikunata yachakuyta munaykä.
132Kuyashuqnikikunata imaypis kuyapashqaykinöla noqatapis kuyapämar yanapaykalämay.
133Promitishqaykita cumplishpayki ali kawanäpaq yanapaykalämay.
Jutsa ruray ama vinciykalämätsuntsu.
134Runakuna nakatsimaptin salvaykalämay.
Noqaqa imaykanöpapis yachatsikuynikikunata cäsukuytami munaykä.
135Kuyapämashpayki ali rikaykalämay.
Estatütuykikunatapis yachaykatsilämay.
136Leynikikunata runakuna mana cäsukäriptinmi fiyupa lakikur waqä.
Tsade137 Tayta Dios, lapantapis alimi juzganki.
Nishqaykikunapis shumaqmi kaykan.
138Ordenashqaykikuna lapanpis ali karmi yärakuypaq kaykan.
139Chikimaqnïkuna palabraykita mana cäsuptinmi pasaypa rabyanä.
140Yaparir yaparirmi promitishqaykikunata cumplishqanki.
Promitishqaykikunataqa lapantami kuyä.
141Runakuna manakaqman churamaptinpis yachatsikuynikitaqa manami qonqashaqtsu.
142Qamqa lapantapis alimi juzganki.
Leynikikunapis rasun kaqmi kaykan.
143Pasaypa lakikur ima ruraytapis mana kamäpakuptïpis mandamientuykikunaqa kushirkatsimanmi.
144Ordenashqaykikunaqa imaypis alimi kaykan.
Ali kawanäpaq shumaq tantiyaykatsilämay.
Qof145 Tayta Dios, lapan shonqüwanmi qamta manakamü.
Yanapaykalämay estatütuykikunata cäsukunäpaq.
146Qamtami manakamü salvamänaykipaq.
Ordenashqaykikunata imaykanöpapis cumplishaqmi.
147Tsaka tsakala sharkurkurmi manakamü yanapamänaykipaq.
Palabraykimanmi noqa yärakuykä.
148Promitishqaykita yarpararmi kushishqa wararküpis.
149 Tayta Dios, kuyapäkuq kashqaykiman tupu manakushqäta mayaykalämay.
Alilata ruraq kashqaykiman tupu ali kawayta qoykalämay.
150Chikimaqnïkunaqa janächönami karkaykan.
Paykunaqa leynikikunata manami cäsukärintsu.
151 Tayta Dios, qamqa nawpächömi imaypis kaykanki.
Mandamientuykikunaqa lapanpis rasun kaqmi kaykan.
152Unaypita patsami musyä ordenashqaykikunata.
Ordenashqaykikunaqa imayyaqpis kaykanqami.
Resh153Nakaykunapita salvaykalämay.
Leynikikunataqa manami imaypis qonqätsu.
154Favornï sharkushpayki salvaykalämay.
Promitishqaykita cumplir ali kawanäpaq yanapaykalämay.
155Estatütuykikunata mana cäsukuptinmi jutsa ruraq runakunataqa mana yanapankitsu.
156 Tayta Dios, pasaypa kuyapäkuqmi kaykanki.
Munashqaykino kawanäpaq yanapaykalämay.
157Conträkuna y chikimaqnïkunaqa atskami karkaykan.
Tsayno kaptinpis noqaqa ordenashqaykikunatami imaypis cäsukuykä.
158Conträkunata rikar pasaypami shonqüpis rabyanan.
Paykunaqa palabraykita manami cäsukärintsu.
159 Tayta Dios, yachatsikuynikita pasaypami kuyä.
Kuyapäkuq kashpayki ali kawanäpaq yanapaykalämay.
160Palabraykiqa lapanpis rasun kaqlami kaykan.
Nishqaykikunaqa imayyaqpis kaykanqami.
Sin/Shin161Jutsata mana ruraykaptïpis munayniyuq runakuna conträmi sharkurkaykan.
Tsayno kaptinpis noqaqa palabraykitami cäsukuykä.
162Promitishqaykita musyarmi noqa kushikü.
Atska qellayta tarikuqnömi pasaypa kushikü.
163Lulakuyta manami imaypis munätsu.
Leynikikunataqa pasaypami kuyä.
164Nishqaykikuna alita ruranäpaq tantiyatsimaptinmi imay hörapis qamta alabä.
165Leynikikunata kuyaqkunaqa kushishqami kawapäkun.
Paykunataqa manami pipis jutsaman tunitsintsu.
166 Tayta Dios, salvamänaykipaq kashqantami shuyaraykä.
Tsaymi mandamientuykikunata cäsukur kawaykä.
167Lapan shonqüwanmi ordenashqaykikunata cäsukuykä.
Tsaykunataqa pasaypami kuyä.
168Imano kawashqätapis musyaykankimi.
Tsaymi yachatsikuynikita y ordenashqaykikunata cäsukur kawaykä.
Tav169 Tayta Dios, manakamushqäkunata awniykalämay.
Palabraykicho nishqaykinöla tantiyaykatsilämay.
170Ruwakamushqäta chaskiykalämay.
Promitishqaykita cumplir libraykalämay.
171Estatütuykikunata yachatsimaptikimi kushikuypita qamta alabä.
172Lapan mandamientuykikuna ali kawanäpaqmi kaykan.
Palabraykita cantashpämi lapan shonqüwan alabashayki.
173Yachatsikuynikita chaskikushqa kaptï shamur yanapaykalämay.
174 Tayta Dios, ima desgraciapitapis tsapaykalämay.
Noqaqa leynikikunata cäsukurmi kushikü.
175Kawashqäyaqqa qamlatami alabashayki.
Nishqaykikunata tantiyatsimashpayki yanapaykalämay.
176Ima ruraytapis mana kamäpakurmi pantakashqa uyshano kaykä.
Tsayno karpis mandamientuykikunata mana qonqaypami cumpliykä.
Sirviqniki kaptï shamur yanapaykalämay.
Who We AreWhat We EelieveWhat We Do
2025 by iamachristian.org,Inc All rights reserved.
