1 1 (1b) Tayta Dios, qammi imayyaqpis noqakunapa pakakunä kaykanki.
2Jirkakuna manaraq kaptinpis y kay patsa manaraq kaptinpis unaypita patsa imayyaqpis qamlami Dios kaykanki.
3Qam munaptikimi runakuna wanun.
Qam niptikimi wanur alpaman tikran.
4Qampaqqa waranqa (1,000) watapis juk junaqnölami kaykan.
Paqaspa juk ishkay höra pasaqnölami kaykan.
5Elaqpitami runakunata yaku apaqno apakunki.
Runakunaqa juk qepishtaynölami karkaykan.
Lulu qewanölami karkaykan.
6Tukturaykar warämuq waytano kaykarpis tardipaqa äjusyashqanömi karkaykan.
7Rabyashpaykiqa juklami noqakunata ushakätsimanki.
Rabyakuptikiqa pasaypami mantsakärï.
8Lapan jutsata rurashqäkunata musyaykankimi.
Pakaylapa mana alita rurashqäkunatapis rikaykankimi.
9Pasaypa rabyakuptikiqa chipyaqmi ushakäshaq.
Noqakunaqa jämaynölami karkaykä.
10Wakinnïqa qanchis chunka (70) watayaqnami kawapäkü.
Mas fuerti kaqkunalami pusaq chunka (80) watayaq kawapäkun.
Tsayno atska wata kawarpis aruywan nitipakashqalami kawapäkü.
Watakuna pasashqannömi noqakunapis manaraqpis aykäta ushakäshaq.
11Imajinanpa rabyashqaykita manami pipis musyantsu.
Tsayjinanpa ajanashqaykita manami pipis tantiyantsu.
12Yupashqa watala kawapäkunäpaq kashqanta tantiyaykatsilämay.
Tsaynöpami tantiyakärishaq munashqaykino kawapäkunäpaq.
13Tayta Dios, noqakunata yapay yanapaykalämay.
¡Imayyaqraq qonqaykamanki!
Sirvishuqniki karkaykaptïqa kuyapaykalämay.
14Kuyamashqaykita cada tuta tantiyaykatsilämay.
Tsaynöpami wanunäyaq imaypis kushishqa alabapäkushayki.
15Atska wata lakikur kawapäkunäpaqmi nakayman churamashqanki.
Tsayman tupu atska wata kushishqa kawapäkunäpaq yanapaykalämay.
16Sirvishuqniki karkaykaptïqa noqakunatapis y tsurïkunatapis yanapamar kushikuypaq kaqkunata ruraykulay.
17 Tayta Diosnilä, kuyakuq kashqaykita tantiyaykatsilämay.
Lapan aruynïkunamanpis bendicionnikita churaykalämuy.
Who We AreWhat We EelieveWhat We Do
2025 by iamachristian.org,Inc All rights reserved.
