Oseas 5 - Quechua Margos-Yarowilca-Lauricocha Bible（qvm）

Israel runakunata castigananpaq nishqan

1<

Israel mayor runakuna, nishqäta shumaq tantiyakäriy.

Mandaq rey, qampis y ayluykikunapis nishqäta shumaq cäsukäriy.

Mana cäsukamashqaykipitami qamkunata juzgashayki.

Runakunata tunitsinaykipaq waskata churapaqnömi Mizpacho kapäkushqanki.

Tabor jirkachöpis rednömi kapäkushqanki.

2Sitim partichöpis runakunata pözuman jitarpuqnömi kapäkushqanki.

Tsayno kashqaykipitami lapanikita castigashayki.

3Israel runakuna, musyämi imano karkaykashqaykitapis.

Runanta warmi kacharir jukwan kakuqnömi qamkunapis juk dioskunamanna yärakurkaykanki.

Tsaynöpami pasaypa jamurpaykaq karkaykanki.

4Lutankunaman umayki churakashqa karmi perdonta manakamaytapis kamäpakärinkitsu.

Manami ichiklatapis reqipäkamankitsu>>.

5Israel runakuna runa tukushqanqa wilakuykan mana ali kapäkushqantami.

Paykuna jutsayuq karmi castigashqa kanqapaq.

Judá runakunapis tsaynölami jutsankunapita ushakanqapaq.

6Uyshankunata y wäkankunata sacrificiupaq rupatsir Tayta Diosta ashirpis manami taripäkunqatsu.

Tayta Diosqa paykunapita witikushqanami.

7 Tayta Dioslaman imaypis yärakärinanpaq promitirkurpis manami cumplirkaykantsu.

Tsurinkunapis jäpa dioskunamannami yärakurkaykan.

Jutsayuq kashqanpitami juk killalacho ushakanqapaq.

Posisionninkunatapis jäpa runakunami acaparanqapaq.

8Guërra qalaykunanpaq Gabaacho waqrata tukapäkuy.

Ramáchöpis kamarikärinanpaq cornëtata tukapäkuy.

Bet-avénchöpis mayaq mayaqla kananpaq wilakäriy.

Benjamín trïbu runakunatapis alcäbu kananpaq musyatsipäkuy.

9Tayta Dios castiganan junaqmi Efraín runakuna asulashqa kanqapaq.

Rasunpa tsayno pasananpaq kashqantaqa lapan trïbu Israel runakunatami wilaykä.

10 Tayta Diosmi kayno nin:

<Tsayno kashqanpitami cargashqa mayunöraq pasaypa rabyashpä paykunata ushakätsishaq.

11Efraín runakunaqa ïdulukunata adorashqanpita pasaypami nakapäkunqa.

12Milwata puyu ushashqannömi Efraín runakunata ushakätsishaq.

Judá runakunatapis qeruta puyu ushashqannömi ushakätsishaq.

13<

Judá runakunapis pasaypa maqashqa runanömi karkaykan.

Tsayno kashqanta tantiyaykurmi Asiria nacionpa mandaqnin reyman aywaykur Efraín runakuna manakärishqa yanapananpaq.

Manakuptinpis tsay reyqa qeshyaqta aliyätsiyta ni jampiyta mana puëdiqnömi yanapayta kamäpakushqatsu.

14Ima uywatapis león tsarirkur ushashqannömi Efraín runakunata y Judá runakunata ushakätsishaq.

Ushakätsiptï manami pipis salvanqatsu.

Tsayno ushakarkatsirmi aywakushaq.

15Täkunäman kutirkurmi täkushaq jutsayuq kashqanta tantiyakur perdonta manakamänanyaq.

Paykunaqa fiyupa lakikurraqmi ashipäkamanqa>>.