Eclesiastés 7 - Quechua Margos-Yarowilca-Lauricocha Bible（qvm）

Ali kawanantsipaq yätsishqankuna

1Ali runa kashqantsita pïmaypis rimashqanqa chanin perfümipitapis mas alimi kaykan.

Wanushqantsi junaqmi yurishqantsi junaqpitapis mas ali kaykan.

2Ushakaqla kaykarqa kawashqantsiyaq yarpäshun wanukuqla kashqantsita.

Fiestaman aywanantsipa trukanqa mas ali kaykan aya täpapakuq aywashqantsimi.

3Asikushqantsipitaqa mas ali kaykan waqashqantsimi.

Lakikurqa cärantsi jukniraqyaptinpis shonquntsichömi shumaq kawanantsipaq yarpachakuntsi.

4Tantiyakuq runaqa wanuqla kashqantami tantiyan.

Mana tantiyakuq runami itsanqa imatapis mana yarpachakuypa fiestan fiestan purikun.

5Mana tantiyakuq runa alabamashqantsipitaqa mas alimi kaykan tantiyakuq runa anyapämashqantsi.

6Mana tantiyakuq runaqa shiraka rupar pashtaqnömi lutala imapitapis asikun.

Tsayno kashqanpis manakaqlapaqmi kaykan.

7Tantiyakuq kashqantsita yarparpis runa mayintsita nakatsirqa mana tantiyakuqmi kaykantsi.

Pipis sobornuta chaskipakurqa lutan ruraymanmi churakan.

8Aruyta qalaykur kushikushqantsipitapis aruyta usharkurqa masraqmi kushikuntsi.

Imapitapis jukla rabyakunaykipa trukanqa mas ali kaykan pacienciakushqaykimi.

9Imapitapis juklaqa ama rabyakuytsu.

Mana tantiyakuq runakunalami tsayno rabyakun.

10Kayno ama ninkitsu: <<¿Imanirraq unayqa imapis mas ali karqan?>>

Tsayno nirqa mana tantiyakuq runanömi rimaykanki.

11Kay patsachöqa tantiyakuq kashqayki alimi kaykan.

Tantiyakuq kashqayki y rïcu kashqaykimi itsanqa mas ali kaykan.

12Tantiyakuq kaypis y rïcu kaypis ima peligrupitapis tsapäshunkimi.

Tsayno kaptinpis tantiyakuq runaqa rïcu runapitapis mas ali kawaytami tarin.

13Tayta Dios wiksutsishqantaqa manami pipis derechayta kamäpakuntsu.

Tsayno kaptin Tayta Dios kamakätsishqanta shumaq tantiyakunki.

14Jawka kawanaykipaq kamakätsiptinqa kushishqa kawanki.

Nakaycho kanaykipaq kamakätsiptinnaqa tantiyakunki kushikuypis lakikuypis Tayta Diospita kashqanta.

Itsanqa wara warantin imano kanaykipaq kashqantapis manami musyankitsu.

15Kay nakay patsacho rikashqämi ali runa kaykarpis manaraqpis aykäta wanushqanta.

Tsaynöpis rikashqämi fiyu runa kaykarpis atska wata kawaqta.

16Ama jutsaynaq tukunkitsu ni yachaq tukunkitsu.

Tsayno karqa kikilaykimi mana aliman chayanki.

17Tsaynöpis jutsata ama rurankitsu ni mana tantiyakuq ama kankitsu.

Tsayno karqa kikilaykimi wanuyta ashiykanki.

18Tsay nishqäkunata chaskikuy.

Tsaynöpami jutsaynaq tukunkitsu ni jutsata rurankitsu.

Tayta Diosta mantsakur tsayno kawaptikiqa lapan rurashqaykipis alimi yarqunqa.

19Tantiyakuq karqa ima peligrupitapis qeshpintsimi.

Tsaymi markata mandaq chunka runakunapitapis tantiyakuq runa mas ali kaykan.

20Kay patsachöqa manami pipis kantsu alilata ruraq y jutsata imaypis mana ruraqqa.

21Runakuna lapan nishqanta ama cäsupankitsu.

Tsayno mana cäsuparqa ashmayniki wasaykita rimashqantapis manami musyankipaqtsu.

22Qampis atska kutimi jukpa wasanta rimashqanki.

Tsayta manami ñëgankimantsu.

Tantiyakuq kananpaq yarpachakushqan

23Kay patsacho imanir lapan pasashqankunatapis tantiyanäpaqmi yarpachakushqä. Mayjina yarpachakurpis manami tantiyayta kamäpakushqätsu.

24Tantiyanantsipaqqa aläpa sasami kaykan. Tsaykunataqa manami pipis tantiyayta atipantsu.

25Tsayno kaptinpis tantiyakuq kanäpaq y lapan pasashqankunata tantiyanäpaq masraq yarpachakurqä. Tsaynöpami tantiyakurqä fiyu kay y mana tantiyakuq kay mana ali kashqanta.

26Tsaynöpis tantiyakurqä wayrapakuq warmi wanuypitapis mas mantsakuypaq kashqanta. Tsay warmipa shonqunqa toqlanömi y makinkunapis waskawan wataraqnömi kaykan. Tayta Dios munashqanno kawaq runaqa tsay niraq warmipita witikunmi. Jutsa ruraq runami itsanqa tsay warmiwan kakun.

27Yachatsikuq kar shumaq yarpachakushqätami kanan nishayki:

28Kay patsacho imanir lapan pasashqankunatapis tantiyanäpaq mayjina yarpachakurpis manami shumaq tantiyayta kamäpakütsu. Itsanqa rikashqä Tayta Dios munashqanno kawaq runakuna walkala kashqanta. Waranqa (1,000) runakunapita juklaylatami tarishqä Tayta Dios munashqanno kawaykaqta. Waranqa warmikunapitami itsanqa ni juklaylatapis mana tarishqätsu Tayta Dios munashqanno kawaykaqta.

29Tsaynöpis tantiyakushqä jutsaynaq kawanantsipaq Tayta Dios kamamashqantsita. Tsayno kawanantsipaq kamashqa kaykarpis lutan ruraymanmi churakashqantsi.