1 1 (1b) Tayta Dios, reyta yanapaykulay munashqaykino mandananpaq.
Tantiyaykatsilay mana jananpaypa pïmaytapis juzgananpaq.
2Tsayno yanapaptikimi kuyashqayki runakunata ali mandanqapaq.
Waktsakuna quejakushqantapis shumaqmi arreglanqapaq.
3Tsaymi may jirkacho taqkunapis jawka kawapäkunqapaq.
4Yanapaptikimi waktsakunapa favornin sharkunqa, pishipakuqkunapa tsurinkunata salvanqa y nakatsiqkunata ushakätsinqa.
5Mandaq reyqa imayyaqpis kawaykulätsun.
Intipis y killapis mana ushakaq kashqanno mandaq kashqanpis ushakaykulätsuntsu.
6Mikuypaq y qewapaq tamyapis shulyapis bendición kashqanno pïmaypaqpis bendición kaykulätsun.
7Ali mandaptin lapanpis jawka kawaykulätsun.
Jana patsacho killa ushakashqanyaq imayyaqpis mandaykulätsun.
8Lamarpa kuchunpita jukaq kuchunyaq mandaykulätsun.
Éufrates mayupita kay patsapa kuchunkunayaq mandaykulätsun.
9Chunyaq jirkacho taq contrankunapis nawpanman qonqurpakäritsun.
10Maytsay nacionpitapis reykuna shamur qaraykunata apapäkamutsun.
Tarsis nacionpita, lamar tsimpancho kaykaq nacionkunapita, Sabá nacionpita y Seba nacionpitapis regälukunata apakurkur shapäkamutsun.
11Lapan reykuna nawpanman qonqurpakutsun.
Lapan nacioncho taq runakunapis payta sirvipäkutsun.
12Reyqa waktsakuna manakuptin yanapanqami.
Pïninpis mana kaqkunapa favorninmi sharkunqa.
13Humildikunataqa kuyapanqami.
Waktsakunataqa wanuypitapis tsapanqami.
14Nakatsiq runakunapa makinpitapis jorqunqami.
Maqakuq runakunapitapis salvanqami.
Nakaycho kaq runakunataqa pasaypami kuyan.
15Reyqa atska wata kawaykulätsun.
Sabá nacionpita qorita apapämutsun.
Imaypis paypaq Tayta Diosta manakäritsun.
Paytaqa pïmaypis alabatsun.
16Mandashqan nacioncho trïgu shumaq wayuykulätsun.
Intëru jirkakunachöpis kichkiyparaq kaykulätsun.
Líbanuchönöraq loqyuypa loqyur winaykulätsun.
Runakunapis jachakunanöraq atskaman mirapäkutsun.
17Mandaq rey alita rurashqankunata imaypis yarparätsun.
Ali rey kashqanta pipis ama qonqatsuntsu.
Lapan nacionkunapis paypita bendicionta chaskiykulätsun.
Maytsaychöpis payta alabapäkutsun.
18Israel runakunata kuyaq Tayta Dios alabashqa kaykulätsun.
Paylami imaykatapis espantaypaq kaqkunata ruran.
19Imayyaqpis alabashqa kaykulätsun.
Munayniyuq kashqanta intëru kay patsacho pïmaypis musyaykulätsun.
¡Amén! ¡Tsayno katsun!
20Isaípa tsurin David manakur Tayta Diosta alabashqan kaychömi ushakan.
Who We AreWhat We EelieveWhat We Do
2025 by iamachristian.org,Inc All rights reserved.
