1Wilakärishqäta ¿piraq chaskikushqa?
Tayta Dios imano salvamashqantsita musyatsiptinpis ¿piraq tantiyakushqa?
2Tayta Diospa sirviqninqa nawpanchömi mözuyarqan.
Tsaki pampacho sapitsar tsintsimuq yöranömi winarqan.
Payqa manami kuyaylapaqtsu ni buen mözutsu karqan.
3Runakuna payta manakaqman churarmi mana chaskikärirqantsu.
Fiyupa nanaywanmi nakarqan.
Pipis manami rikaytapis munarqantsu.
Chikishpanmi pipis payta mana cäsurqantsu.
4Paymi qeshyantsikunata apakushqa.
Paymi nanaynintsikunatapis jorqushqa.
Jutsata rurashqanpita Tayta Dios castigaykashqantami yarparqantsi.
5Tsayno yarpaptintsipis noqantsi mana cäsukuq kashqantsipitami tuksishqa karqan.
Jutsata rurashqantsipitami wanutsishqa karqan.
Tayta Dioswan ali kawayta tarinantsipaqmi castigashqa karqan.
Yawarlana ushashqa karmi aliyätsimashqantsi.
6Lapantsimi oqrakashqa uyshano kaykantsi.
Tayta Diospita witikushqa karmi munashqantsino kawaykantsi.
Tsayno kaykaptintsipis lapan jutsantsitami Tayta Dios payta jitapashqa.
7Pasaypa maqapäkuptinpis manami imatapis rimakurqantsu.
Uyshata pishtananpaq apaqnömi payta apapäkurqan.
Milwanta rutuptin uysha kashqannömi upälala karqan.
Tsayno upälakushpan manami imatapis rimakurqantsu.
8Jutsayuqtanömi juzgananpaq prësu aparqan.
Payta wanutsiptin tsurinpis manami karqantsu.
Kuyashqä runakunapa jutsankunapitami fiyupa nakarqan.
9Payqa manami ima jutsatapis rurarqantsu ni pitapis lulaparqantsu.
Tsayno kaptinpis jutsasapakuna y rïcukuna pampakunanmanmi pampapäkurqan.
10Tsayno nakanantami Tayta Dios munarqan.
Consagratsina sacrificiuno wanuptinmi miraqninkuna tsaytsika kanqa.
Nirkurqa atska watami kawanqa.
Pay kayninpami Tayta Dios munashqanno lapanpis kamakanqa.
11Nakashqan alipaq kashqanta rikarmi kushikunqa.
Tayta Dios kaynömi nin:
< Wanurmi atskaqta perdonanqa. Jutsa rurashqankunata paymi apakunqa. 12Kikin salvakunanpa trukanqa jutsayuq runanömi wanurqan. Runakuna rayku wanurmi paykunata perdonanäpaq manakamarqan. Tsaymi payta churashaq mas respitashqa kananpaq. Guërracho vinciqkuna imaykatapis chaskishqannömi paypis premiuta chaskinqapaq>>.
Who We AreWhat We EelieveWhat We Do
2025 by iamachristian.org,Inc All rights reserved.
