Zacarías 10 - Quechua Margos-Yarowilca-Lauricocha Bible（qvm）

Kuyashqan runakunata Tayta Dios salvananpaq promitishqan

1Mikuy winaykashqan witsan tamyatsimunanpaq Tayta Diosta manakäriy.

Payqa elqütsimurmi shumaq tamyatsimunqa.

Tsaynöpami chakraykikunacho qewa shumaq winamunqa.

2Ïdulukunapa jutincho wilakuqkunaqa lulakärinmi.

Tsaynölami musyakuqkunapis lulakärin.

Imapaq sueñushqanta tapukuptinpis lutankunalatami parlapäkun.

Janan shonqulami kuyapanpis.

Tsayno engañaptinmi mitsiqniynaq uyshakunano maytsaypapis matsikashqa runakuna karkaykan.

3 Tayta Diosmi kayno nin:

<Nirkurmi kuyashqä Judá runakunata kikï rikashaq.

Yanapaptïmi guërracho pelyananpaq alinnin cawalluno kanqa.

4<

Payqa kanqa cimientucho alinnin kaq rumino,

tolduta ichitsinanpaq estäcano

y pelyananpaq kaykaq flëchanömi.

Tsaynölami Judá runakunapita wakin mandaqkunapis kanqa.

5Paykunami ali chölulantaq kanqa.

Nänicho mituta jarur ushaqnömi contrankunata guërracho ushakätsinqa.

Yanapaptïmi pelyacho vincipäkunqa.

Cawallun muntashqa kaqkunatapis vincirmi penqayman churapäkunqa.

6<

Josépita miraqkunatami salvashaq.

Paykunata kuyapashpämi nacionninman kutitsishaq.

Imaypis mana kacharishqanömi paykuna kanqapaq.

Noqaqa paykunapa Tayta Diosninmi kaykä.

Manakamashqanta imaypis mayashaqmi.

7Efraín runakunaqa ali chölulantaqmi kapäkunqa.

Vïnuta upurkur kushikuqnömi kushishqa kawapäkunqa.

Kushishqa kaykaqta rikarmi tsurinkunapis kushikärinqa.

Yanapashqäpita kushikurmi alabapäkamanqa.

8<

Wichyakuypa qayakurmi maytsaypitapis shuntamushaq.

Nawpata mirashqannömi yapaypis tsaytsikaman mirapäkunqa.

9Maytsay markakunaman qarqushqa kaptïpis sirvimänanpaqmi tantiyakärinqa.

Karu nacionkunapitami tsurinkunawan kutipäkamunqa.

10Noqami Egiptupitapis Asiriapitapis kutitsimushaq.

Nirkurmi Galaad y Líbano partikunaman churashaq tsaycho täpäkunanpaq.

Tsaycho atskaman mirapäkuptinmi tänanpaqpis kichki rikakunqa.

11<

Cargashqa mayunöraq nakaykuna kaptinpis jawka kawananpaqmi yanapashaq.

Asiria runakunataqa ali chölu tukuptinpis y Egipto runakunataqa munayniyuq kaptinpis manakaqmanmi churashaq.

12Kuyashqä runakunatami valorta qoshaq cäsukamar ali kawapäkunanpaq.

Noqa Tayta Diosmi tsayno nï>>.