Proverbios 20 - Quechua Margos-Yarowilca-Lauricocha Bible（qvm）

1Vïnuta upyarkurqa pitapis achäquitami ashipan.

Shinkashqa runaqa piwanpis pelyanmi.

Tsay runaqa mana tantiyakuq karmi lutanta ruran.

2Rey rabyashqanqa león qaparashqanno mantsakuypaqmi kaykan.

Tsayno kaykaqtaqa wanuyta ashilarmi pipis yaykapan.

3Mana rimanakuq runataqa pïmaypis respitanmi.

Mana tantiyakuq runaqa lutalami piwanpis tinkuypa tinkun.

4Qela runaqa murukuy witsan manami arukuntsu.

Tsaymi cosëcha witsan mayjina ashirpis mana tarinqatsu.

5Hondu mayucho ima kashqanpis mana rikakashqannömi runa imata yarpashqanpis mana musyakantsu.

Tsayno kaptinpis tantiyakuq runami itsanqa runa imata yarpaykashqantapis tantiyan.

6Atskaqmi yarpapäkun ali runa kashqanta.

Tsayno kaptinpis rasunpa yärakuypaq runata ¿piraq tarinman?

7Taytan ali runa kaptinqa tsurinkunapis kushishqami kawanqa.

8Reyqa juzgananpaq trönunman jamaykur pï jutsayuq kashqantapis juklami tantiyan.

9Manami pipis kayno ninmantsu: <

Shonqüchöqa manami imatapis lutanta yarpachakütsu>>.

10Pësuwan y tupuwan engañaptinqa Tayta Dios pasaypami rabyakun.

11Ali mözu kashqantaqa reqintsi yanapakuq y respitakuq kaptinmi.

12Rikananpaq nawita y mayananpaq rinrita Tayta Diosmi kamashqa.

13Paqasta junaqta punukuptikiqa imaykipis manami kanqatsu.

Arukuptikiqa mikuynikipis putsuy putsuymi kanqapaq.

14Rantinan kashqalami imatapis baratyan.

Barätulacho rantirkurmi kushikun.

15Tantiyakuq runa rimashqanqa atska qoripitapis y tsaytsika alhäjakunapitapis mas alimi kaykan.

16Jäpa runapa garantian yaykuq runapataqa röpantapis prenda tsarinki jaqanta pägananyaq.

17Lulapaypa sakyaq runaqa jinan höra kushikurpis wara warantinkuna problëmachömi kanqa.

18Yätsikuqkuna tantiyatsiptinmi imatapis shumaq ruran.

Guërrachöpis vincipäkun shumaq yarpachakuykur pelyarraqmi.

19Tulu shimiqa juklami pitapis wilapan.

Tsay niraq kaqkunawanqa ama juntakaytsu.

20Mamanta y taytanta maldicionaq kaqqa pasaypa nakarmi wanunqa.

21Mana nakaylapa rïcuyashqanqa raslami ushakanqa.

Ushakaptinqa lakishqami purinqa.

22Venganzata ashinaykipaq ama yarpaytsu.

Tsaypa trukanqa Tayta Diospa makinman kachaykuy.

Paymi imapitapis tsapäshunki.

23Pësunwan y balanzawan engañaptinqa Tayta Dios pasaypami rabyakun.

24Runa imano kawananpaqpis Tayta Diosmi kamakätsin.

Pipis manami musyantsu wara warantin ima pasananpaq kashqantapis.

25Tayta Diosta promitirkur paqta mana cumplinkimantsu.

Mana cumpliptikiqa juzgashunkipaqmi.

26Tantiyakuq reyqa fiyu runakunata qarqunmi.

Paykunataqa chipyaqmi ushakätsin.

27Runapa shonqun alita o mana alita yarpashqantapis Tayta Diosmi musyan.

28Rey kuyapäkuq y rasun kaqlata rimaq kaptinqa pipis manami trukatsiyta munantsu.

29Mözukunaqa kalpayuq kashqanpitami kushikärin.

Awkinkunaqa tantiyakuq kashqanpitami kushikärin.

30Jutsata ruraq runaqa astaptinraqmi jutsa rurayta kacharin.

Castigaptinraqmi lutanta ruraykashqanta tantiyakun.