Ester 2 - Quechua Margos-Yarowilca-Lauricocha Bible（qvm）

Esterta reina kananpaq churashqan

1Rabyaynin pasariptinnami rey Asueruqa warmin Vastipaq yarparkur shonqunpis nanayparaq lakikurqan. Tsaynöpis yarparqan nawpanman mana kutinanpaq juk leyta rurashqanta.

2Tsayno lakikushqanta musyaykurmi mandäshiqninkuna kayno nirqan: <

3Cada mandashqayki provinciakunacho runakunata churashun tsay jipashkunata akraykur pushamunanpaq. Susaman chaykatsimur pushapäkutsun makikicho kaykaq warmikuna tashqan palaciuman. Tsaycho taptinnami yärakushqayki eunucu Hegaipa makinman churashun wakin warmikikunata cuidashqannöla paykunatapis cuidananpaq. Tsay jipashkuna mas kuyaylapaq kananpaq ima nistashqantapis Hegai kamaripätsun.

4Tsay jipashkunapitami mayqantapis kuyaylapaq kaqta akranki Vastipa trukan reina kananpaq>>.

Tsayno niptinmi rey Asuero kushikur yätsishqannöla jipashkunata shuntamunanpaq kacharqan.

5Susa markachömi Israel runa Jairpa tsurin Mardoqueo tarqan. Jairpa taytanmi karqan Simei. Simeipa taytanmi karqan Cis. Paykunaqa Benjamín trïbu runakunami karqan.

6Mardoqueutami atska runakunatawan rey Nabucodonosor prësu aparqan Jerusalénpita Babilonia nacionman. Paykunatawan juntumi Judá nacionpa mandaqnin rey Jeconíastapis prësu aparqan.

7Mardoqueupami prïma panin karqan Hadasa jutiyuq jipash. Paypa jukaq jutinmi karqan Ester. Payqa kuyaylapaq ali jipashmi karqan. Esterpa maman y taytan wanuykuptinmi Mardoqueuqa legitimakur tsurintano ashmakurqan.

8Rey Asuero nishqannömi Susa markaman jipashkunata shuntarkur reypa palaciunman apapäkurqan. Nirkurmi tsay jipashkunata y Estertapis Hegaipa makinman churapäkurqan cuidananpaq.

9Esterwan yachanakurmi Hegaiqa mas kuyaylapaq kananpaq ima nistashqankunata y ali mikuykunata kamariparqan. Nirkurmi Esterta shumaq atiendinanpaq palaciucho kaykaq mas yärakushqan qanchis warmikunata mandarqan. Tsay qanchis warmikunatawanmi Esterta pusharqan palaciucho kaq mas alinnin kaq cuartukunaman tsaycho tänanpaq. Tsay cuartukunaqa karqan reypa warminkuna y concubïnankuna tashqan palaciuchömi.

10Mardoqueo yätsishqannömi Esterqa mana wilakurqantsu Israel warmi kashqanta.

11Ester imano kaykashqantapis musyananpaqmi warmikuna tashqan palaciu patiu punkuman waran waran Mardoqueo aywaq.

12Tsay palaciuchömi lapan jipashkunata kuyaylapaq kananpaq juk wata shumaq ashmarqan. Tsaymi soqta killa mïrrawan talushqa aceitiwan lushikäriq. Tsaypita soqta killa mastana crëmawan y perfümiwanpis lushikäriq. Tsaypitanami turnun chayamuptin rey Asuero kaqman aywapäkuq.

13Tashqan wayipita reypa palaciunman aywananpaqmi mas kamaraqla kananpaq röpatapis y alhäjakunatapis kamaripaq.

14Rey Asueruwan punushqanpita jukaqnin tutanami reypa concubïnankuna tashqan kaq cuartukunamanna jipash aywaq. Tsaychömi Saasgaz jutiyuq eunucu runana paykunata atiendiq. Payqa rey yärakushqan runami karqan. Tsaypita mayqan jipashpis manami kutiqtsu rey Asuero mana qayatsiptinqa. Kuyashqan kaqlatami mayqan jipashtapis qayatsiq.

15Tsaypitanami Mardoqueupa prïma panin Esterta töcarqan rey Asuerupa nawpanman aywananpaq. Esterqa Abihailpa tsurinmi karqan. Tsayno töcaptinmi mas kamaraqla kananpaq Esterqa jatikurqan eunucu Hegai yätsishqan kaqkunalata. Shakya kaptinmi Estertaqa lapanpis kuyapäkuq.

16Tsawraqa qanchis watana rey kaykaptin chunka kaq killacho Esterta pusharqan rey Asuero kaqman. Tsay killapa jutinmi kaykan Tebet.

17Esterta rikaykurmi rey Asueruqa pasaypa kuyakurkurqan. Paytanöqa manami mayqan jipashtapis kuyarqantsu. Tsaymi Estertana Vastipa trukan reina kananpaq corönata jatiparqan.

18Reina kananpaq Esterta churarmi rey Asueruqa fiestata rurarqan. Tsay fiestamanmi mandäshiqninkunata y yanapaqninkunatapis qayatsirqan. Kushikuypitami mandashqan provinciakunacho impuestuta bäjatsirqan. Tsaynöpis atska regälukunata runakunata aypurqan.

19Concubïnankuna täkunan cuartukunacho tänanpaq jipashkunata pushaykashqan witsanmi reypa mandäshiqninkuna jamarashqan punkucho Mardoqueo jamaraykarqan.

20Mardoqueo yachatsishqannölami Esterqa mana wilakurqantsu Israel warmi kashqanta. Mardoqueupa makincho kaykar cäsukushqannölami imaypis Esterqa payta cäsukuq.

Rey Asuerupa contran wilanakärishqanta Mardoqueo mayashqan

21Juk junaqmi reypa mandäshiqninkuna jamarashqan punkucho jamarar Mardoqueo mayarqan rey Asueruta wanutsinanpaq ishkay runakuna pasaypa rabyashqa wilanakuykaqta. Tsay runakunaqa karqan Bigtán y Teresmi. Paykunaqa karqan tsay punkuta täpaq soldädukunapa capitanninkunami.

22Tsayno wilanakushqanta mayaykurmi Mardoqueuqa Esterta wilarqan. Tsaytanami Esterqa rey Asueruta wilar kayno nirqan: <>.

23Tsayno wilanakushqanta shumaq musyaykurnami rey Asuero tsay ishkay runakunata wanurkatsir ayanta qeruman tuyritsirqan. Nirkurmi Mardoqueo tsayno wilakushqanta qelqatsirqan acta libruman.