1Tantiyakuq runaqa pipis corrigiptin chaskikunmi.
Mana tantiyakuq runami itsanqa corrigiptinpis mana chaskikuntsu.
2Ali runataqa Tayta Dios yanapanmi.
Fiyu runatami itsanqa mana yanapantsu.
3Fiyu runataqa pïmaypis chikinmi.
Ali runatami itsanqa pïmaypis kuyan.
4Ali warmiqa runanta kushikatsinmi.
Mana ali warmiqa runanpaq kiru nanaymi kaykan.
5Ali runaqa alita rurananpaqmi yarpachakun.
Fiyu runami itsanqa pitapis lulapänanpaq yarpachakun.
6Fiyu runa shimita jatipashqanqa pitapis wanutsinanpaq trampanömi kaykan.
Ali runa yätsishqanmi itsanqa ali kawananpaq kaykan.
7Fiyu runakunaqa manaraqpis aykälatami ushakan.
Ali runakunami itsanqa kikinpis y aylunkunapis atska wata kawapäkunqa.
8Tantiyakuq runataqa pïmaypis alimi rikan.
Mana tantiyakuq runatami itsanqa pïmaypis manakaqman churan.
9Pishipakuycho kaykar runa tukushqanpitaqa mas ali kaykan waktsala karpis amïguyuq kaymi.
10Ali runaqa uywantapis kuyapanmi.
Fiyu runapaqa kuyapäkuyninpis manami kantsu.
11Arukuq runapaqa mikuyninpis putsuy putsuymi kanqa.
Qela runakunawan talukaq runaqa yarpayniynaqmi kaykan.
12Fiyu runaqa jukpa kaqtami munapan.
Ali runami itsanqa kikin arukushqalanwan kushishqa kawan.
13Fiyu runaqa shimilanpitami ima nakaymanpis chayan.
Ali runami itsanqa ima nakaypitapis ali yarqun.
14Pï runapis rimashqanman tupumi ali rikashqa o mana ali rikashqapis kanqa.
Tsaynölami rurashqanman tupu ali rikashqa o mana ali rikashqapis kanqa.
15Mana tantiyakuq runaqa lutanta rurarpis ali kashqantami yarpan.
Tantiyakuq runami itsanqa yätsishqanta chaskikun.
16Mana tantiyakuq runaqa imalapitapis juklami rabyakun.
Tantiyakuq runami itsanqa ashliptinpis upälakun.
17Ali testïguqa rasun kaqlatami riman.
Rantiy testïgumi itsanqa imatapis rasuntanöraq parlan.
18Mana tantiyakuq runakuna rimashqanqa cuchilluwan tuksishqanömi shonqunman chayaykun.
Tantiyakuq runa rimashqanmi itsanqa jampino kaykan.
19Rasun kaqta rimaq runaqa atska watami kawanqa.
Lulakuq runami itsanqa manaraqpis aykäta ushakanqa.
20Fiyu runaqa pitapis lulapänalanpaqmi yarpachakun.
Piwanpis ali kawaq runa yätsiptinqa pïmaypis kushikunmi.
21Ali runataqa manami imapis pasantsu.
Fiyu runatami itsanqa imaykapis pasan.
22Lulakuq runataqa Tayta Dios manami rikaytapis munantsu.
Mana lulakuq runatami itsanqa kuyan.
23Tantiyakuq runaqa yachaq kashqanpita manami sumätsikuntsu.
Mana tantiyakuq runami itsanqa lutanta rurarpis sumätsikun.
24Arukuq runaqa mandaqmi rikakun.
Qela runami itsanqa ashmay rikakun.
25Fiyupa lakikurqa jukniraqyashqami purin.
Pilapis ali shiminpa parlapaptinqa kushirkunmi.
26Ali runaqa runa mayinta shumaqmi tantiyatsin.
Fiyu runami itsanqa lutan ruraykunaman jitarpun.
27Qela runaqa manami imatapis tarintsu.
Arukuq runami itsanqa imaykayuqpis rikakun.
28Ali runaqa imaypis alimi kawan.
Toqshun tsakishqa runami itsanqa kikin wanuyta ashin.
Who We AreWhat We EelieveWhat We Do
2025 by iamachristian.org,Inc All rights reserved.
