Isaías 11 - Quechua Margos-Yarowilca-Lauricocha Bible（qvm）

Davidpita miraq runa mandamaqnintsi kananpaq nishqan

1Troncunpita yöra tsintsimuqnömi mandamaqnintsi yurinqa.

Payqa Isaípita miraqmi kanqa.

2 Tayta Diospa Espïritunmi paycho kanqa.

Tsaymi tantiyaq y yachaq kanqa,

yätsikuq y munayniyuq kanqa,

musyaq y Tayta Diosta mantsakuq kanqa.

3 Tayta Diosta mantsakur pay munashqannömi kawanqa.

Payqa manami rikärilartsu pitapis juzganqa.

Tsaynöpis manami ninshi ninshilawantsu pitapis jutsayuq kashqanta ninqa.

4Pobrikunapa favorninmi sharkunqa.

Waktsakunataqa intëru nacionnintsichömi respitatsinqa.

Rimashqalanwanmi runakuna wanupäkunqa.

Fiyu runakunatapis juk pükaylami ushakäratsinqa.

5Tseqlanta shumaq wachkakurkurmi Tayta Dios munashqannöla imaypis mandar rasun kaqlata ruranqa.

6Tsay witsanqa atuqwan uyshapis talushqami kakunqa.

Tigriwan kapshipis juntumi pununqa.

Becërruwan leonpis jawkami purikunqa.

Tsaykunataqa wamrami mitsinqa.

7Wäkapis ösuwan juntumi qewata mikunqa.

Wawankunapis talushqami pununqa.

Leonpis törunömi qewata mikunqa.

8Cobra nishqan culebrapa qeshwan jananchömi chuchuykaq wamrapis puklanqa.

Tsayraq wasqishqa wamra culebrapa qeshwanman makinta jatiptinpis manami picanqatsu.

9Tayta Dios mandashqan sagrädu jirkanchöqa manami pipis mana alita ruranqanatsu ni pitapis mana nakatsinqanatsu.

Lamarcho yaku junta kashqannömi Tayta Diosta reqiqkunapis kay patsacho junta kanqa.

10Tsay witsanqa Isaípita miraq runata Tayta Dios churanqa lapan nación runakunata mandananpaq.

Payta reqinanpaqmi lapan marka runakuna aywayta munanqa.

Pay tashqan nacionpaq pïmaypis parlanqa.

Juk lädu nacionpita Israel runakunata kutitsimunanpaq nishqan

11Tsay witsanqa juk lädu nacionkunacho mashtakashqa karkaykaqtami kuyashqan runakunata Tayta Dios shuntamunqa.

Tsaymi kutitsimunqa Asiriapita, Egiptupita, Patruspita, Etiopíapita, Elampita, Sinarpita, Hamatpita y lamar kuchuncho kaq nacionkunapita.

12Maytsay nacionkunapitapis Israel runakuna kutimunanpaqmi bandërata jawipäkunqa.

Wakcho kaycho mashtakashqa kaykaqtami Judá runakunatapis shuntamunqa.

13Nacionninman kutiykamurnami Efraín runakuna manana Judá runakunawan chikinakunqanatsu.

Judá runakunata chikiqkunaqa lapanmi ushakanqa.

Judá runakunapis manami Efraín runakunata rabyapanqanatsu.

14Tsaypa trukanqa Judá runakunapis Efraín runakunapis juntakaykurmi inti jeqanan kaq läducho kaykaq Filistea nacionta atacapäkunqa.

Inti jeqamunan kaq läducho taqkunatapis vincirmi imaykantapis apakärinqa.

Edom nacionpis y Moab nacionpis paykunapa makinchömi kanqa.

Amón nación runakunapis paykuna nishqantami ruranqa.

15Nacionninman kutimunanpaqmi Puka Lamar chawpinpa pasananpaq Tayta Dios nänita kichanqa.

Éufrates mayuta tsimpananpaqmi tsay mayu jananpa makinta joqarkunqa.

Makinta joqarkur fiyupa wayrätsimurmi tsay mayuta qanchisman rakinqa.

Tsaypami runakunaqa lanqinkunata mana jorquylapa pasapäkunqa.

16Asiriacho taq Israel runakunapis jatun nänipami kutipäkamunqa.

Egiptupita yarqamur jatun nänipa shamushqannömi kutipäkamunqa.